EZEKIEL 16 - DAÜLANGPÜ LAIHING (BSI)

Hingnelempü Jerusalem

¹ Shembüpalei shah ngei touei pei:

² Shennyak ha, Jerusalem kü pinnyülei jiühitnalai jung nyinghütuh,

³ hatü Shembüpa Kahvangi Jerusalem kü hapakei enyüke shei etuh. Am ngamshing, am büh am paümpü kahdokü Kanan hih; ampayü Amor am, anyüyü Hit am hih.

⁴ Am bühpü nyih ammei houng nevet, nevaijü am daühen nangkü yungi nepaü, nevaijü hümi nepaü, nevaijü ashaki neshak.

⁵ Am kü shinshangei üamiyao am kü hathü dou nedük, shejao amü koshoyalei yakphong; mehenangkü amü am bühpü nyih-üng peüi yaktükpeih.

⁶ Ngei am peih-ei daishingkü amü iy kü hüngshi eepeih. Amü iy-i mon hoitü nyupeih, shejao ngei am neditük.

⁷ Ngei amü pü bhao hük keiha longhüpeih. Am bümhishao luei longei nela leipeih; Am kü amma vamei sho lupeih, shejao am bümkong nyupeih.

⁸ Shao mechem ngei am peih-ei daipa, ngei am kü veishuohjü amü chühimai yemhen hepak ngoidaitü nyuteke. Ngei am bümkong nyupü kü ngelei bhagthuh-i jümhüpeih, hatü ngei am mü lah-ei vangpüshuwpü lingpeih hatü amü ngei lompü leihüpeih shei Shembüpa Kahvangi enyüke.

⁹ Hapheikü ngei yung yah-ei am hangha lakhü, hatü iy paütüktü olive mainga-i nyiopeih.

¹⁰ Ngei am kü hoitükpü ashak ümhü, hatü meipü phaishuw lathuh thuhhüpeih. Ngei am kü meipü nyemin ashak ümtü bhei wongpü ow owhüpeih.

¹¹ Ngei am kü ownyülangha owhüpeih: Ngei ammei lak kü laktet, ammei üng kü yük,

¹² hatü shong kü honchü, dhaongchü hatü nethe meipü athen thenhüpeih.

¹³ Hanangkü am kü hon hi ngin mon owhüpeih; ammei ashakvihayü nyemin ashak, hoipü ashak hatü laongnyim ashak mon ümhüpeih. Ammei hahyingü atta, nyahjiü hatü mainga nyuhampeih. Amü longi nela meishi onglanyü vaihen den ngoishi longpeih.

¹⁴ Am nela meipü nangkü ammei menmei jatthülei yaüei daipeih; ngelei dhemeilaüma am kü shuohpü nangkü hapayü den ngoishi nyupeih shei Shembüpa Kahvangi enyüke.

¹⁵ Shejao ammi am dhemeilaümapü kü monglemtü ammei menmeiyü büm yuhen nangkü noteipeih, hatü peihpü leipü peü mü mükbongjuyung dükpeih.

¹⁶ Ammi ammei ashak hanei nyiukei am khümshing vaümchongei ow lingpeih, hatü halei büm yupeih; henüngkei sheleiyao nenyu shao nenyukahen.

¹⁷ Ngei am kü meipü hon hi ngin ow yah-ei am shing lajei baktü lingpeih, hatü hathü mü büm yupü dou dükpeih;

¹⁸ ami hoitükpü ashak yah-ei hathü kü jüm, hatü ngelei mainga hatü ayingshü hathü touei haüpeih.

¹⁹ Ngei am kü shuohpü hahyingatta, mainga hatü nyahjiü yah-ei hathü touei deiyei vong meipü meli vaiyei haüpeih shei Shembüpa Kahvangi enyüke.

²⁰ Ngei kü bühphopü ammei hapeüthü ami yah-ei daiyei lajeithü kü jakpü moila vaishi shuohtükteke. Ngei kü hingnelempü nemeipü dou nevaipü je?

²¹ Ammi ngelei hapeüthü jütü lajeithü kü moila shuohtükpeih.

²² Ami dükpü jiühitnalai hatü mükbongjuyung dükshingkü am thehila hepak kü bümkong nyupü hatü iy kü hüngshi nyupü deih-ei neleang je?

