DANIEL 4 - DAÜLANGPÜ LAIHING (BSI)

Nebukadnezzari Pü Hük Mangh kü Eepü

¹ Nebukadnezzar ongpai kahdoknyü kü nyupü nanglakthü, jatthü hatü shahlem laolao epüthü peü touei hapa selam shahjang shomnyeih; am longi angeideiyei nyutuh!

² Jaipüba Kahvangi yashanpü nyangeihepü hatü thamapü ngei kü huphopü ha jung amphong kü ephüshah.

³ Büpalei yashanyale meshük longpüang! Büpalei thamapü dou mekei wong kohpüang! Büpalei ongchingü nedohnetenpü ongching nyüke; büpa vanglem lempü hüdenhalenshi nyuhen.

⁴ Ngei, Nebukadnezzar, ngelei ong shemei mophimo shangkü hüshemei nyuteke.

⁵ Ngei mangh hük manghpai nyemhüteke. Ngei ngelei lüngei lemshi nyushingkü nyembenüng manghkhang hük ngei eeteke.

⁶ Hanangkü ngei Babylon am tetpüvanpü shennyakthü peü ngei touei peiyei ngei kü mangh lappü tetei nyem-epha shei ngeükhüam shuohteke.

⁷ Mechem thibüthü, lashüh tetpüthü, lithilen veiyei tetpüthü hatü phongyompüthü thaiküpüshang, ngei jomphong kü mangh ejateke, shejao üpaiyao ngei kü ha mangh tetei ne-ephaaok.

⁸ Shomshi, Daniel, (üpa kü Belteshazzar shei ngelei kahvangei men menpa, hatü daülangpü kahvangthülei laangha büpa kü nyüpa) ngei touei peiküteke, hatü ngei büpa kü mangh ejateke.

⁹ Ngei eteke, “Oh Belteshazzar, thihivamthü khongkü longpüba, daülangpü kahvangthülei laangha nüng kü nyüke, hatü nüng shingvaishi shahjo nyinghenü wongpü nevai shei ngei nyingnyüpeih. Ngei manghpü mangh-ü ha khih. Ngei kü ha mangh tetei eshih.

¹⁰ Ngei lüngei lemshi nyushingkü eepü manghkhangü hapa khih: Ngei veishuohshingkü, ngei shekü kahdok jiam kü pü hük eeteke, hatü hapa longi shaoshi shiüteke.

¹¹ Hapa vangsho kü shongshi, wong kohpüba kohpüba longteke, hatü kahdoknyü kübü peüi eeaokhen mü nyuteke.

¹² Hapalei phenlak longi veihen meishi, hapa kü betjük longi jükshi– kahdoknyüi hahhen changshi shiüteke. Phaüyemthüi hapa püdhüm kü nyiumei, ouhiyüh-i hapa pükaothü kü jep lingteke, hatü yemhimak lemphüli hapalei betjük hahteke.”

¹³ Ngei mechem lüngei lemtü manghkhang jung deih-ei nyupa, phongshan hük, thamashi, vangsho leipü yiükei-ei eeteke.

¹⁴ Büpai ngeüwong anei lenteke: “Hapa pü agtüktuh, hapalei kaothü langtüktuh, hapalei phenlak kaongtüktuh, hatü betjük haitüktuh.

¹⁵ Shejao püchong hi tünglang nyi nyiam hatü melangnyiami shatü kahdokei thüng chi kü tuhphongtuh. Büpa vangsho nyien kü haaishi nyuhütuh, hatü büpa phaüyingei yemhimakthü mü nyuhütuh.

¹⁶ Büpa kü hangkulei thentoimongdang jeitüktü yemhimakei thentoimongdang yah-eishuoh, hatü vangbong nyet hapakei peihhütuh.

¹⁷ Hapa baong hanpeyü phongshanthü, hatü hapa shahphenü Daülangpü Hüki shuohpeih. Shejüang hangku yem nyunyui Jaipüba Kahvangü hangku ongching peü kü Jeiyong; Büpai büpa jepüthü kü shuohnyeih, hatü peü mü maanpü hangkuthü kü shuohnyüpeih shei nyinghen.”

¹⁸ Nebukadnezzar ongpai, “Hapayü ngei kü manghpü mangh hih” shei e. “Belteshazzar, shaang nüngi ngei kü hapa mangh lappü tetei eshih; mehenangkü ngelei ongching kü üpa nahpülangpü shennyakiyao ngei kü hapa tetei ne-ephaaoknyu. Shejao nüngi payü ephaaokhen; mehenangkü daülangpü Kahvang laangha nüng kü nyüke” shei e.

Danieli Mangh Tetpü

¹⁹ Hahepak kü Daniel (üpa kü Belteshazzar sheiyao nyüknya) kansho hük longi üaei shah ne-e-i nyu. Hahepak kü ongpai, “Belteshazzar, hapa mangh hatü hapa lappai nüng tejü-ü” shei e. Belteshazzari jangei, “Ngelei shembü, hapa mangh hatü lappü kemei nüng kü nevai; nüngei vepathü kü nyemjiüdai shei deihnyüke!

