EPHESIA 1 - DAÜLANGPÜ LAIHING (BSI)

Selam Shah

¹ Kahvangi mongpü homei Jisu Khristalei phongshan Pauli Ephesialei nyupü daülangpüthü hatü Khrista Jisu kü hinglempüthü touei:

² Kahvang, jenei Pa hatü Shembüpa Jisu Khrista leipü phahji hatü chingmei nyute.

Khrista kü Laangha Moihimanthü

³ Jen kü vangsho nyuichingei Khrista kü lemphü laangha moihiman shuohpü Kahvang hatü Shembüpa Jisu Khristalei Pa men longtuh.

⁴ Mehenangkü büpai kahdoknyü lingshekü büpa touei daülangi hatü eela neshiüi bampü kü nyuhen shingvaishi jen jepeih.

⁵ Jisu Khrista homei büpai mong hahpü hatü mongpü aimü büpalei hapeüthü vaishi ungei yahhen yeihshi mebü büpai jen jepeih.

⁶ Büpalei müknyinshekhang phahji hatü büpai bampü Ha kü jen kü ang kübü thintho shuohpü shingvaishi Kahvang men longshah.

⁷ Büpai jen kü shuohpü büpalei phahji mop shangshi büpalei iy homei büpa kü jen angei leipü hatü mang tükpü nyüpeih.

⁸ Kihikon hatü nyingpü peü kü,

⁹ büpai Khrista kü mong hahpü aimü büpai mongpü shahjo jen kü nyinghüteke.

¹⁰ Hapa küpjanü mechem ha vamhen hepak ngoihenshang, Khrista shangjing vaitepü büpa kübü douthü, vangsho hatü kahdoknyü kübü douthü kemei thailanghen.

¹¹ Büpalei shahnying hatü mongpü aimü douthü peü jiühüei büpalei mükhong aimü jenphong jeyei yahpai Khrista kü jenphong mükjüp yahpü am leihüteke.

¹² Shejüang jenphong üam Khrista kü shongei monglemhen nyüpa, büpalei müknyinshekhang kü vihei jen nyuhen.

¹³ Mechem ammi shahhing shah, am yemleipü shahjangmei danpa, hatü büpa kü ammi hinglempa, büpa kü amphongao lahtükpü Laangha Daülangpai füoshang shüngteke.

¹⁴ Kahvangi jelangpü büpalei nanglakthü anglanghen mangngoi thahshi hapayü jeni danghen nyupü mükjüp khüamei vangpüshuwpü hük nyüke. Jeni büpalei müknyinshekhang kü vihshah.

Pauli Phoppü

¹⁵ Ammi Jisu Khrista kü hinglempü hatü daülangpüthü peü kü bampü jung ngei dantepih. Ha shojung kü,

¹⁶ ngei phoppü kü am deih-ei am shingvaishi menvih shuohpü nedohnyih.

¹⁷ Am büpa touei peishingkü kihikon, laangha hatü shakei vampü am kü shuohhen shingvaishi jenei Shembüpa Jisu Khristalei Kahvang, müknyinshekhangpü Pa kü ngei phopnyüpeih.

¹⁸ Shejüang ammei mongdang mük apei mepa monglem shingvaishi büpai am nyük, daülangpüthü khongkü büpalei müknyinshekhang mükjüp mop mepa nyu,

¹⁹ hatü jen hinglempüthü shingvaishi büpalei ngan longpai dou dükpü aimü shetei neaokpü büpalei longpü ngan mehe nyu, ha nyingaokhen.

²⁰ Mechem büpai dipü kübü büpa yangei leishihpa hatü vangsholei büpalei lakdah philei uohüpa, Kahvangi hapa nganü Khrista kü dükhen shihshuohpeih,

²¹ hapayü shahkung hatü vanglem lempü, ngan hatü ongching peü shak kü hatü men menpü lemphü shak kü hapa den kü mon nevai, shejao ngoikahen den kao ha shuohpeih.

²² Büpai dou peü büpalei la phangei tuhpeih, hatü attoi mepa büpalei büm nyüpa, ha shingvaishi büpai büpalei dou peü kü shangjing leihüpeih,

²³ büpa peü philei peü shak kü maei nyüke.