EZEKIEL 8 - DAÜLANGPÜ LAIHING (BSI)

Phopshemei Lajei kü Khümpü

¹ Bong vok, lenyang vok mü nyih ngapabü kü mechem ngei mü Judah am behethü shemei uoshi nyupa, halei Jeiyong Shembüpalei lak ngei touei peiteke.

² Ngei ngangei veishuoh shingkü veiheni shennyak keiha hük eeteke. Shüng maai phiyü aw keiha, hatü shüng dok phiyü thittükpü nyiam nyeleppü kei nyuteke.

³ Veiheni büpalei lak keiha lüei yiüei ngelei shonyü kü düktü ngei müei dei, hatü hapa laanghai ngei kahdok vangsho aa kü noei antü manghkhang kü ngei Jerusalemei Kahvangei mük kü nemeipü lajei tuhpü phopshem pekon mongei shütü pehephi shaden touei müei dei.

⁴ Hapheikü halei ngei kahjilei eepü manghkhang keiha, Israel Kahvangei müknyinshekhang halei nyuteke.

⁵ Hapheikü Kahvangi ngei kü, “Oh shennyak ha, pehe philei ngangei veituh” shei e. Hanangkü ngei ngangei veishingkü halei pehephi shaden lemei Kahvangei mük kü nemeipü lajei haüshi ngei ee.

⁶ Büpai ngei kü, “Shennyak ha, chemjalak kü jiühitnalaipü dou, Israel ami dükpü, hatü ngelei daülangpü shing kübü ngei changtükhen shingvaishi jomi mehe düknya, ha eenyüla? Ha mü nyeipü jiühitnalai dou nüngi eehen hih” shei ephüteke.

⁷ Büpai ngei chingshe shak philei vampü shadenei müei deiyei bhamba leipü sha longpü hük huteke.

⁸ Hapheikü büpai ngei kü, “Shennyak ha, bham lowei shotuh” shei e. Hanangkü ngei bham lowei sho, hatü ngei shaden hük ee.

⁹ Büpai ngei kü, “Mongei shüei jomphongi dükpü nemeipü hatü jiühitbenüng douthü kü veihümao” shei e.

¹⁰ Hanangkü ngei shüei veishingkü bhamba kemei kü biü lajei hatü jiühitbenüng yemhimakei lajeithü bakshi hatü Israel ami khümteipü lajeithü peü ee.

¹¹ Hathü touei Israel am behethü jom pejempüan mü Shaphanei cheha Jaazaniah-ao jom mü omshi yaongshi eeteke. Jom peüei lakei ayingshü jakpü shung notü hatü ayingshü jakpü awshit aongei eeteke.

¹² Hahepak kü büpai ngei kü, “Shennyak ha, Israel am behethüi vangnyak kü laophü laophülei lajei tuhpü vaümchongei mehe düknya ha nüngi eela? shei e. Shembüpai jen ne-eenyih; Shembüpai hapa kahdok betüktih” shei jomi enyüke.

¹³ Hapheikü Shembüpai ngei kü, “Hapa mao nyeishi jomi jiühitnalai douthü dükpü nüngi eehen hih” shei eteke.

¹⁴ Hapheikü büpai ngei phopshemei shüpü pehephi shaden lemei müei dei, hatü ngei kü Tammuz kahvang didaipü nangkü nyühathüi mahng theppü huphüteke.

¹⁵ Hapheikü büpai ngei kü, “Oh shennyak ha, nüngi ha eela? Nüngi hapa mao nyeipü jiühitnalai dou eehen hih” shei eteke.

¹⁶ Hatü büpai ngei phopshem pekon mongei müei shü. Halei phopshem shaden touei shemshom hi moidü nyi aa kü baha jom hapünga hükshing phopshem philei dok mee, heong philei dhe meetü vanghe kü aümei shatü shatü khümei eeteke.

¹⁷ Shembüpai ngei kü, “Oh Shennyak ha, nüngi ha eela? Judah am shingvaishi jomi shaang dükpü jiühitnalaipü dou-ü nemeipü dou nevaipü je? Jomi nedoh-i kahdok kü üpteilenteipü mahühen, hatü nedoh-i ngei mongshihhühen je? Jomei shong kü püthang deüpü kü veihümao.

¹⁸ Hanangkü ngei mongshih wong kempai jom kü dou dükhen; ngei jom kü yahyangei nevaijü shinshangei neveihen. Jomi ngelei dhaong tüngei heih-ei lenjao ngei jomi epü nebanghen” shei eteke.