DANIEL 3 - DAÜLANGPÜ LAIHING (BSI)

Hon Lajei hatü Awbhaong

¹ Nebukadnezzar ongpai hon lajei hük shaopü kü feet 90, hatü ba kü feet 9 ling, hatü Babylon kahdok Dura Kahjilei shingnüngei tuh.

² Hapheikü ongpai ong naü-eethü, governorthü, lieutenant governorthü, shahnying ebüthü, lop jaobüthü, shahphenbüthü, vanglem lembüthü hatü büpalei lakchongbüthü peü büpai lingpü lajei daühen shingvaishi peihen nyükteke.

³ Hanangkü ongching kü lakchongbüthü hatü vanglem lempü hean peü kübü Nebukadnezzari lingpü lajei daühen peiyei hapa sheshalei yaong.

⁴ Hahepak kü lenbü hüki ngeüwong anei, “Oh jatphü kübü nanglakthü, mükhiphang laolao kübü hatü shahlem laolao epüthü!

⁵ Amphongi amit, liping, kongkoih, harp, phaam hatü lebü kesho lokpü hadir vüngpü ngeü danhinüng, am peü aümei shaei Nebukadnezzar ongpai lingpü hon lajei kü khümtuh.

⁶ Üpai hapa kü aümei shaei nekhümhenshang, hahepak kü-üng yepei bah-ei nyupü awbhaong kü shüktükhen” shei lenteke.

⁷ Hanangkü jomphongi kesho lokpü hadir vüngpü danhinüng, jatphü kübü nanglakthü, mükhiphang, hatü shahlem laolao epü nanglakthü peü aümei shaei Nebukadnezzari lingpü hon lajei kü khümteke.

Ven Lepü Nangkü Danieli Küphüthü Nyonghüpü

⁸ Hahepak kü Babylon am hanei-i Jehoda am nyonghühen peiteke.

⁹ Jomphongi Nebukadnezzar ongpa kü eteke, “Oh Ongpa, nüng den lushi nyutuh!

¹⁰ Oh Ongpa, nüngi ngeükhüam shuohteke; hapayü kesho lokpü hadir vüngpü ngeü danhinüng peüi hon lajei kü aümei khümhen,

¹¹ hatü üpai ha kü aümei nekhümhenshang, bah-ei nyupü awbhaong kü shüktükhen shei shahyan shuohteke.

¹² Shejao nüngi Babylon ongching kü chinglingbü vaishi tuhpü Jehoda am Shadrakh, Meshakh hatü Abednego hathüi, Oh Ongpa, nüngei ven lenyüke. Jomi nüngei kahvang chongnephonyu nevaijü nüngi lingpü hon lajei kü nekhümnyu.”

¹³ Mongshih wong kempai, Nebukadnezzari Shadrakh, Meshakh hatü Abednego kü nyükteke. Hanangkü jomphong ongpa touei müei dei,

¹⁴ hatü Nebukadnezzari jomphong kü, “Shadrakh, Meshakh hatü Abednego, amphongi ngelei kahvangthü chongnephonyu hatü ngei-i lingpü hon lajei kü nekhümnyu shei epeyü hingmei je? shei pheteke.

¹⁵ Shaang, ammi amit, liping, kongkoih, harp, phaam hatü lebü kesho lokpü hadir vüngpü danhinüng, aümei shaei lajei kü khümtuh. Shejao ammi hapakei nekhümjema, am peü shaang-üng yepei bah-ei nyupü awbhaong kü shüktükhen. Mepa kahvangi am ngelei lak kübü yangaokhenang?”

¹⁶ Shadrakh, Meshakh hatü Abednego hathüi ongpa kü, “Oh Nebukadnezzar, hapa nangkü shei hamphongi nüng touei yanglem linghahhen nadang neshiü.

