EZEKIEL 6 - DAÜLANGPÜ LAIHING (BSI)

Shembüpa i Lajei kü Khümpü Nyonghüpü

¹ Shembüpalei shah ngei touei peiküteke:

² “Oh shennyak ha, nüngei dhe Israel kahshangthü khüei meetuh hatü hathü khüei teteivantuh,

³ hatü am Israel kahshangthü, Shembüpa Kahvangei shah bangtuh shei etuh! Shembüpa Kahvangi Israel kahshangthü hatü shangtaothü, kahji hatü showhinetthü kü hapakei enyüke: Ngei am khüei yan yah-ei peikahen, hatü ammei vaümchongthü bentükhen.

⁴ Ammei moidüthü bentükhen hatü ammei ayingshü jakpü moidü nihtükhen; ammei lajeithü touei ngei ammei nanglakthü jütükhen.

⁵ Israel amei mahng lajeithü touei yaüphonghen, hatü moidü shinei ammei vangtaothü haiphonghen.

⁶ Melei am nyuhenshang, hapa shingü lavüngtoiyei tuhphonghen, hatü lajeithü bentükhen, shejüang ammei moidüthü bendaitü vüngmaki leidaihen, ammei lajeithü nihtü yaktükhen, ammei ayingshü jakpü moidü peü bentükhen hatü ammei lakdou kemei thitei yaktükhen.

⁷ Ammei nanglakthü peü lemei jühen, shejüang nedi-i yangpüthüi ngeiyü Shembüpa shei nyinghen.”

⁸ Shejao ngei hanei payü yanghen. Am hanei payü yannah kübü yangei lebü jatthülei kahmükei haishi nyuhen.

⁹ Hahepak kü nedi-i wüpküpei nyupüthüi mekei jomei mükbongjuyungpü mongdang homei ngei toueipü yandaipa, hatü jom hanghihüpa, ha deih-ei danghen. Haphei küang jomi thahpü mang hatü jiühitnalaipü douthü kü jiühitei deihhen.

¹⁰ Shejüang jomi ngeiyü Shembüpa, ngei angsha kü nyem shaopü nevai shei nyinghen.

¹¹ Jeiyong Shembüpai hapakei enyüke; Lak aptuh, la shouptuh hatü “Onyükei!” shei lentuh. Mehenangkü Israel am phangi nemeipü mang hatü jiühitbenüng dou lemphü dükteke. Hanangkü jomphongi yan, shaühile hatü chamhilemi mahkemhen.

¹² Tailuei nyupüthü chami dihen, yopailei nyupüthü yani mahhen, hatü nedi-i yangpüthü shaühile homei dikemhen. Hapakei ngei mongshihpü jom shangkü nyuhen.

¹³ Mechem laophülei nanglakthü lajeithü touei moidü shinei, shaopü shangtaothü hatü shangchingthü peüei, hatü jomi lajeithü kü ayingshü jakei moila shuohteipü püdhüm vungdhüm phangkü yaüshi eehenshang, jomphongi ngeiyü, Shembüpa shei nyinghen.

¹⁴ Hapheikü ngei jom khüei ngelei lak nohen hatü bhih kahdok kübü Riblah thahshi jom nyushing peü lavüngtoiyei leitükhen. Haphei küang jomi ngeiyü Shembüpa shei nyinghen.