EZRA 4 - DAÜLANGPÜ LAIHING (BSI)

Phopshem Vepü kü Khüei Yaongpü

¹ Mechem Judah hatü Benjamin kübü vepathüi Shembüpa, Israel Kahvangei shem wüpküp leipü leipüthüi venyükeja shei danpa,

² jomi Zerubbabel hatü phangthü kü shangjingthü touei peiyei, “Ha shem vehen hamiyao sheühphüshah; mehenangkü hamao am kei-üng ammei Kahvang yemnyüpeih, hatü Assyria am Esarhaddon ongpai ham hatouei leihinüng büpa kü moila shuohhampeih” shei e.

³ Shejao Zerubbabel, Jeshua, hatü Israel phangthü kübü shangjingthüi, “Hamei Kahvang kü phopshem vehen ammei phaihan meheyao neshiüpih. Persia am Cyrus ongpai ham kü epükei Shembüpa, Israel Kahvangei shemü hami mon vehen” shei e.

⁴ Hahepak kü jom shonei nyupü shennyakthüi Judah nanglakthü mong vakhühen, hatü ha shem vehen nyemhühen khe,

⁵ hatü Persia kü Cyrus ongpai vanglem lempü kübü Darius ongi vanglem lempü thahshi jomi lakchongbüthü yawhdoui lak lingtüktü hapa küpjan bentükhen kheteke.

⁶ Xerxes ongi vanglem lemei chongpangpü hepak kü Judah hatü Jerusalem nanglakthü khüei thaüvaü,

⁷ hatü Persia am Artaxerxes ongpalei nyih kü Bishlam, Mithredath, Tabeel hatü büpa mü sheühteipüthüi Artaxerxes ong kü lai hük nyang. Hapa laiyü Aramaic laknyang mü Aramaic shah mü nyang.

⁸ Rehum governor hatü laknyangbü Shimshai nyi-i Jerusalem khüei Artaxerxes ongpa kü hapa lai nyang:

⁹ Rehum governor, Shimshai laknyangbü nyi mü sheühteipüthü kemei, shahphenbüthü, lakchongbüthü hatü Tripolis, Persia, Erekh, Babylon, Susa leipü Elam am,

¹⁰ hatü lupülongpü Ashurbanipal homei shetei deiyei Samaria chingnyüthü kü tuhphongpü hatü Euphrates heshüphi kübü jatthü kü hapakei shomnyeih:

¹¹ (Hapayü jomi büpa kü shompü lai.) Artaxerxes ongpa touei chongphopü Euphrates heshüphi kübü nüng chongphopüthüi hapakei shomnyeih:

¹² Nüngei kahdok leipü leiküpü Jehoda ami Jerusalemei leiyei hapa khüei yaongteipü hatü nemeipü chingnyü lingei leinyüke. Jomi bham lingei chongnyiamthü lingei leinyüke; ha nüngi nyingjü meihen khih.

¹³ Shao hapayao ongpai nyingjü meihen khih. Hapa chingnyü lingei leitü hapalei bham lingei leijema, hapa nanglakthüi ongpa kü lat hatü bom nevaijü nangkuk neyahphahen, hatü hapai ongpa kü peipü moplem hanghihen.

¹⁴ Mehenangkü hamü ongpalei hüm hahshi nyupü nangkü hatü ongpa kü dhüm neshuohpü kü veishi nenyuaokpü nangkü hami ongpa kü ha danhüei shomnyeih.

¹⁵ Ammei bühipalei büshah kü meishi yemhümao. Ammi büshah kü hapa chingnyü-ü khüei yaongpü hatü ongpa hi ongching kü meyang mebü mongshang shuohpü shing shei danghen hih. Ha tata kü hapa chingnyü-ü lavüngtoiyei leidaipeih.

¹⁶ Hapa chingnyü lingei leitü hapalei bhamthü lingei leijema, Euphrates heshüphi kü nüng shing meheyao nechongküpih shei nyinghünyeih.

Ongpai Lainyok Leishihpü

¹⁷ Ongpai ha lainyok shom: Rehum governor, Shimshai laknyangbü hatü Samaria kü nyupü sheühteipüthü, hatü Euphrates heshüphi kü nyupüthü selam:

¹⁸ Ammi shompü lai ngei touei ietü lepei ekütih.

¹⁹ Ngei ngeükhüam yantü yemei veitepih, hatü hapa chingnyüyü ongthü khüei yaongpü hatü benpülangpü shing shei büshah luangi dangteke.

²⁰ Jerusalem kü wong kohpü ongthü nyuei Euphrates heshüphi kü vanglem lemei lat hatü bom jom kü shuoh-ei nyuhampü khih.

²¹ Hanangkü lemhük kei ngeükhüam mangshuoh thahshi hapa chingnyü lingei leipü dousho nedüki danhen ngeükhüam hük shuohtuh.

²² Hapa shahhidou mong neshuoh-i netuhhen kentuh. Ongpa lomohhen mü mehekei hapa dousho longhühen?

²³ Artaxerxes ongpalei lai Rehum hatü Shimshai laknyangbü hatü sheühteipüthü kü iejahinüng jomphongi Jerusalem leipü Jehoda am touei mokei heih-ei nyeanei hapa dou dohhü.

²⁴ Hapa keiha Persia kü Darius ongpai vanglem lempü vangbong nyipabü thahshi Jerusalemei Kahvangei phopshem vepü dousho nekami yaongdai.