EZEKIEL 5 - DAÜLANGPÜ LAIHING (BSI)

Ezekiel Sho Kuptükpü

¹ Oh Shennyak ha, nüngi yan aokpü hük yah-ei meet keiha noteituh, hatü nüngei sho hatü jumum kuptüktuh. Hapheikü dok yah-ei dokei hapa sho hantuh.

² Mechem chingnyü shümpü dohhenshang, hapa phaihan jem kü hük yah-ei chingnyü mongei jaktuh. Shao aopü kübü phaihan hük yah-ei nüngi chingnyü haolei deiyei dehtuh. Aopü phaihan hük yah-ei vanglük kü domeishuoh, hatü ngei ha pheikü yan noshi changhen.

³ Shejao sholah hanei yah-ei nüngei ashakjung kü hintuh.

⁴ Shao haleipü hanei yah-ei aw kü jakeishuoh; haleipü Israel am phang peü khüei aw vamkahen.

⁵ Shembüpai hapakei enyüke: Jatthü peü jiam kü hatü kahmükthüi shonei yahtü ngei chonglingei tuhpeyü Jerusalem ha hih.

⁶ Shejao pinnyüi ngelei shahkungthü hatü vanglemthü khüei yaongteke, lebü jatthü hatü ngeihpü shonpü kahmükthü mao pinnyü nemeipüba leiteke; ngelei shahkung hatü vanglemthü yaktükteke.

⁷ Hanangkü Shembüpai hapakei enyüke: Am ngeih-ei shonei nyupü jatthü mao am-üng nyeinya shahkung nebangpü nangkü hatü ngelei shahkung hatü vanglemthü kü nemü-i am kü ngeihpü shonpü jatthülei vanglem kü nyupükei dükpü nangkü,

⁸ Jeiyong Shembüpai hapakei enyüke: Ngei, am khüei peikünyeih, hatü mih jatthüi eeshi ngei am kü shahphenhen.

⁹ Ammei jiühitnalaipü douthü nangkü ngei shelei chemao nedükpü dou hatü ngoikahen kao nedükhen dou ngei am kü dükhen.

¹⁰ Hanangkü Jerusalemei nyühipathü laophülei hapeüthü jüei hahhen, hatü hapeüthüi laophülei nyühipathü jüei hahhen. Ngei am kü hanghi shuohhen, hatü nedi-i yemmü nyupüthüao aphipe kü haitükkemhen.

¹¹ Hanangkü ngeiyü yemmü nyupü Shembüpa Kahvang shei enyüke: Amphongi nedaünelangpü hatü jiühitnalaipü douthü homei ngelei phopshem sheihtükpü nangkü ngei am jütükhen, hatü neshinshanghen.

¹² Amphong khong kübü phaihan jem kü hükü tüngpüaipai hatü shaühile homei dihen; phaihan hükü chingnyü haoei deiyei mih-ei yani mahhühen, hatü shompü phaihan hükü ngei vanglük kü domtükhen hatü ngei ha pheikü yan noshi changhen.

¹³ Ngei hü mangshem thahshi ngei mongshihpü hatü lohpü nyukahen. Hathü peü vamphei küang, ngei Shembüpai hathü ham kü ephütepih shei nyingei peihen.

¹⁴ Mih peihpü leipü peüi eeshi am shonei nyupü jatthüi am kü eelahen hatü ngei amü lavüngtoiyei leitükhen.

¹⁵ Mechem ngei am kü mongshih-ei hatü loh-ei am kü hanghi shuohhenshang, am shinei nyupü jatthüi nyemhen. Jomi am kü jiühitei veihen hatü eelaphahen. Ngei, Shembüpai ha etepih.

¹⁶ Mechem ngei am khüei dibenüng shaühile lahhan, hatü am mahhen lahhan kaphenshang, hatü mechem ngei am kü shaühile nyeinya nyeinya koei peihen am dihen, hatü hahying peipü lem küptükhen.

¹⁷ Ngei am kü shaühile hatü am khüei phaüyemthü shomhen hatü ammei hapeüthü hahtükhen; cham hatü jüteishangteipai am kü bhümkahen, hatü ngei am khüei yan yah-ei peikahen. Ngei, Shembüpai ha etepih.