EPHESIA 6 - DAÜLANGPÜ LAIHING (BSI)

¹ Hashihthü, amphongi Shembüpa kü laophülei nyühipa kü dhüm shuohtuh; mehenangkü ha jiüpeih.

² Ampa hatü anyü kü dhüm shuohtuh; hapayü vangteipü shongpü shahkungnyü nyüke.

³ Shejüang ha am mü meishi nyukahen, hatü kahdoknyü kü am yangnyu shoshoei nyuhen.

⁴ Pathü, mongshihpai ammei hapeüthü kü teloh, shejao Shembüpai ungei-aeipü hatü nyuhpüvenpü kü longhütuh.

Aa hatü Shembüthü

⁵ Aathü, amphongi Khristalei ven bangpükei kahdoknyü kübü ammei shembüthü kü nyemei kheüei mong hüki ven bangtuh;

⁶ ammi hayü jomi veipü hepak kü jomi mong hahhühen shingvaishi nevai, shejao Khristalei aa leshi mongdang leipü vamei Kahvangi mongpü düktuh.

⁷ Shennyakthü kü nevai, Shembüpa kü düknyu kei monghumpai dou düktuh,

⁸ aa vaijao, bümei vaijao jeni mehe doumei dük, ha kü SHEMBÜPAleipü aihük nyokei danghen nyingei düktuh.

⁹ Hatü shembüthü, ammiyao ha aihük düktuh. Jom kü nyemshaopü dohtuh; mehenangkü anjiphen shingvaishi vangsholei Shembü hük nyüpeih, hatü büpa mü baong hanpü neshiü.

Kahvangei Vehok Phunglang

¹⁰ Shompülei, Shembüpa kü hatü büpalei ngan kü wong kohtuh.

¹¹ Ammi kahshihlei ühingnakai khüei yaongaokhen shingvaishi Kahvang phunglang ow kemei owtuh.

¹² Mehenangkü jenei vehokü iy hatü phai vepathü khüei nevai, shejao vanglem lembüthü khüei, yemya yapüthü khüei, hapa shangmang den kübü kahdoknyü nganthü khüei hatü vangsho shangeipü nemeipü laangha wongthü khüei hoknyüpeih.

¹³ Hanangkü hapa nemeipü nyih kü am khangei yaongaokhen shingvaishi Kahvang phunglang ow kemei owtuh, hatü lemphü dükpheikü wong kohshi yaongtuh.

¹⁴ Hanangkü yaongtuh hatü shahhing shüngshep sheptuh, hatü daülangshemshepü jaküpnyiam küptuh.

¹⁵ Chingmei shahjangmei baonghen tempülempü lathuh thuhtuh.

¹⁶ Hathü peü mü nemeipüthülei awlom lahhan peü mettükaokhen hinglempü inyüshung yahtuh.

¹⁷ Yemleipü nyiam athen, hatü Laangha yanlu mepa Kahvang shah nyüpa, ha yahtuh.

¹⁸ Hepak peü kü phoppü hatü yüpü lemphü kü Laangha kü phoptuh. Ha vaipü nangkü mükpaonathashi nyutuh hatü düngei daülangpüthü shingvaishi phopei nyutuh.

¹⁹ Mechem ngelei ju kübü shah vamei ehen, monglongshi hapa shahjang meipü shahjo nyinghühen nangkü ngei kü shahjang yahphahen shingvaishi ngei shingao phopshih.

²⁰ Ngeiyü hapa shahjangmei kobü hatü ha tata kü nyiamvüi shatü nyüpeih. Ngei ehen jiüpü monglongshi ngei baonghen phopshih.

Selam Shahshom

²¹ Hanangkü ngei mekei nyu, hatü ngei mehe dük, ha jeihinaü Tekhikus homei lemphü ephahen. Büpayü bampü hatü hingshangi Shembüpa chongphobü nyüke.

²² Hamphong mekei nyu ha am kü nyinghühen hatü ammei mongkü mongnang thonghen mükhong kü ngei büpa am touei shomphünyeih.

²³ Pa Kahvang hatü Shembüpa Jisu Khrista leipü chingmei hatü hinglempü mü bampü nyute.

²⁴ Jenei Shembüpa Jisu Khrista shingvaishi mechemao nemahnemenpü bampü nyupüthü peü kü phahji nyute.