²⁰ Nüngi mangh kü eepü pü, mepa longshi hatü wong kohshi, vangsho kü shongshi shaoshi, kahdoknyü peü philei eehen aokshi,

²¹ phenlak longi nethe meishi, betjük changshi jükei kahdoknyü kemei changshi hahsham, phaüyemthü kü püdhüm shuoh-ei, hatü ouhiyühthüi pükaothü kü jep lingei eepa,

²² ha püyü Oh Ongpa, nüng khih! Nüngü longi shaoshi hatü wong kohshi longteke. Nüngü vangsho kü shongshi longteke, hatü nüngei nganhiwong kahdoknyü peü philei daiteke.

²³ Oh Ongpa, mechem nüngi veishi nyupa, vangsho leipü vangsho phongshan hük yiüei, ‘Hapa pü agtüktuh, hatü khih mü haümtüktuh, shejao püchong payü nyiam hatü melangnyiami shatü kahdokei thüng chi kü tuhphongtuh, hatü tünglangü kahmongei tuhphongtuh. Bong nyet mangpeih thahshi büpa vangsho nyien kü haaishi nyuhütuh, hatü büpa phaüyemthü kei nyuhütuh’ ” shei eteke.

²⁴ “Hapa lappeyü ha khih, Oh Ongpa, hatü ongpa, nüng khüei hapa vamkahen shei Jeiyong Kahvangi eteke:

²⁵ Nüngü hangku noknyü khong kübü changtükhen hatü phaüyemthü mü nyuhen; nüngü mohoh kei phenha hahhen hatü chingshongei nyien kü haaishi shihen. Nüngi Jaipüba Kahvangü kahdoknyü hangku ongching kü Jeiyongpa, hatü büpai jepüthü kü hapa ongching shuohnyeih shei nyingei mangpei thahshi vangbong nyet nüng hapakei nyuhen.

²⁶ Püchong hatü hapalei tünglang tuhphonghen epü lappeyü mechem nüngi, Kahvangi kahdoknyü kü vanglem lemnyeih shei nyingei peihenshang, nüng kü ong hean shao nyokei shuohhen.

²⁷ Hanangkü, Oh Ongpa, nüngi ngei epü yahtuh. Mang dou dükpü dohtuh, jiüpü düktuh, hatü nehahneyingpü taopathü kü yahyang shinshang hutuh. Shejüang nüng nedoh-i angeideiyei nyuhen.”

Mangh Dhaümpü

²⁸ Ha peü kemei Nebukadnezzar kü jiüteke.

²⁹ Lenyang anpünyi mon angpheikü Babylon ongshem adokei kamteiyaki,

³⁰ büpai ehahteke, “Veituh, ngei müknyinshekhanghen shingvaishi ngelei wongi lingpü nyangnyangtoptoppü ong chingnyü meshük longpüang?”

³¹ Mechem ha shahthü ongpalei ju mongei nyupa, vangsho leipü ngeü hük vamei eteke, “Oh Nebukadnezzar Ongpa, nüng kü ha enyüke: Ong ongching nüng kübü yandaiteke.

³² Nüngü hangku noknyü khong kübü changtükhen hatü phaüyemthü mü nyuhen; nüngü mohoh kei phenha hahhen. Nüngi Jaipüba Kahvangü kahdoknyü hangku ongching kü Jeiyongpa, hatü büpai jepüthü kü hapa shuohnyeih shei nüngi nyingei mangpei thahshi bong nyet nüng hapakei nyuhen.”

³³ Nebukadnezzar nang mehe epa, ha lomi jiüteke. Büpa hangku noknyü khong kübü changtük hatü mohoh kei phenha hahteke. Büpalei büm vangsho nyien kü haaiteke, büpalei hangha kü alang kü kei mum vam, hatü ou kü kei lakdhen ladhen luteke.

Nebukadnezzari Kahvang Menlongnyüke

³⁴ Mechem vangbong nyet peihpa, ngei, Nebukadnezzar vangsho philei ngangei vei, hatü ngei kü deih-aokhen chudeih peiküteke. Ngei Jaipüba Kahvang kü men long hatü denden nyupü büpa kü dhüm hatü müknyinshekhang shuohteke. Büpa vanglem lempü denden kü nyuhen, büpalei ongching hüdenhalenshi nyuhen.

³⁵ Büpai kahdoknyü hangku kemei kü kong kei veinyüke. Büpai vangsho phongshanthü mü hatü kahdoknyü hangkuthü mü büpai mongpü düknyüke. Üpaiyao büpalei lak shonglanghen neaok, nevaijü, “Nüng mehe düknya?” shei phehen neaok.

³⁶ Ngei kü bümei chudeih peipü mü chemi ngelei dhüm, ngelei nganhilong, hatü ngelei ongching müknyinshekhang nyokei leiküteke. Ngelei lakchongbüthü hatü nyümei pamei peüi ngei mongongshi yah, hatü ngei ngelei ong uoshing kü sheleipü mao nyeinya dhüm kohpüba kü ongching nganhilong yahphüteke.

³⁷ Hanangkü shaang, ngei, Nebukadnezzari vangsho ongpa kü men long, vihpülüpü hatü dhüm shuohnyüpeih; mehenangkü büpai dükpü lemphüli jiüshangi hatü büpalei lem shahhing nyüke, hatü büpai changmeipüthü maanpü leitüknyüke.