DANIEL 2 - DAÜLANGPÜ LAIHING (BSI)

Nebukadnezzarlei Mangh

¹ Nebukadnezzar ong vaipü vangbong nyipabü kü büpai mangh hük manghteke. Hapai büpa longi mongshanghü hatü büpa neshiaok.

² Hanangkü büpai thibüthü, lashüh dokpüthü, phongyompüthü, hatü lithilen kü veiyei tetpüthü kü büpai mehe mangh manghpa, ha eshih shei nyükteke. Mechem jomphong peiyei ongpa touei yaongpa,

³ büpai jomphong kü eteke, “Ngei mangh hük manghpü hapai ngei longi mongshanghünyüke, hatü hapa mehe lappa, ngei nyinghahhünyüke.”

⁴ Hahepak kü jomphongi Aramaic shah mü ongpa kü jangei eteke, “Oh Ongpa, nüng denden nyutuh! Hamphong kü mangh eshih, hatü ha hami nüng kü tetei ephüshah.”

⁵ Ongpai jomphong kü eteke, “Ngelei mongkü ha temtüktepih: Amphongi ngei mehe mangh manghpa hatü hapa nih-ei neephüjema, ngei amphong khih mü shaaktükhen hatü ammei shemthü benei nyüphinya leitükhen.

⁶ Shejao amphongi ngei kü mangh hatü hapa lappü nih-ei ephüjema, ngei amphong kü laklei hatü dhüm longpü yahphahen. Hanangkü ngei kü ha mangh eshih hatü ha nih-ei ngei kü eshih.”

⁷ Shao chem jomphongi ongpa kü eteke, “Oh Ongpa, nüngi hamphong kü mangh eshih, hatü hamphongi ha tetei ephahen.”

⁸ Hahepak kü ongpai eteke, “Amphongi ngei kü mangh ne-ejema am peü kü aihük hanghi shuohhen ngei temtükpü ammi ha nyingei,

⁹ ngei deihshi nyupü aimü amphongi hepak luangi yahnüng shei khenyüke. Hepak ngoijü lemphü yeiyadaihen shei monglemei amphongi ngei kü shahshem hatü nemeipü ehen phaüshah showteke. Hanangkü shaang ngei kü mangh eshih, hatü amphongi hapa lappü ngei kü nih-aokteke shei ngei nyinghen.”

¹⁰ Kaldea am thihivamthüi ongpa kü eteke, “Ongpai mehe phenya, ha dükaokhen kahdoknyü kü shennyak üpayao neshiüpih! Ong üpaiyao meshük shangkü longpü hatü wong kohpü vaituh, thibüthü hatü lak-ow veipüthü nevaijü lithilen veiyei tetpüthü kü hapa keipü douwong nepheangpih.

¹¹ Mehe ongpai phenya, hayü ahshi-üng wongshi khih. Kahvangthü nevaiphei keyü ongpa kü üpaiyao ha shakei vamei ne-eaokhen, hatü henüng keipü shennyak hangku khongkü nedangpih.”

¹² Hapa shah-i ongpa longi mongshih vamhü hatü büpai Babylon kü nyupü nahpülangpüthü peü jütükhen ngeükhüam shuoh.

¹³ Hanangkü nahpülangpüthü, Daniel hatü büpalei küphüthü peü jühen ngeükhüam shuohteke.

Kahvangi Daniel kü Mangh Lappü Hunyüke

¹⁴ Mechem ongpalei veshan mübü Ariokh-i Babylon kübü nahpülangpüthü jütükhen layaongei daipa, Danieli longi kon kohshi Ariokh kü,

¹⁵ “Mehekei ongpai hajük mangpü ngeükhüam shuohpa yo?” shei pheteke. Hahepak kü Ariokh-i Daniel kü mehe vampa ha eshuohteke.

¹⁶ Ha danei Danieli ongpa touei peiyei büpa kü mangh mehe lappa, ha tetei ehen hepak yüteke.

¹⁷ Hahepak kü Daniel shemei nyokei leiyei büpalei küphüthü, Hananiah, Mishael hatü Azariah kü mehe vampa ha jung ejateke.

