DANIEL 6 - DAÜLANGPÜ LAIHING (BSI)

Daniel Mailang Khok kü

¹ Darius-i büpalei ongching kü vanglem lemhen shingvaishi governorthü kho hük mü kukha jehen temteke.

² Governor shak kü dousho kü veihen hatü ongpa kü sheühhen shingvaishi Daniel mü lebü nyi shei vanglem lembü jeteke.

³ Meshük ne-angi büpa mü vanglem lembü nyi hatü governorthü mü hayaoha nyeinya doumei dükpü eeyei ongpai ongching kempü kü büpa kheipa vaiyei dükhen temteke.

⁴ Ha nyingei, vanglem lembü nyi hatü governorthü peü Danieli ongching kü dükpülingpü lemphü kü mang yephen lem yem, shejao jomi büpa kü shaipü pungpü meheyao neyepaok; mehenangkü büpayü shahhing epü, nehetnewongi nenyupü nevaijü meheyao ten neshiüpü shennyak nyuteke.

⁵ Hahepak kü jomi, “Büpai vaipü vanglem phikü nevaiphei keyü hapa shennyak, Daniel vüshihhen lem nedangshasha khih” shei etei.

⁶ Hanangkü vanglem lembüthü hatü governorthü khong lingtü ongpa touei peiyei, “Oh Ongpa, nüng yangnyu shoshoshi nyutuh!

⁷ Nüngei ongching kü vanglem lembüthü, governorthü, lieutenant governorthü hatü lebü lakchongbüthü kemei shah shetteke, Oh Ongpa, nüng kü nevaiphei kü üpayao nyih hapüan mongkü lebü kahvang kü nevaijü shennyak kü nephophen. Üpai hapa shahkungnyü shaihenshang mailang khok kü yepei shüktükhen shei wong kohshi shahkung yankütuh.

⁸ Shaang, Oh Ongpa, hapa shahkung yankütuh; Media hatü Persia shahkungnyü neyeiyapükei neyeiyaaokhen mü nyangei yankütuh” shei eteke.

⁹ Hanangkü Darius ongpai shahkungnyü nyangei yan.

¹⁰ Shaang, mechem Danieli shahkungnyü yanteke shei danpa, büpa shemei leiyei büpai düngei phopteipükei shem jaandokei aongei Jerusalem phi kübü ümha shadenthü aptü nyih kü jempa jempa aümei shaei büpalei Kahvang kü phop hatü menvih shuohteke.

¹¹ Mechem Daniel kü küphüthü peiyei veipa, büpai Kahvang kü phahji yüei phopei nyupü eeteke.

¹² Hahepak kü jomphong ongpa touei peiyei shahkungnyü yanpü nang eteke: “Oh Ongpa, nyih hapüan mongkü, nüng kü nevaipheikü üpaiyao mehe kahvang kao nevaijü üpa shennyak kao nephophen, üpai ha nebanghen, mailang khok kü yepei shüktükhen shei nüngi shahkung neyanangpü je?” Ongpai, “Hih, shahkung wongshongi shuohtepih; Media hatü Persia shahkung mechemao neyeiyaaokhen” shei eteke.

¹³ Hahepak kü jomphongi ongpa kü, “Judea am wüpküpei nyupü khongkü shennyak hük, Daniel, büpai dhüm neshuohnyu nevaijü nüngei shahkungnyü nebangnyu, Oh Ongpa, büpai düngei nyih kü jempa jempa phopnyüke” shei jang.

¹⁴ Mechem ongpai ha danpa, büpa longi mongmang hatü vanghe mangshü thahshi büpai Daniel yanghen lem yemteke.

¹⁵ Hahepak kü ongpa touei shennyakthü peiyei büpa kü, “Oh Ongpa, Media hatü Persia amei shahkungnyü ai meyü, ongpai yanpü shahkungnyü yeiyahen neaok” shei e.

¹⁶ Hahepak kü ongpai Daniel yephen ngeükhüam shuoh hatü büpa mailang khok kü yepei shükshuohteke. Ongpai Daniel kü, “Nüngi lanei shuoh-ei chongphopü Kahvangi nüng nyemyangpha!” shei eshuohteke.

¹⁷ Hanangkü Daniel shingvaishi meheyao yeiyaei yanglem nevamhen shingvaishi mailang khok shaden kü yaongba hük küp, hatü ongpai yaong shangkü büpalei füoshang shingteke.

¹⁸ Sheyü ongpa shemei leiyei neshinechongi, hatü meheyao nehahneyingi vangnyak paümteke.

¹⁹ Vangngaisho kü ongpa paoei mailang khaokei mokei heih.

²⁰ Mechem büpa mailang khok ngoipa, büpai mongshangei Daniel kü wongmü lenei, “Oh Daniel, vanyangyem Kahvang chongphobü, nüngi lanei shuoh-ei chongphopü Kahvangi nüng mailangthü kübüao yangphaaokpü je?” shei e.

²¹ Hahepak kü Danieli ongpa kü, “Oh Ongpa, nüng yangnyu shoshoshi nyutuh!

²² Mailangthüi ngei kü neshükhen shingvaishi ngelei Kahvangi büpalei vangsho phongshan shomei jomphongei ju kümtükpeih; mehenangkü ngei büpa touei mang neshiü, hatü nüng toueiyao pungpü neshiüpü nangkü büpai hapa dükpeih, Oh Ongpa” shei e.

²³ Hahepak kü ongpa longi mongong hatü mailang khok leipü Daniel yah-ei ngaihen ngeükhüam shuoh. Hanangkü jomphongi Daniel mailang khok leipü ngaiteke; Danieli Kahvang kü hinglempü nangkü meleiyao makaw ne-ee.

²⁴ Hahepak kü ongpai Daniel nyonghüpüthü peü yephen ngeükhüam shuoh, hatü jomphong peü jomei chenyühathü, hapeüthü mü mailang khok kü yepei shükshuohteke. Jom chongao mangngoi-i mailangthü laongei shükteke hatü vangao khih mü shaaitükteke.

²⁵ Hahepak kü Darius ongpai kahdoknyü kübü jatphüliphü kü shahlem laolao epü peü touei hapakei nyangteke: “Amphong mü moihiman nyutuh, selam!

²⁶ Ngei hapa shahkungnyü yannyüpeih; ngelei ong ongching kü nyupü nanglak peü Danielei Kahvang kü nyemtuh hatü dhüm shuohtuh: ‘Mehenangkü büpayü vanyangyem Kahvang nyüke, hatü büpai denden vanglem lemkahen; Büpalei ongching mechemao nemahhen, büpa vanglem lempü dohpütenpü neshiüküpih.’

²⁷ Büpai hunglangtü yangnyüpeih; büpai vangshothü hatü kahdoknyü kü nyangeihepü, hatü yashanyale dou düknyüke. Mailangthüi Daniel jütükhen kübüao büpai yangteke.”

²⁸ Hanangkü Darius-i vanglem lempü hatü Persia am Cyrus-i vanglem lempü hepak kü Daniel men-e shennyak leiteke.