EPHESIA 2 - DAÜLANGPÜ LAIHING (BSI)

Dipü Kübü Yangnyuyem

¹ Ammi pungpü hatü ammei mang homei am diyei nyuteke,

² hatü ha kü am nyuei, kahdoknyü mang lem kü müei, phumshang leipü ngan kü vanglem lembü phei müei nyu; hapa laanghai shaang ven nedanpüthü kü dou düknyüke.

³ Chem jen peüi phai-i mongpü aimü jom mü nyuei, phai hatü mongi vaüpü phei müei nyu, hatü jenphongü nyingnyoi kü-üng Kahvang mongshih ponghahhen hapeüthü nyuteke.

⁴ Shejao Kahvang, üpa phahjipü kü shemmei nyüpa, büpa bampü longpü mepai jen kü büpai bam, ha homei,

⁵ mechem jen pungpü homei diyei nyupa, Khrista mü chemi yangei leishihpeihphahjipai am yangpeih;

⁶ hatü büpa mü jen yangei leishih, hatü vangsholei Khrista Jisu kü büpa mü uohüpeih.

⁷ Hanangkü ngoikahen denthü kü Khrista Jisu kü büpai jen kü bampü shetei neaokpü büpalei phahji mop huphahen.

⁸ Mehenangkü phahjipai hinglempü homei am yangpeih, hatü hayü ammei lakdou nevai; hayü Kahvangei thintho;

⁹ üpaiyao nechangmeihen nangkü hayü dou kübü vampü nevai.

¹⁰ Mehenangkü jenphongü büpai mehe ling, ha hih, jeni dükhen shingvaishi Kahvangi yeihshi mebü Khrista kü doumei shingvaishi jen lingpeih.

Khrista kü Hük Leipü

¹¹ Hanangkü hangkulei laki phai kü japtükpü shei epüthüi amphong kü chem hepak kü nyübüh-i Kung am “Nejaptükpüthü” shei nyükei nyupü deihtuh.

¹² Am hahepak keyü Khrista neshiü, Israel bühü kü neompü benha, vangpüshuwpü kü hean neshiüpü am, monglem neshiü, hatü kahdoknyü kü Kahvang neshiüi nyuhampeih.

¹³ Shejao shaang am chem yanei lüdaipü Khrista Jisu kü Khristalei iy homei yopailei müei leipeih.

¹⁴ Mehenangkü büpayü jenei chingmei; büpalei phai kü khong nyiphen hük leihü, hatü baong hanpü lappai, jen aa kü ve kei nyupü bham bentükpeih.

¹⁵ Büpai shahkungnyü mü halei dükhen epü hatü vanglemthü yaktükpeih; hapai nyi nyupü chingmei lingei laophü kü hangku ja hük lingei leipeih,

¹⁶ hatü shophang homei dehilao dihüei khong nyiphen Kahvang mü mongjemhüpeih.

¹⁷ Hanangkü büpa peiyei am taishi yandaipüthü hatü yoshi nyupüthü kü chingmei baongpeih;

¹⁸ Hanangkü jen khong nyiphen Laangha hük kü Pa touei peiaoknyeih.

¹⁹ Hanangkü am hajük kü yenpa hatü benhapa nevai, shejao amphongü daülangpüthü mü bühü hatü Kahvangei shem am mü nanglakthü.

²⁰ Amphongü phongshanthü hatü thihivamthü chongnyiam shangkü lingpeih; Khrista Jisu büpa nyingi shemshouk kübü shongnyü yaong leipeih.

²¹ Büpa kü düklingyangyeü kemei shenshi nyüke hatü Shembüpa kü daülangpü phopshem hük leinyüke;

²² büpa kü amphongao Kahvang shingvaishi nyushing hük leiyei laangha kü chemi lingteke.