¹⁷ Nüngi hamphong awbhaong kü yepei shükphülangmao, hamphongi chongphopü Kahvangi haleipao ham yangphaaokhen, hatü büpai nüngei lak kübüao yangphaaokhen hih, Oh Ongpa.

¹⁸ Shejao büpai hapakei neyangphüjao, Oh Ongpa, hamphongi nüngei kahvangthü chongnephohen hatü nüngi lingpü hon lajei kü nekhümpih shei nüng kü nyinghünyüpeih” shei jangei e.

Danielei Küphüthü Mahtükhen Temnyüke

¹⁹ Hahepak kü Nebukadnezzari Shadrakh, Meshakh hatü Abednego hathü kü mongshih, hatü jomphong nangkü büpalei chudeih yeiyateke. Büpai nyingnyoipü mü nyetpa shaamshi aw jakhen ngeükhüam shuoh,

²⁰ hatü büpalei veshanthü khongkü wong kohpüthü kü Shadrakh, Meshakh hatü Abednego yepei shatü awbhaong kü shüktükhen ngeükhüam shuoh.

²¹ Hanangkü veshanthüi jom jem kü bhagthuh, shüngthuh, shangshak hatü lebü owhiai peü owhütü yepei shatü awbhaong kü shükshuohteke.

²² Shaang, ongpai aw longi shaamshi jakhen ngeükhüam wong mü shuohpü nangkü, Shadrakh, Meshakh hatü Abednego hathü yepei shükpü shennyakthüao awlomi laiyei jüteke,

²³ hatü jom jemü yepei shatü awbhaong jiamei shükshuohteke.

²⁴ Hahepak kü Nebukadnezzar thamaei hantü yaong, hatü büpalei lakchongbüthü kü, “Jenphongi shennyak jem mon shatü awbhaong kü shükshuohpü nevaipü je?” shei phe. Jomphongi, “Hih, Oh Ongpa” shei jangteke.

²⁵ Shejemü, “Veihümao! Ngei shennyak ali awbhaongei kamteiyei, nesha-i hatü awyei-i dangkao nelai-i eenyüke, hatü alipabü-ü veiheni vangsho phongshan leshi eenyüke” shei e.

Jom Jem Awbhaong Leipü Vamnyüke

²⁶ Hahepak kü Nebukadnezzari awbhaong shadenei heih-ei, “Shadrakh, Meshakh hatü Abednego, Jaipüba Kahvang chongphopüthü, vamkei hatü heihkei!” shei nyük. Hahepak kü Shadrakh, Meshakh hatü Abednego awbhaong leipü vamteke.

²⁷ Ong naü-eethü, governorthü hatü ongpalei lebü lakchongbüthü peü kemei jomphong shinei thai. Jomphong kü awi nelai; shangjing sho hükao nehah; jomphongei ashakviha lanshei awi nehah, hatü jomphong kü aw ngü dangkao nebüi chongjateke.

²⁸ Nebukadnezzar ongpai, “Shadrakh, Meshakh hatü Abednego hathülei Kahvang men longtuh! Büpai büpalei vangsho phongshan shomei büpa chongphopüthü yangteke! Jomi büpa kü hinglem, hatü jomei Kahvang nevaipheikü, ngelei kahvang chongnephohen hatü nekhümhen shei ngelei shahkungnyü dangkao mangei, jomei yangnyu dihen thahshi lanei shuohteke.

²⁹ Hanangkü ngei shahkungnyü hük lingnyüpeih: Üam nanglaki, jathili-i nevaijü shahlemi Shadrakh, Meshakh hatü Abednego hathülei Kahvang thaüvaüei langmaanhenshang, lakjaang lajaang laaishi shaaktükhen hatü jomei shemthü benei nyüphinya leitükhen; mehenangkü hapakei jangaokhen mü lebü kahvang meleiyao neshiü” shei eteke.

³⁰ Hapheikü ongpai Shadrakh, Meshakh hatü Abednego hathü Babylon ongching kü uoshing dokpa kü anshihteke.