EZEKIEL 4 - DAÜLANGPÜ LAIHING (BSI)

Jerusalem Shümhen Nang Hupü

¹ Shennyak ha, nüngi yaongshung hük deiyei nüng touei haütuh hatü hapa kü Jerusalem chingnyü baktuh.

² Hapheikü, hapa shümlanghen lappü huei bha shotuh, lateen lingtuh, baümtap vetuh hatü penyü shüh-ei laamtükhen pülu deiyei jeephongtuh.

³ Hapheikü nyiambhaok hük yah-ei nüng hatü chingnyü nyi aa kü bham kei shaungtuh; nüngei dhe halemei meetuh, hatü hapayü shümlangtü nyukahen hatü hapa shümpeyü nüng vaikahen. Hapayü Israel am shingvaishi nyangeihepü hük nyukahen.

⁴ Hapheikü nüngei laknyongphi lemei lemtuh, hatü ngei nüng kü Israel jatei mang kohühen. Nüng halei lemshi nyupü nyih heshap nüngi jomei mang kohen.

⁵ Mehenangkü ngei nüng kü nyih kho jem mü büalipüan hannyüpeih; vangbong hük kü nyih hük heshap nüngi Israel amei mang kohen.

⁶ Mechem nüngi hapa temhenshang, nüng shao chem lemhen, hapayü lakdah philei lemhen, hatü bong hük shing nyih hük heshap nyih pinyi ngei hannyüpeih; hapakei nüngi Judah amei mang kohen.

⁷ Jerusalem shümlangpü philei nüng veituh, hatü nüngei lak yaüei hapa khüei teteivantuh.

⁸ Veituh, hapa shümpü nyihthü mangkem thahshi nüng hük lemeipü hük lemei neleplükhen shingvaishi ngei nüng kü vü shanyüpeih.

⁹ Shaang nüngi wheat, barley, lihao, motorhao, shii hatü speltjük yah-ei dük hük kü shihtü nüng shing aan linghahtuh. Nyih kho jem mü büalipüan nüng lemshi nyupü hepak kü nüngi ha hahhen.

¹⁰ Nüngi nyih hük kü gram 230 mon hahhen hatü hapayü hepak itei hahhen.

¹¹ Nüngi nyih kü yungao dokei yinghen; nyih kü yungshong nyi hepak itei yinghen.

¹² Nüngi shennyakei nühinami aw jakei ha kü aan lingei peüi eeshi hahtuh.

¹³ Hapa keiha Israel nanglakthüi lebü jatthü touei nedaünelangpü hahying hahhen shei Shembüpai eteke.

¹⁴ Hahepak kü ngei, “Oh Shembüpa Kahvang! Hashih mebü shaang thahshi angkü dipü nevaijü phaüyemi jüpü phai hahtü ngei nedaünelangi neleiangpih; hapa keipü nedaüpü het manghahpih” shei eteke.

¹⁵ Hahepak kü büpai ngei kü, “Shejemü shennyakei nühinam nangjei mohoh hetvan jaktü aan linghahtuh” shei e.

¹⁶ Hahepak kü büpai ngei kü, “Shennyak ha, Jerusalem kü hahying shuohpü ngei katitükhen. Haleipü shennyakthüi nyemdaitü nük dokei hahhen, mongshangdaitü yung dokei yinghen.

¹⁷ Hahying taopai jom mongshangei hüki hük kü veihen, hatü mang lat hanghipai lameidaihen” shei eteke.