EZEKIEL 1 - DAÜLANGPÜ LAIHING (BSI)

Kahvangei Ong Uoshing

¹ Vangbong hapüan mü lenyang alipabü nyih ngapabü kü ngei Kebar yungyenei wüpküpei deipüthü mü nyushingkü vangshothü ap hatü ngei Kahvangei manghkhang eeteke.

² Jehoiakin khoklatei tuhpü bong nga mü lenyang ngapabü kü,

³ Babylon kahdok Kebar yungyenei Buzilei cheha Ezekiel ngongpa touei Shembüpalei shah pei, hatü Shembüpalei laki büpa kü dükteke.

⁴ Ngei veishingkü apshaphi leipü yinglükleisho vamkei-i ee. Phumtem longpü hük hapa kü vangngai-i shinei yahtü awlah kei klang nyaüpei vamteke. Aw jiamü nyiam nyeleppü keiha nyuteke,

⁵ hatü hapa jiamei veiheni hangku keiha yemha ali ngei ee.

⁶ Yemha ieyeilei dhe ali baong, hatü yang alibaong nyuteke.

⁷ Jomphongei layü laülüki, jomphongei ladokü mohoh chehalei ladhaok keiha hatü jintükpü melangnyiam keiha nyangshi nyuteke.

⁸ Jomphongei yang phangei shing ali kü shennyakei lak nyuteke. Jom peü kü dhe hatü yang,

⁹ hatü jomei yangjaang hüki hük kü hongteishi nyu. Yangthü kemei dhe philei laülüki meeshi hatü jom daishingkü yangthü dheüei neyüpyu-i nyuteke.

¹⁰ Yemha ieyei kü dhe laolao ali baong nyuteke: she philei shennyak dhe, lakdah philei mailangei dhe, laknyong philei mohoh baongei dhe, hatü ngaümpheilei alangei dhe nyuteke.

¹¹ Yemha ieyeilei yang nyi baong khangei aong, hatü hapa yangjaangi dhienei nyupü yemhalei yangjaang kü hongteishi, hatü aopü yang nyi büm kü küpshi nyuteke.

¹² Jom peü she philei laülüki dai; melemei laangha dai, halemei neyokyaki daiteke.

¹³ Yemhathüyü veiheni awtao kei nevaijü awlom keiha nedoh-i lingleiyei nyu. Hapa aw longi nyashi hatü haleipü klang nyaüpei vamteke.

¹⁴ Hapa yemhathüyü klang keiha shülangi ngaümphei hatü shelang philei lahhan daipükei longteiteke.

¹⁵ Ngei yemhathü kü veishingkü kahdok kü hongshi jom peü kü kharila hükbaong eeteke.

¹⁶ Hapa kharilathüyü veihen hatü lingpü deiaei hapakei nyuteke: hathü kemei douvang yaong keiha nyangnyangshi hatü jom peü veiheni aihük mü nyuteke. Hathü peü veiheni kharila kammong kü kharila shihpükei lingei nyuteke.

¹⁷ Jom daishingkü yemha melemei meehenshang halemei lem aliphen kü neyokyaki daiaokteke.

¹⁸ Jomei kharila kamü shaoshi hatü nyaümshi, hatü la aliphen kü shinei mük mon nyuteke.

¹⁹ Mechem yemhathü daihenshang, kharilathüao chemi dai; mechem yemhathü kahdok leipü yaonghenshang, kharilathüao yaongteke.

²⁰ Melemei laangha dai, jomphongao halemei dai, hatü kharilathü jomphong mü daiteke; mehenangkü yemhathülei laanghayü kharila kü nyuteke.

²¹ Mechem yemhathü kamhen, jomphongao chemi kam; mechem yemhathü yaonghen, jomphongao yaongdai; mechem yemhathü kahdok leipü yaongei daihen, kharilathüao jom mü yaongei dai; mehenangkü yemhathülei laanghayü kharila kü nyuteke.

²² Yemhathülei shangnyü shangei douvang yaong keiha nyangnyangshi nyiam athen keiha thuhshi nyu.

²³ Hapa phangei jomei yang laülüki hüki hük lemei vam, hatü yemha ieyei yang nyi baongi büm kü küpshi nyuteke.

²⁴ Mechem yemhathü pihenshang, ngei jomei yang ngeü yungching yungmok ngeü kei, Jeiyong Kahvangei ngeü kei, hatü veshan khong longpülei ngeü kei dan.

²⁵ Shejao shao nedoh-i jom yang kümei yaongdaishing kü jomei shangnyüshang dok leipü ngeü longpü hük vamteke.

²⁶ Jomei shangnyüshang leipü nyiam athen kei thuhpü shangei sapphir douvang yaongi lingpü ong uoshing hük nyu, hatü hapa shangkü veiheni hangkulei deiaei kei hük uoshi nyuteke.

²⁷ Hapa hangku kei nyupülei ngei eepeyü dokphiyü nyiam keiha nyangnyangshi aw mon nyüpükei, hatü la phiyü büpa kü shinei aw kei nyashi eeteke.

²⁸ Vang keipü nyih nyiamnyünyiamkangei ow keiha büpa shinei vangngai-i khangteke. Hapayü Shembüpalei müknyinshekhang lepü owhiai nyuteke. Mechem ngei hapa eepa, ngei hanei-i shah eyei dan.