DANIEL 5 - DAÜLANGPÜ LAIHING (BSI)

Bhamba kü Nyangpü

¹ Belshazzar ongpai büpalei chinglong chingvang haja longi nyükei mo longpü üh, hatü büpa jomphong mü yiü yingei nyuteke.

² Yiüi meüei, Belshazzari chepa Nebukadnezzari Jerusalem Phopshem leipü yah-ei leipü hon hatü ngini lingpü yungshongthü kü büpa hatü büpalei chinglong chingvangthü, büpalei nyühathü hatü yiükphüthüi hathü shong kü yiü yinghen deikei shei ngeükhüam shuohteke.

³ Hanangkü jomi Jerusalem leipü Kahvangei Phopshem leipü hon yungshongthü yah-ei dei, hatü ha kü büpa hatü büpalei chinglong chingvangthü, büpalei nyühathü hatü yiükphüthü peüi yingteke.

⁴ Mechem jom yiüi chokkempa, jomi hon, ngin, melangnyiam, nyiam, pü hatü yaongi lingpü kahvangthü men long.

⁵ Ngangahük kü hangkulei lak hük vamei ongshemei awdük ngenpü touei bhamba kü nyang. Ha laki nyangshingkü ongpai veiteke.

⁶ Büpalei dhe haiyei büpa longi nyempai büpalei lashüh kheüei kaongteiteke.

⁷ Ongpai thibüthü, lashüh tetpüthü, lithilen tetpüthü hatü phongyompüthü müei deikei shei len. Mechem jomphong peijapa, ongpai jomphong kü, “Üpai ha nyangpü ieyei aokhen hatü hapa lappü ngei kü tetei ephahenshang, büpa kü ongow owhühen, hatü büpalei üng kü honyük üngkam baongei yükhühen hatü büpa ngelei ongching kü jempabü uoshing kü uohühen” shei eteke.

⁸ Hahepak kü ongpalei nahpülangpü shennyakthü peü peiteke, shejao üpaiyao ongpa kü hapa lappü nih-ei ne-eshuoh-aok.

⁹ Hanangkü Belshazzar ongpa longi nyemei büpalei dhe nyeinya haiteke. Büpalei chinglong chingvangthüi mehe dükhen ai mah-ei nyu.

¹⁰ Onglanyüi ongpa hatü büpalei chinglong chingvangthülei ngeü danei mo hahshingei heih. Pinnyüi eteke, “Oh Ongpa, nüng yangnyu shoshoshi nyutuh! Nüng mong teshangkei, hatü nüngei dhe tehaikei!

¹¹ Nüngei ongching kü daülangpü kahvangthülei laangha kohpü shennyak hük nyüpeih. Ampa hepak kao kahvangthülei kihikon keiha büpa kü yao-aokpü, danaokpü hatü kihikon kohshi nyuhampeih. Nüngei pa Nebukadnezzar ongpai büpalei thibüthü, lashüh tetpüthü, lithilen veiyei tetpüthü, hatü phongyompüthü shak kü longpü vaishi büpa tuhhampeih.

¹² Mehenangkü Daniel, üpa kü ongpai Belteshazzar shei nyük, büpayü nyingpühingpü, mangh tet-aokhen kon, neyaoaokbenüng yaoei nih-aokpü hatü mongshang peü nyingei eaokpü shennyak hük nyuteke. Shaang Daniel kü nyüktuh hatü büpai nüng kü ha lappü tetei ephahen.”

Danieli Bhamba kü Nyangpü Tetei Epü

¹³ Hanangkü ongpa touei Daniel müei dei hatü ongpai büpa kü, “Nüngü ngelei opa, ongpai Judah leipü wüpküpei müei leipü Daniel je?” shei phe.

¹⁴ “Nüng kü kahvangthülei laangha hatü yaoaokpü, danaokpü hatü nyeinya kihikon nyüpüja shei ngei danpeih.