²³ “Onyükei! amü onyükei! shei Shembüpa Kahvangi enyüke. Ammi lebü mangthü kü üei,

²⁴ lemhao peü kü ammi lajeithü kü khümshing hatü büm yuhen shingthü lingteke.

²⁵ Lemnyüshong ieyei kü ammi lajei khümshing ling, hatü ammei dhemeilaüma yuhahteke; peihpü leipü peü kü laophülei büm yuhahteke.

²⁶ Ngei mongshihhühen mü ammi iyjeiphaileipü Ijip am mü büm yupü nyeinya vamhüteke.

²⁷ Hanangkü ngei am khüei lak haongpeih hatü ammei kahmük maanei leitükpeih; ammei nemeipü nyingnyoi eeyei veüei deihpü hahnempü vepa Philistia am kü shuohtükpeih.”

²⁸ Lebüthüi ammei mükbongjuyung hüneshemhüpü nangkü ammi shao Assyria am phei changei daiyei büm yuteke; hatü hapaiyao am hüneshemhü.

²⁹ Hapheikü bhei leihpü kahdok Babylon am mü büm yuteke shejao hapaiyao am hüneshemhüaok.

³⁰ “Neveü sheshuw kohtü ammi büm yupü douthü dükteke. Am meshük mongnehingpüthüang?” shei Shembüpa Kahvangi enyüke.

³¹ Lemnyüshong ieyei kü lajeithü khümhen shing lingnyüke, hatü büm yunyüke. Shejao lebü büm yupüthü kei lop neyahnyu.

³² Amü nyüha hük laophülei baha tuhtü lebü yenpa mü mükbongjuyungpükei shüke.

³³ Büm yupü shennyak keyü lop shuohnyüpeih shejao amphongiyü am mü mükbongjuyung dükhen nyempeikei shei mih kü yawhdou shuoh-ei hatü thintho-i jom yawhnyüke.

³⁴ Hanangkü amü lebü büm yupüthü kei nevai, hayaoha khih. Üpaiyao am kü henüngkei leihen nenyean; ammi lop neyahhah-i ammi-ang lop shuoh-ei büm yunyüke. Hanangkü amü hayaoha khih.

³⁵ Hanangkü, Oh büm yupüthü, Shembüpalei shah bangtuh:

³⁶ Shembüpa Kahvangi hapakei enyüke: Ammei iyjeiphailei bhaiyei vamei hatü ammei bümkong ammei chühimaithü kü shuohpü nangkü, hatü ammei jiühitbenüng lajeithü hatü hathü kü moila shuohpü ammei hapeüthülei iy nangkü,

³⁷ am mong hüshempü ammei chühimaithü, ammi bampü hatü jiühitpüthü ngei peü leipü thaihen; ngei am khüei peü leipü hathü thaihen, hatü ammei bümkong nyem-eenüng ngei ammei ashakviha nyiuktükhen.

³⁸ Ammi mükbongjuyungpü hatü jüpü nangkü ngei am nyonghühen, hatü ngei am kü mongshihpai dipü homei am shahphenhen.

³⁹ Ngei jomei lak kü am shuohtükhen hatü jomi ammei dünyüshang hatü ammei khümshing peü mangtükhühen; jomi ammei ashakviha nyiuklanghen, hatü ammei doumeinangmei peü yahlangtü am bümkong tuhphonghen.

⁴⁰ Jomi am khüei khong hanei müei peiyei am kü yaongi shükhen hatü jomei yani am khih mü dehtükhen.

⁴¹ Jomi ammei shem awi shamtükhen hatü nyühathü longi eeshi am kü shahphenhen; am büm yupü ngei dohtükhühen hatü ammei chühimai kü lop shuohpü dohtükhühen.

⁴² Shejüang ngei am kü mongshihpü hüshemhen hatü ngei am kü mükhakpü dohdaihen; ngei nenmü nyudaihen, hatü hajük kü mongneshihhen.

⁴³ Mehenangkü ammei thehila nyihthü ammi deih-ei nedang, shejao hathü doui ngei mongshihhüpeih. Hanangkü ammei douthü ammei shangjing kü kohüpeih shei Shembüpa Kahvangi enyüke. Ammei jiühitnalai douthü mü ammi shao mükbongjuyung nedükangpü je?

