ESTHER 2 - DAÜLANGPÜ LAIHING (BSI)

Esther-i Onglanyü Leipü

¹ Pheishi mechem ongpai mongshihpü meiyei leipa, büpai Vashti hatü pinnyüi dükpü dou hatü pinnyü khüei tempü shahkung deih-ei dang.

² Hahepak kü ongpa chongphopüthüi büpa kü, “Ongpa shing pai mü ngühpü nela meipü hük yemshah.

³ Ongpai büpalei ongching kü nyupü nela meipü peü Susa chingnyü leipü yowlei thaihühen khong hük jehütuh. Jom kemei nyühathü kü jungpülangpü ban tüktükpü Hegai-i veihen tuhtuh, hatü jomphong kü melivungla meipü yah-ei nyioei jungtuh.

⁴ Hapheikü ongpai lümpü nela yah-ei Vashti nangjei onglanyü vaihütuh” shei e. Hapa shahnying ongpai vaiteke shei deih-ei hapakei dük.

⁵ Shaang hapa Susa chingnyülei Benjamin am phang Jehoda am shennyak hük Kishlei cheha Shimei, Shimeilei cheha Jair, Jairlei cheha Mordekai shei mentü nyu.

⁶ Büpayü Babylon ongpa Nebukadnezzari Judah ongpa Jehoiakin mü Jerusalem leipü wüpküpei müei daipü shennyak nyuteke.

⁷ Mordekailei cheli Esther, Jehoda shah mü Hadassah shei mentü chenyü chepa didaipü nangkü büpai jungei laongteke. Pinnyü-ü nela meishi, lümhüshi nyu, hatü Mordekai-i laophülei yiükha vaishi jungei laongteke.

⁸ Mechem ongpalei ngeükhüam yanpa, Susa chingnyülei nelathü longi thaihütü Hegai-i jungei tuh. Esther-ao ongshemei müei deiyei Hegai homei junghen tuh.

⁹ Hegai-i Esther lümei deih, hatü büpai mong hahhü. Shülangi büpai pinnyü kü nela meihen jungeilang hatü meipü hahying shuoh. Büpai ongshem leipü chongphohen nela nyet jetü pinnyü hatü nelathü peü mü meipü shingei tuhteke.

¹⁰ Esther-i pinnyülei jathili hatü shemong laphen jung ngaiyei nee; mehenangkü Mordekai-i ha te-e shei eteke.

¹¹ Nyihjeih büpai Esther mekei nyüpa meheyao vainyüla shei nelathü tuhpü shemshelei kamteiyei nyu.

¹² Nela hük Xerxes ongpa touei peihen shekü pinnyüi lenyang anpünyi thahshi nela lingei vanglem kü epükei dükhen nyu. Len vok thahshi myrrh mainga nyioei hatü len vok thahshi balsam mainga nyioei junghen nyuteke.

¹³ Mechem pinnyüi nelathü nyupü shem leipü ongpa touei heihhenshang, pinnyüi mehe ow owhü, ha pinnyü kü shuohhamteke.

¹⁴ Pinnyü om mü heihhen vanglem nyu; hapheikü pinnyüi ongpalei yiükphüthü kü veiteipü ban tüktükpü Shaashgaz-i junghen nangkü nelathü tuhpü shem hükpalei müei deiham; ongpai mong hah-ei pinnyü kü men homei mangnyük thahshi pinnyü nyipabü ongpa touei nepeiham.

¹⁵ Mechem Abihailei yiükha Mordekai-i laophülei yiükha kei haümei longpü Esther ongpa touei peihen hepak ngoipa, ban tüktükpü ongpalei shennyak Hegai-i eshuohpü mü lenei lebü meheyao pinnyüi neyah. Shaang Esther eepüthü peüi pinnyü lümei deih.

¹⁶ Mechem Xerxes ongpalei ongshemei lenyang anpabü Tebeth len kü büpa vanglem lempü bong nyetpabü kü Esther müei heihjapa,

¹⁷ ongpai lebü nyühathü peü mü Esther kü bam; nelathü peü khongkü pinnyüi ongpa mong hahhü; hanangkü büpai pinnyü kü ong athen thenhü, hatü Vashti nangjei pinnyü onglanyü vaiteke.

¹⁸ Hapheikü ongpai Esther kü dhüm shuoh-ei mo longpü büpalei lakchongbü hatü büpalei chongphobüthü kü ühteke. Shao büpai ongching kempülei soti shuoh, hatü ongpa shangshi thintho shuohteke.

Mordekai-i Ongpa Yangpü

¹⁹ Mechem nelathü chemi thaijapa, Mordekaiyü ongpalei shadenei uoshi nyu.

²⁰ Shejao Esther-i pinnyülei shemong laphen hatü jathili nang mih üpa kao ne-eja-i Mordekai-i eshuohpükei nyu; mehenangkü Mordekai-i pinnyü jungei laongpü hepak kü eshuohpü aimü pinnyüi hapa ven bangteke.

²¹ Mordekai-i ongpalei pe shadenei uoshi nyupü hepak kü shem shaden yompü ongpalei lakchongbü Bigthan hatü Teresh nyi mongshih-ei Xerxes ongpa jühen phaüshah showteke.

²² Shejao hapa phaüshah showpü Mordekai-i güh yep, hatü Esther onglanyü kü lujateke, shao pinnyüi ongpa kü lushuoh; hanangkü jomi Mordekai kü mong hah-ei deih.

²³ Mechem hapa shahjang kü pheyeiyuei yempüshang, hapayü shahhing khih shei dangaok; hanangkü hapa lakchongbü nyi üng kü bheanei jütük. Ha jung peü ongpa-ao omshi nyushi büshah laitap kü nyangei tuhteke.