¹⁵ Ngei nahpülangpüthü, lashüh tetpüthü peü hapa nyangpü ngei kü nih-ei nyem-epha shei nyükpeih shejao üpaiyao hapa tetei ne-ephaaoknyu.

¹⁶ Nüngi mongshang lemphüli hatü shahjo peü tetei eaoknyuja shei ngei shaang danpeih. Nüngi hapa nyangpü ietü hapa lappü nih-ei apha-aokjema, ngei nüng kü ong ow owphahen, hatü üngkam baongei honyük yükphahen, hatü nüngü ongching kü jempabü longpü leihühen.”

¹⁷ Hahepak kü Danieli ongpa kü, “Nüngei thinthothü nüngi tuhhahtuh nevaijü hanei am kü yah-eishuoh. Shejoong ngei ongpa kü nyangpü ieshah hatü ha mehe lappa, ephüshahma” shei jangei e.

¹⁸ Oh Ongpa, Jaipüba Kahvangi ampa Nebukadnezzar kü ongching hean, longhiong leihen müknyinshekhang lemphü shuohpeih.

¹⁹ Büpa kü hapakei shaopü uoshing yahshuohpü nangkü nanglakthü hatü jatthü peü hatü shahlem laolao epü shennyakthü peüi büpa kü nyemei kheühampeih. Büpai jütükhüpüthü jütük; yemmü tuhhüpüthü yemmü tuh; büpai uoshing dokpalei anshuohhüpüthü nevaijü vütükhüpüthü kü büpai mongpükei dükhampeih.

²⁰ Shejao mechem büpa changmeiyei, mong vaanei nemei-i leipa, büpa ong uoshing kübü changtük, hatü büpalei dhüm hi ngan ngühlangpeih.

²¹ Büpa hangku noknyü khong kübü changtük, hatü büpa kü yemhimakei thentoimongdang shuoh; büpa phaü gaduthü mü nyu, hatü mohoh kei phenha hah, hatü büpalei büm vangsho nyien kü haaishi, Jaipüba Kahvangü hangku ongching kü Jeiyong hatü büpai jepüthü kü hapa ongching shuohnyeih shei nyingei mangpei thahshi hapakei nyuhampeih.

²² Shejao büpalei hapeü, nüng, ha jung peü nyinglangmao nüngi laophü nyingi nenteiaokei maanpü neleinyu.

²³ Ha nang jeiyei, nüngi laophü nyingi vangsho Kahvang khüei yaongnyüke. Nüngi büpalei Phopshem leipü yungshongthü yah-ei nüng hatü nüngei chinglong chingvangthü, nüngei nyühathü hatü nüngei yiükphüthüi hathü kü yiü yingteke. Nüngi hon hatü ngin, melangnyiam, nyiam, pü hatü yaongi lingpü mük ne-eepü, nevaijü nedanpü nevaijü nenyingaokpü kahvangthü men longteke. Shejao Kahvang, üpalei laki nüngei yangnyu hatü nüngei lemthü shümshi nyüpa, büpa kü nüngi dhüm neshuoh.

²⁴ Hanangkü Kahvangi hathü shah nyanghen büpalei lak yiüpeih.

²⁵ “Nyangpeyü hapa khih: MENE, MENE, TEKEL, PARSIN

²⁶ Ha shahthü lappeyü ha khih: Mene: Kahvangi nüngei ongching nyihthü ieteke, hatü dohpütenpü yah-ei peiteke.

²⁷ Tekel: Nüng dok kü dokteke, shejao dok ne-aongang.

²⁸ Peres: Nüngei ongchingü hantü Media hatü Persia am kü shuohtükteke.”

²⁹ Hahepak kü Belshazzari ngeükhüam shuohpü nangkü Daniel kü ong ow owhüteke, honyük hük üngkam baongei yükshuohteke, hatü ongching kü büpa jempabü longpü leihü.

³⁰ Ha ya-üng Babylon ongpa, Belshazzar jütükteke,

³¹ hatü Media am Darius ongpai nyübüh vangbong pejempünyi nyushi hapa ongching aetlangteke.