EZEKIEL 9 - DAÜLANGPÜ LAIHING (BSI)

Jerusalem Hanghihüpü

¹ Hapheikü büpai ngei danshi ngeüwong antü lenei, “Peüi laophülei lakei lahhilaong notü hapa chingnyü hahhen veshanthü deikei” shei e,

² hatü apsha philei meetü dokpa shaden lemeipü shennyak vok lahhilaong notü vam. Hathü khongkü shennyak hük nyemin ashak ümtü, nyanghen lemhük notü nyuteke. Jom peü peiyei melangnyiam moidü touei yaong.

³ Hahepak kü cherubimei nyupü Israel Kahvangei müknyinshekhang haleipü vamei dai, hatü hapa phopshem shaden touei heih. Hahepak kü nyemin ashak ümtü nyanghen lemhük noshi nyupü shennyak kü Shembüpai nyüktü,

⁴ büpa kü, “Jerusalem chingnyü peü lemei daituh, hatü halei jiühitnalai dou dükpü nangkü mongshangei mahng theppüthülei shangba kü füoshang shingtuh” shei e.

⁵ Ngei bangei nyujü büpai lebüthü kü, “Büpa pheikü müei daiyei jütuh; hükao yangei tetuh; üpa kao tephahji;

⁶ viünyü viüpa, thehila, hashihnaüha hatü nyühathü peü jütuh, shejao shangba kü füoshang shingei nyupüthü üpa kao laki tehong. Ngelei phopshem kübü pangtuh” shei e. Hanangkü jomi behethü mü phopshem toueipü pangteke.

⁷ Hapheikü büpai jomphong kü, “Hapa phopshem sheihtüktuh. Hapa chingsheba kü mahmahngi matüknüng daituh” shei e. Hanangkü jomphongi daiyei chingnyü leipü shennyakthü jüteke.

⁸ Mechem jüyaki daipa, ngei monha tuhphong. Ngei kahdokei dhe aümei shatü lenei, “Oh Shembüpa Kahvang! Nüng Jerusalem kü mongshihteke shei Israel am aoei nyupüthü kemei mahtükhen je?” shei e.

⁹ Büpai ngei kü, “Israel hatü Judah amei mangü ahshi-üng ahdaiteke; kahmük kemeilei jüteipai maei hatü Jerusalemü iy-aongmashateipai madaiteke. Jomi, ‘Shembüpai kahmük yaktükteke; Shembüpai meheyao ne-eenyih’ shei enyüke.

¹⁰ Shejao ngei jom kü nephahjihen; jomi mih kü mehe dük, ngei jom kao ha dükhen” shei e.

¹¹ Hapheikü nyemin ashak ümtü nyanghen lemhük nopü shennyak Shembüpa touei nyokei leiyei, “Ngei nüngi epükei düktepih” shei shah-om aokteke.