EZRA 5 - DAÜLANGPÜ LAIHING (BSI)

Phopshem Dousho Shao Chongpangpü

¹ Shaang Haggai thibü hatü Iddolei cheha Zekhariah thibü nyi-i Israel Kahvangei men kü Judah hatü Jerusalem kü nyupü Jehoda am kü teteivanei e.

² Hahepak kü Shealtielei cheha Zerubbabel hatü Jozadakei cheha Jeshua nyi-i Jerusalemei Kahvangei shem veyei leihen dousho chongpang, hatü Kahvang thibüthü jom mü sheühteiyei nyu.

³ Hahepak kü Euphrates heshüphi kübü governor Tattenai hatü Shethar-Bozenai hatü jiji mü sheühteipüthü Jerusalemei peiyei, “Üpai amphong kü hapa phopshem veyei leihen hatü linghen shahkung yahphopa?” shei phe.

⁴ Jomphongi shao, “Hapa shem vepü shennyakthülei men üpa üpaang?” shei phe.

⁵ Shejao jomei Kahvangei mük Jehoda am behethü shangkü veishi nyu, hatü hapa shahjang Darius ngoitü büpa leipü shahnyok mangdang thahshi jomi dou dükpü nedoh.

⁶ Euphrates heshüphi kü nyupü governor Tattenai, Shethar Bozenai hatü jiji mü sheühteipüthü, Euphrates heshüphi kübü lakchongbüthüi Darius ongpa kü shompü lai ha khih.

⁷ Jomphongi büpa kü shompü shah hapakei: Darius ongpa, Bampü selam!

⁸ Hami nüng kü ha danhünyeih; hamphong Judah kahdokei longpü Kahvangei phopshemei heihpeih. Nanglakthüi yaong longpü yah-ei hatü bham kemei taukta yah-ei lingnyüke. Hapa dou-ü longi kenhingshi hatü longi shülangshi dükei dainyüke.

⁹ Hami behethü kü, “Üpai hapa phopshem veyei leihen hatü linghen shahkung yahphopa?” shei pheshuohpeih.

¹⁰ Hami shao nüng kü nyinghühen shingvaishi jomei mübüthülei menao nyanghen pheshuohpeih.

¹¹ Jomi hapa shahnyok shuohpeih: “Hamphongü vangsho hatü kahdok shak kü Kahvangei chongphobüthü hih; bong longi shekü veyei nyupü phopshem ha veyei leinyüpeih; hapa shingkü longpü Israel ongthüi vetü nyupeih.

¹² Shejao hamei bühipathüi vangsho Kahvang mongshihhüpü nangkü büpai hathü Babylon am Nebukadnezzar kü shuohtükpeih; büpai hapa phopshem mangtüktü nanglakthü Babylon wüpküpei deilangpeih.

¹³ Shejao Babylon kü Cyrus-i ong vaipü shongpü bong kü hapa Kahvang phopshem veyei leihen shahkung shuohpeih.

¹⁴ Nebukadnezzari Jerusalem phopshem leipü shetei deiyei büpalei kahvang khümshemei tuhpü hon hi ngin dükhi-ümthü peü ngaipeih, hatü Cyrus ongpai governor vaishi jepü Sheshbazzar kü shuohpeih,

¹⁵ hatü büpai büpa kü, ‘Hathü yah-ei leiyei Jerusalem phopshemei tuhtuh, hatü hapalei shing kü Kahvangei shem vetuh’ shei epeih.

¹⁶ Hanangkü Sheshbazzar leiyei Jerusalemei Kahvangei shem chongnyiam lingpeih. Ha nyih kübü shinnyih thahshi hapa venyüpeih, shejao mangtempih” shei e.

¹⁷ “Hanangkü ongpai mongei deihjema Cyrus ongpai Jerusalemei Kahvangei shem veyei leihen nangkü shahkung shuohpü nyülashang Babylon ongthülei büshah lai kü yemei veituh. Hapheikü ongpai ham kü ha nangkü shahphen shomshih” shei eteke.