EZEKIEL 11 - DAÜLANGPÜ LAIHING (BSI)

Nemeipü Mübüthü kü Shahphenhen

¹ Kahvang laanghai ngei shangei yah-ei an, hatü heong philei meepü Shembüpalei shem heongphi peshadenei ngei dei. Hapa shadenei shennyak hapünga yaongshi nyu. Hathü khongkü ngei nanglakthülei mübü nyi, Azzurlei cheha Jaazaniah, hatü Benaiahlei cheha Pelatiah nyi eeteke.

² Shembüpai ngei kü, “Shennyak ha, henyiyü ten dükhen küpjan temteipü hatü hapa chingnyü kü nemeipü venteipü nyi hih.

³ Jijinyi-i shemthü vehen hepak nevai; hepak mangngoipih; hapa chingnyü-ü haodük kei, hatü jenü haleipü phai kei nyüke.

⁴ Hanangkü, Oh shennyak ha, hathü khüei teteivanei etuh” shei e.

⁵ Hahepak kü Shembüpalei laangha ngei touei pei, hatü büpai ngei kü hapakei etuh shei e: “Shembüpai hapakei enyüke: Amphongi hapakei deihnyüke, Oh Israel phang, shejao ammei mongei mehe deihnya ngei ha nyingnyeih.

⁶ Hapa chingnyülei ammi shennyak longi jüteke, hatü chingyangshong kü mahmahngi mahüteke.

⁷ Hanangkü Shembüpai hapakei enyüke: Ammi halei yakphongpü mahngthüyü phai, hatü hapa chingnyü-ü haodük shejao haleipü ngei amphong ngailanghen.

⁸ Ammi yanlu kü nyemnyüke, shejao ngei am touei yan yah-ei peikahen shei Shembüpa Kahvangi enyüke.

⁹ Ngei haleipü am ngaiyei am kü shahphenhen shingvaishi kung amei lak kü shuohhen.

¹⁰ Amü yani mahkemhen, hatü ngei Israel amei viong baongei ngei am shahphenhen. Shejüang ngeiyü Shembüpa shei ami nyinghen.

¹¹ Hapa chingnyü-ü ammei haodük nevaihen, hatü ammü haleipü phai nevaihen; ngei amü Israel amei viong baongei shahphenhen.

¹² Shejüang ammi ngeiyü, Shembüpa shei nyinghen; mehenangkü ammi ngelei shahkung nebang hatü ngelei vanglem yaktük; shejao ngeihpü shonpü jatthülei vanglem aimü dükteke.”

¹³ Shaang ngei teteivanei nyushingkü Benaiahlei cheha Petaliah di. Hahepak kü ngelei dhe kahdokei aümei shatü ngeüwong antü lenei, “Oh Shembüpa Kahvang, nüngi aoei nyupü Israel am li hümtükhen je?” shei e.

Kahvangi Israel am Yanghen nang

¹⁴ Hahepak kü Shembüpalei shah ngei touei pei.

¹⁵ “Shennyak ha, Jerusalemei nyupü shennyakthüi, ‘Nüngei jeihinaüthü, nüng mü showsheipüthü hatü Israel am kemei Shembüpa kü khümhenü jom longi taishi yandaitih, kahdokao jomi ham kü yahphopeih’ shei enyüke.”

¹⁶ Hanangkü chemi wüpküpei nyupü Israel am kü Shembüpai hapakei enyüke shei etuh: Ngei jomphong jatthü touei shomtüklangmao hatü kung kahmükei haitüklangmao, shohük shingvaishi jom nyushingei ngeiyü jom nyuishing vaihampeih.

¹⁷ Hanangkü Shembüpai hapakei enyüke shei etuh: Ngei jatthü toueipü amphong thailanghen, hatü am haidaipü kahmükthü leipü ngei am müei leilanghen, hatü ngei Israel kahdok shao am kü shuohhen.

¹⁸ Am halei nyokei leiyei haleipü lajeithü hatü jiühitbenüng douthü yaktükhen.

¹⁹ Ngei jom kü mongdang hük, hatü laangha ja shihshuohhen; ngei jom kü vaanpü yaong mongdang yaktüktü phai mongdang shuohhen.

²⁰ Shejüang jomi ngelei shahkung hatü vanglemthü kü mühen. Jomü ngelei nanglak, hatü ngeiyü jomei Kahvang vaihen.

²¹ Shejao üamei mongdang lajeithü hatü jiühitbenüng douthü kü shuohtük, jomi dükpü jomei shangjing kü kohühen shei Jeiyong Shembüpai enyüke.

²² Hapheikü cherubim kharilathü kohtü jomei yang paanteke, hatü Israel Kahvangei müknyinshekhang jom shak kü nyuteke.

²³ Shembüpalei müknyinshekhang chingnyü leipü daiyei kahshang kü heongphi lemei yaong.

²⁴ Kahvang laanghai ngei kü shuohpü manghkhang kü Laanghai ngei müei Babylon wüpküpei nyupüthü touei dei. Hapheikü ngei eepü manghkhang mahdai,

²⁵ hatü Shembüpai ngei kü mehe hu, lemphüli wüpküpei nyupüthü kü ngei eshuohteke.