EZEKIEL 41 - DAÜLANGPÜ LAIHING (BSI)

¹ Hapheikü büpai ngei phopshem mongei müei shü, hatü shemshom leipü shalethü shetshingkü chüpü kü meter jem nyu.

² Shaden kam kü meter nga, hatü shaden bham dangpong kü chetpü kü meter nyi mü bhaoei nyu. Büpai hapa dung shetshingkü yangkü meter kukha, ba kü meter an nyu.

³ Hapheikü büpai peü mü mongpa dungei shüei shaden kübü shale shetshingkü chüpü kü meter hük, ba kü meter jem nyu, hatü bham dangpong chetpü kü meter jem mü bhaoei nyu.

⁴ Büpai hapa dung shetshingkü bahiyang kü meter an baong hükkeikei nyu. Hapa dungü jiam dung homei mongei nyu hatü büpai ngei kü, “Hapayü Longi Daülangpü Shing” shei ephopeih.

Phopshem Bham kü Khepei Dung Lingpü

⁵ Hapa shennyaki phopshem bham mongphi kü shetei veishingkü meter jem chetshi nyu. Bham kü khepei peü kü shinei ba kü meter nyi baong kohtü maanpü dungthü longi ling.

⁶ Hathü dungü jaan jem baong nyu; jaan ieyei kü hapüan baong nyu. Jaan ieyei kü dung meishi uohen shingvaishi phopshem chingshephi bhamü maipa jaan meyü dokpa jaan baüpüba ling.

⁷ Hanangkü chingshe lemeipü veijü dok thahshi bhamü aihük mü chetshi nyupükei eeteke. Phopshem bham chingshephi dung shemshe philei lathai nyi maipa leipü jiampa, hatü haleipü dokpa dung thahshi aonghen mü ling.

⁸ Shao ngei hapa phopshem shinei aangshung shaoei antü ee; haleipü dungthü leipü chongnyiamü meter jem baong shaoei antü eeteke.

⁹ Chingshephi bham chetpü kü meter nyi mü bhaoei nyu, hatü phopshem dangpong kübü dungthü aa kübü shingkong kü meter jem shiüteke,

¹⁰ hatü phopshem shing peü philei chingshe lemeipü dungthü ba kü meter an nyuteke.

¹¹ Dangpong kübü dungthü aa kü shingkong tuhteke; sha hük apshaphi lemei hatü hükpa pehe lemei nyuteke, hatü shinei shingkong tuhpü ba kü meter nyi mü bhaoei nyuteke.

Heshüphi Leipü Shem

¹² Heshüphi leipü phopshem lemei meepü shemü yangkü meter 45, hatü ba kü meter 35, hatü chetpü kü meter nyi mü bhaoei nyuteke.

Phopshem Shetpü Peüshep

¹³ Hapheikü büpai phopshem chingshephi shetshingkü meter pinyipüan nyu, hatü phopshem ngaümpheiphi shetshingkü meter pinyipüan nyuteke,

¹⁴ hatü phopshem chingshe heongphi kü shetjü meter pinyipüan nyuteke.

¹⁵ Büpai shao heshüphi kü hapa phopshem mü dangpongei nyupü dung-am lem omei shetshingkü yangkü meter 50 nyu. Phopshemei shüpü dung, Daülangpü Shing hatü Longi Daülangpü Shing kemei kü,

¹⁶ aangshung kübü aongei ümha shaden thahshi pü yah-ei ow shihei lingteke.

¹⁷ Phopshem bham mongphi kemei kü shaden aongpü thahshi ow shih-ei lingteke,

¹⁸ hatü hayü cherub hatü palm pü ow shih-ei ling; cherub hi cherub nyi aa kü palm pü yah-ei ow lingteke. Cherub ieyei kü dhe nyi nyi nyu.

¹⁹ Shing hük lemei palm pü kü shennyakei dhe veishi, hatü shing hükpa lemei palm pü kü mailangei dhe veishi ling. Hapa keiha phopshem bham peü shinei lingteke;

²⁰ aangshung kübü shaden sho thahshi cherubim hatü palm pü ow shih-ei lingteke.

²¹ Longi Daülangpü Shing leipü shaden shemhathü kü kaong peü aihük mü ling. Longi Daülangpü Shing touei shüpü shaden kü veiheni,

Pü Moidü

²² pü moidü keiha shaopü kü meter hük mü bhaoei, yangkü meter hük, ba kü meter hük nyuteke. Hapa kü haongpü shemha, hapalei la hatü shaongpü bham kemei pü yah-ei lingteke. Büpai ngei kü, “Hapayü Shembüpa touei yaongpü haüdü hih” shei ephüteke.

Shaden Nyi

²³ Daülangpü Shingei shüpü lem dohpü touei shaden hük hatü Longi Daülangpü Shingei shüpü lem dohpü touei shaden hük nyuteke.

²⁴ Hapa sha kü shabhaok nyi nyi jiam kü aphen mü nyu.

²⁵ Bhamba kü shihpükei sha kao cherubim hatü palm pü ow shih-ei lingteke. Shühen dung shaden chingshe philei shao küphen shabhaok nyuteke.

²⁶ Dung dangpongei ümha shaden shih-ei ling, hatü bham peü kü palm pü ow shih-ei lingteke.