¹⁸ Büpai jomphong kü lebü Babylon am nahpülangpüthü mü büpa hatü büpalei küphüthüao omei nejütükhen shingvaishi hapa shahjo shakei vamei tet-aokhen vangsho Kahvang kü phahji yüei phophen nyeanteke.

¹⁹ Ha ya-üng hapa shahjo Daniel kü manghkhang hük kü shakei vamhü, hatü büpai vangsho Kahvang kü men vihteke.

²⁰ “Kihikon hatü nganhilongü büpalei; mehenangkü Kahvang men denden kü longtuh.

²¹ Büpai hepak vangpanthü yeiyahünyeih; büpai ongthü ong vaihünyeih, hatü jomphong nüngtüknyeih. Büpai nahpüthü kü kon shouhnyüpeih, hatü yao-aokpüthü kü nyingpühingpü shuohnyüpeih.

²² Büpai chülohpü hatü shajothü shakei vamhünyeih; Büpai vangnyak kü mehe joshi nyu, ha nyingnyüpeih, hatü vangngaiyü büpa mü nyunyeih.

²³ Ngei nüng kü vihnyeih, hatü dhüm shuohnyüpeih, Oh hamei bühipa amei Kahvang: Nüngi ngei kü kon hatü ngan shuohnyüpeih, hatü hami nüng kü mehe yüpa, ha nüngi shakei vamei huphüteke, Nüngi ham kü ongpalei mangh shakei vamphüteke.”

Danieli Mangh Tetnyüke

²⁴ Hahepak kü Babylon am nahpülangpüthü jühen shingvaishi ongpai jepü Ariokh touei Daniel peiyei büpa kü, “Nüngi jomphong tejütük. Ngeipa ongpa touei müei deituh, hatü ngei büpa kü mangh lappü tetei eshuohhen” shei eteke.

²⁵ Shao chem Ariokh-i ongpa touei Daniel müei heih hatü eteke, “Ngei, ongpa nüng kü, mangh mehe lappa, ha tetei ephaaokhen wüpküpei nyupü Judah am khong kü shennyak hük dangtepih.”

²⁶ Hahepak kü ongpai Daniel (üpa kü Belteshazzar sheiyao nyüknya) kü, “Nüngi ngei kü, ngei mehe mangh manghpa, hatü hapa mehe lappa, ha tetei ephaaokhen je?” shei pheteke.

²⁷ Üpa nahpülangpü shennyakiyao, lashüh tetpü amiyao, thibüthü nevaijü phongyompüthüiyao ongpai phepü shahjo nih-ei ne-ephaaokpeih,

²⁸ shejao shahjo shakei vamei epü Kahvang hük vangsholei nyüpeih. Büpai Nebukadnezzar ong kü ngoikahen nyihthü kü mehe vamhen huteke. Nüng lüngei lemshi nyushi eepü nüngei mangh hatü manghkhangü hathü shüpü khih:

²⁹ Oh Ongpa, nüng lüngei lemshi ngoikahen nang deihhah-ei nyuteke, hatü shahjo shakei vamhüpübai nüng kü mehe vamhen ha huteke.

³⁰ Shejao ngei kü ha shah shakei vamhüpeyü ngei mih mü hayaoha nyeinya kihikon kohpü nangkü nevai, shejao Oh Ongpa, nüng hatü nüngei mongkü peipü mongdeih nyinghen shingvaishi ngei kü ha shakei vamhüpeih.

³¹ “Oh Ongpa, manghkhang kü nüngi veishingkü nüng shekü lajei longpü hük hapayü ahshi-üng longshi, bhihbhihlanglang shei, veiheni nyemshi eeteke.

³² Hapa lajeilei shangjingü daülangpü honi, jaaba hatü bhagchongü ngini, hapalei vom hatü shüngkungü melangnyiami,

³³ hapalei la nyiami hatü hapalei ladok hatü labhayü hanei nyiami hatü hanei ashemi lingpü shiüteke.

