EZRA 1 - DAÜLANGPÜ LAIHING (BSI)

Cyrus-i Shuohpü Shahkung

¹ Persia kü Cyrus-i ong vaipü shongpü bong kü Shembüpalei shah Jeremiah homei epü jiühühen shingvaishi Shembüpai Persia ongpa Cyrus-i hapa nyangtü büpalei ongching peü kü baonghen mongnang thonghü:

² “Persia ongpa Cyrus-i hapakei enyüke: Shembüpa, vangsho Kahvangi ngei kü kahdoknyü ongchingthü peü shuohteke, hatü Judah kahdok Jerusalemei büpa shingvaishi phopshem hük vehen ngei jeteke.

³ Amphong khong mü nyupü büpalei nanglak Kahvang jom mü nyute! jom shaang Judah kahdok Jerusalemei Shembüpa, Israel Kahvang, Jerusalemei nyupü Kahvangei phopshem vehen shingvaishi leishihtuh,

⁴ hatü yangei nyupü shennyakthü jom melei nyunyushang, jemi nyupü shennyakthüi Jerusalemei Kahvangei shem vehen shingvaishi douhinang hatü yemhimak hatü mongong moila shuohtuh.”

⁵ Hahepak kü Judah hatü Benjamin phang kü shangjingthü, ngongpathü hatü Levi amüamei mongkü Kahvangi thong, aongei Jerusalemei Shembüpalei shem vehen tem.

⁶ Jomei chingyowthüi jom kü hon hi ngin, douhinang hatü yemhimak, hatü mongong moilathü mü shao bhei wongpü thinthothü shuoh-ei sheüh.

⁷ Anyei vaishi Nebukadnezzari Jerusalem leipü yah-ei leiyei büpalei kahvang khümshemei tuhpü Shembüpalei phopshem leipü douhinangthü Cyrus ongpai yah-ei ngaiteke.

⁸ Persia ongpa Cyrus-i Mithredath ongpalei mop kü khei vaipü shennyak homei hathü yah-ei ngai, hatü büpai hathü Judah ong Sheshbazzar kü heshap vaiyei shuoh.

⁹ Hathü dou dangteke: hon chilimji 30, ngini lingpü nükshung 1, 000, longkhoih 29,

¹⁰ hon nükshung 30, lebü ngini lingpü nükshung 410, lebü yungshongthü 1, 000,

¹¹ hon hatü ngin yungshong peü sheptü 5, 400 nyuteke. Babylon wüpküp leipü Jerusalemei leishingkü Sheshbazzari hathü peü koei leiteke.