DANIEL 9 - DAÜLANGPÜ LAIHING (BSI)

Danieli Phoppü

¹ Media am Xerxeslei cheha Darius Babylon ongching kü ong vaiteke.

² Büpai ong vaipü shongpü bong kü Shembüpai Jeremiah thibü kü Jerusalem bong pejempüan lavüngtoiyei yakphonghen shei epü nang ngei, Danieli daülangpü laithü kü yemei nyu.

³ Hanangkü ngei Shembüpa Kahvang touei lepei leiyei büpa kü phopei, khümei, shüaeiyungleyei hatü dhoila ashak ümtü, depla nyiotü phop.

⁴ Ngei, Shembüpa ngelei Kahvang kü phopei hatü mang lahteke: “Oh Shembüpa, longpü hatü nyempühanpü Kahvang. Üami nüng kü bamnya hatü nüngei shahkungnyü ven bangnya, nüngi hathü kü vangpüshuwpü hatü bampü nedoh-i nyunyüke;

⁵ hami mang thahteke hatü nejiüpü düktükteke. Ham ahshi-üng nemei hatü nüng kü khüteke; nüngi kangpü douthü yakphongtü ham lemnyong kü lüdaiteke.

⁶ Nüngei men kü hamei ongthü, hamei longthü hatü hamei bühipathü hatü kahmük kü nyupü nanglakthü kü nüng chongphopü thibüthüi epü shah hami nebang.”

⁷ Oh Shembüpa, nüngü daülangpü, shejao shinnyih hamü veüi jümtü nyüpeih– Judah shennyakthü hatü Jerusalem nanglakthü yopailei hatü tailuei Israel nanglakthü kung kahdokei nüngi haitükpeyü jomi nüng kü hingnelempü nangkü khih.

⁸ Oh Shembüpa, hamei ongthü, hamei longthü hatü hamei bühipathü veüi jümtü nyüke; mehenangkü hami nüng khüei mang thahteke.

⁹ Hami büpa khülangmao Shembüpa, hamei Kahvangü phahjipü hatü mang tükpü nyüke;

¹⁰ hamphongi Shembüpa, hamei Kahvangi büpa chongphopü thibüthü homei ham kü shuohpü shahkungnyü nebang.

¹¹ Israel am peüi nüngei shahkungnyü kü pungteke, hatü nüngei shah nebanghahhüei lemnyong kü lüdai. Hami nüng khüei mang thahpü nangkü nüng chongphopü Mosa homei shuohpü shahkungnyü kü nyangei nyupü thaüvaü kemei ham kü hetteke.

¹² Nüngi ham hatü hamei vanglem lembüthü khüei dükhen shei epü shahthü peü ham kü shangpong longpü shuohpai jiüteke, hatü mepa Jerusalem khüei nyüpa, hapa keiha vangsho phangkü mechemao nedükangpih.

¹³ Mosa shahkungnyü kü nyangei nyupü hanghi kemei ham kü hetteke, shejao hamei mang kübü mong lepei, nüngei shahhing phei müei Shembüpa, hamei Kahvang bampü yemei nelei.

¹⁴ Hanangkü Shembüpai ham kü hanghi shuohteke; mehenangkü Shembüpa Kahvangi dükpü lemphüli jiüpü nyüke; shejao hami büpalei ven nebang.

¹⁵ “Shaang, Oh Shembüpa, nüngei laklu wong longpai ham Ijip leipü mülangpü hatü shinnyih thahshi nüngei men nemahnechah-i tuhpü Kahvang, hami mang thahteke, hatü hami nejiüpü dükteke.

¹⁶ Oh Shembüpa, peihdaipü hepak kü nüngi dükpü daülangpü douthü keiha, nüngi Jerusalem chingnyü kü, nüngei daülangpü kahshang kü hamei mang hatü bühipa ami pungpü nangkü nüng mongshihpü yahlangshihma. Mehenangkü hami mang thahpü nangkü chingyowyüpi jatthü touei ham hai dangteke.

¹⁷ Hanangkü shaang, Oh hamei Kahvang, nüng chongphobüi phoppü hatü phepü kü bangshih, nüngei men kü, Shembüpa, nüngei Phopshem bentükpü kü phahjiei veitü lingei leishihma.

¹⁸ Nüngei dhaong shaangshih, Oh ngelei Kahvang, hatü banglangshih. Nüngei mük vamei nüngei men epü chingnyü bentüklangtükpü kü veituh. Hami nüng kü phepeyü ham daülangpü leipü nangkü nevai, shejao nüngei phahji longpü nangkü phenyüpeih.

¹⁹ Oh Shembüpa, banglangshih; Oh Shembüpa, mang tükshih; Oh Shembüpa, bangtuh hatü dou dükshih; Oh ngelei Kahvang, tepheidai; mehenangkü nüngei chingnyü, nüngei nanglakthüi nüngei men enyüpeih.”

Hapta Pejempüan

²⁰ Mechem ngei shah eyei, phopei, ngelei mang hatü ngelei nanglakthülei mang lah-ei, hatü Shembüpa, ngelei Kahvang kü büpalei daülangpü Phopshem nangkü ngei phopei nyupa,

²¹ ngei shelei manghkhang kü eepü Gabriel, ombaong kü moila shuohpü hepak kü ngei touei piyei shühküteke.

²² Büpai ngei kü, “Daniel, ngei nüng kü nyingaok danaokhen kihikon shuohhen peiküpeih” shei ephüteke.

²³ “Mechem nüngi Kahvang kü phopei chongpangpa, büpai nüng kü jangteke. Büpai nüng kü longi bamnyüke, hatü ngei nüng kü ha ephahen peiküpeih. Ngei nüng kü ha nih-ei ephüshingkü mong shuohtuh hatü manghkhang nyinghahtuh.”

²⁴ Hapta pejempüanü nüngei nanglakthü hatü ammei chingnyü mang dükpü kübü dohdaihen, mang mahtükmentükhen, mang yaktükhen hatü nedohnetenpü daülangshemshepü hatü shahhing koei peihen, manghkhang hatü thihivam shah dhaümhen hatü daülangpü Phopshem thiteiphuei daühen shingvaishi epü khih.

²⁵ Hapa nyingtuh: Jerusalem lingei leihen ngeükhüam shuohpü hepak mebü thiteiphutükpü ongpa peipü thahshi hapta nyet nyukahen; hapta pejempünyi kü Jerusalem chingshongthü hatü veyomshing ne-yei linghen shejao hapayü shangpong yakyingpü hepak vaikahen.

²⁶ Hapta pejempünyi peihpheikü, thiteiphutükpü ongpayü jütükhen hatü meheyao neshiühen, hatü peikahen nyupü ongpalei veshanthüi chingnyü hatü Phopshem mangtükhen. Dohpütenpeyü bünghiyang kei peikahen hatü dohpü ngoishi vehok nyukahen.

²⁷ Hapa ongpai hapta hük shingvaishi shennyak longi mü vangpüshuwpü linghen hatü hapa hapta hükkei shing daishi büpai jakpü moila hatü moilathü dohtükhen; hatü hathü shing nangjeiyei benpülangpü shuohpübai büpa shing temtükpü dohpütenpü mangngoi thahshi Phopshemei jiühitnalaibenüng tuhhen.