Nyü Kei-üng Yiükhaao Nyüke

⁴⁴ Veituh, ammei nang eshingkü mih peüi, “Nyü kei-üng yiükhaao shüke” shei hapa kandok shah ehen.

⁴⁵ Amü hingmei mü baha hapeü yakphongpü anyü-üng anpü khih, hatü laophülei baha hapeüthü tuhphongpü anyanya am-üng anpü khih. Anyü-ü Hit am, ampayü Amor am nyuhampeih.

⁴⁶ Anya bahhenyü-ü Samaria am pinnyülei yiükhathü mü am mü apshaphi lemei nyuhampeih, hatü anaü-ü Sodom am pinnyülei yiükhathü mü am mü pehephi lemei nyuhampeih.

⁴⁷ Ammi jomei lemthü kü kamei jomei jiühitbenüng dükhiling kapiyei dükpü mon nevai shejao jom mao lem peü kü am-üng nemeipüba nyupeih.

⁴⁸ “Ngeiyü vanyangyem Shembüpa Kahvang, am hatü ammei yiükhathüi dükpü keiha ammei naü Sodom amiyao nedükangpih” shei enyüke.

⁴⁹ Anaü Sodom amei mangü hapa nyupeih: Pinnyü hatü pinnyülei yiükhathüyü changmeiyei moh-ei hahtü taopathü hanghipü kü neveihampeih.

⁵⁰ Jomi ngei touei changmei hatü jiühitbenüng dou dükpeih; hanangkü ha eeyei ngei jom yaktükpeih.

⁵¹ Samaria ami ammi dükpü mang hükkei shingao nedükangpih; jom mao am-üng nyeinya jiühitbenüng mang dükpeih, hatü ammi dükpü mang mü shetteijü anya anaüthüyü mang nedükpükei nyüke.

⁵² Ammei veü ammi kote. Ammei mangi anya anaüthü peü mang nedükpükei leihüteke; am veütuh hatü hapa veü ammi kohahte; mehenangkü ammei mangi anya anaüthü daülangpü am kei leihütükteke.

Sodom hatü Samaria Lingei Leihen

⁵³ Ngei Sodom am hatü jomei yiükhathü hatü Samaria am hatü jomei yiükhathü lomohpü shao nyipabü daeisheyei leihühen. Hih, ngei Jerusalemao daeisheyei leihühen.

⁵⁴ Am nyingi am jung deih-ei veükahen, hatü ammei veüpongi anya anaüthü-üng meipü khih shei huhen.

⁵⁵ Jom nyipabü daeisheyei leihen hatü am hatü ammei yiükhathüao sheleipükei daeisheyei leihen.

⁵⁶ Am changmeipü nyih kü ammi Sodom am kü nyienei nyangei,

⁵⁷ ammei mang shakei vamei manghu shekü nenyuhampü je? Shejao shaangü am-ang Edom, Philistia hatü am kü jiühitpü am shei nyupü jatthü touei mihnyi pü leiteke.

⁵⁸ Am nebahnevaipü hatü jiühitnalaipü douthü dükpü lat hapa shanghah ammi kohen shei Shembüpai enyüke.

Nedohnetenpü Vangpüshuwpü

⁵⁹ Shembüpa Kahvangi hapakei enyüke: “Ammi dükpü shangshi ngei am kü dükhen; ammi lahtükpü kü ne-ienelem hatü vangpüshuwpü mangtükteke.

⁶⁰ Shejao am hashih mü nyushi ngei am mü lingpü vangpüshuwpü ngei deih-ei danghen, hatü ngei am mü nedohnetenpü vangpüshuwpü linghen.

⁶¹ Shejüang ammei lemthü deih-ei danghen, hatü mechem ammi ammei anya anaü am nyokei yahhenshang veü-ei deihkahen. Hapayü ngei am mü vangpüshuwpü kübü phaihan nevaijao, ngei jomü am kü yiükhathü keiha yahphahen.

⁶² Ngei am mü vangpüshuwpü ja lingei leihen, hatü ngeiyü Shembüpa shei amphongi nyinghen.

⁶³ Ammi dükpü mang kemei ngei am kü tükhen shejao ammi hathü deih-ei veüpai ju neka-aokhen” shei Shembüpa Kahvangi enyüke.