³⁴ Mechem nüngi ha kü chishi nyupa, shennyakei laki nehongpü kü yaongvak kübü yaong longpü hük lokteke. Hapa yaongi nyiam hatü ashemi lingpü lajeilei la kü shüktü nihtükteke.

³⁵ Hahepak kü nyiam, ashem, melangnyiam, ngin hatü hon kemei chemi khih mü nihdai, hatü shaonyü hepak kü hah tenshing leipü hahbhang kei lei, hatü hapa shing khih shei nelekaokhen mü vanglüki maoei lüdaiteke. Shejao yaong payü kahdok peü küppei kahshang longpü leiteke.”

³⁶ Mangh-ü hapa shüpü khih: Shaang ngei, ongpa kü hapa tetei ephüshah.

³⁷ Oh Ongpa, nüngü ongthü khongkü ong khih. Vangsho Kahvangi nüng kü ongching hean, ngan, wong hatü müknyinshekhang shuohteke;

³⁸ Nüngei lakmong kü kahdoknyü hangku, kahdok shak kübü yemhimakthü, hatü shangouthü peü shak kü vanglem lemhen hean shuohteke. Nüngü hon shangjing ha khih.

³⁹ Nüng pheikü nüngei ongching mü shuipü ongching hük vamkahen, shejao hapheikü jempabü melangnyiam ongching hük vamei kahdoknyü kemei kü vanglem lemkahen.

⁴⁰ Hatü hapheikü nyiam kei wong kohpü alipabü ongching hük vamkahen; nyiami lemphüli ngümei nihtükpükei, hapai lebü ongchingthü peü ngümei nihtükhen.

⁴¹ Nüngi ladok hatü lajaang hanei ashemi, hanei nyiami lingpü eepü keiha, hanteipü ongching nyukahen; shejao nüngi ashem mü nyiami vukei eepü keiha, hapa kü nyiamei wong hanei kü nyukahen.

⁴² Lajaangthü hanei nyiami, hatü hanei ashemi lingtü nyupü keiha, ongching hanei wong kohshi hatü hanei wong nekoh-i nyukahen.

⁴³ Hatü nüngi ashem mü nyiam vuktü eepü keiha, shennyak lem longi vukshi nyuhen hatü ongpathüi yiükyah lashompai mongjemhühen khehen, shejao nyiami ashem nyi nepaknekhampü keiha shennyakthü mong nejemhen.

⁴⁴ Hathü ongthülei nyih kü, vangsho Kahvangi mechemao nemahnechahhen ongching hük linghen, nevaijü vepai nehahhen. Hapai lebü ongchingthü kemei ngümtükhen, hatü dohtükkemhen, shejao hapa ongching denden kü nyuhen.

⁴⁵ Yaongvak hük kübü yaong shennyakei laki nehongpü kü lokei, hatü hapai nyiam, melangnyiam, ashem, ngin hatü hon kü shüktü ngümtükei eepü manghkhang lappeyü hapa khih. Longpü Kahvangi ngoikahen hepak kü mehe vamkahen ha huteke. Hapa mangh hatü lappü nihpeyü jiüpü hatü hinglemhen nyüke.

⁴⁶ Hahepak kü Nebukadnezzari Daniel touei aümei sha, hatü büpa kü moila hatü ayingshü shuohhen ngeükhüam shuoh.

⁴⁷ Ongpai Daniel kü, “Hingmei, nüngei Kahvangü kahvangthü khongkü Kahvang, hatü ongthülei Shembüpa, hatü shahjo shakei vamhüpüba nyüke; mehenangkü nüngi hapa shahjo shakei vamhüaokpü homei ngei nyingteke” shei e.

⁴⁸ Hahepak kü ongpai Daniel shaopü uoshing kü uohütü thintho longi shuohteke, hatü Babylon ongching kü vanglem lembü leihü hatü nahpülangpüthü peü shak kü khei vaiyei tuh.

⁴⁹ Danieli ongpa kü yüpü nangkü Shadrakh, Meshakh, hatü Abednego jom peü Babylon ongching kü chinglingbüthü vaiyei tuh, hatü Daniel ongpalei ong uoshingei chongphoei nyu.