DANIEL 12 - DAÜLANGPÜ LAIHING (BSI)

Dohpü Hepak

¹ Hahepak kü longpü vangsho phongshan Mikhael, üpai nüngei nanglak yomnya, büpa peikahen. Jatthü chongpanghinüng hapakei chemao mangvampü shangpong yakying hepak hük peikahen. Shejao shangpong hepak kü nüngei nanglakthü üamei men laitap kü nyangei nyu, yanghen.

² Üam meshük diyei kahmongei nyu, yangei leihen; hanei nedohnetenpü yangnyu yem touei, hatü hanei veüpong hatü denden mongmangpü touei nyuhen.

³ Kenhingpüthü vangsho nyangnyangpükei nyahen hatü üami mih longi daülangshemshepü touei müei lei, hathüyü denden kü lithathü kei nyaahen.

⁴ Shejao nüng, Daniel, dohpü hepak mangngoi thahshi hapa lai küptüktuh hatü füoshang shingtüktuh. Longshi shingi hamebü hammü shei mehe vamnya ha nyinghüei longteihen.

⁵ Hahepak kü ngei, Daniel, veishuoh shingkü ngei touei panyi peiyei yungdang phipong kü yaongküteke.

⁶ Henyi khongkü hüki nyemin ashak ümtü yung shangei yaongpüba kü, “Hathü yashanyalepüthü dohpü ngoihen meshük lushi nyukahenang?” shei eteke.

⁷ Nyemin ashak ümtü yung shangkü yaongpü shennyaki büpalei laknyong lakdah vangsho philei haongei vanyangyem Kahvang men kü vangei, “Hapayü bong jem mü hükkeishing nyukahen” shei epü ngei danteke. Mechem daülangpü nanglakthü kü shüveidoideipü dohhenshang, hathü douthü kemei dohpü vaihen.

⁸ Büpai epü ngei danteke, shejao nenyingaok. Hanangkü ngei, “Ngelei shembü, hathü mekei dohhen hatü ha kübü mehe vamkahen?” shei pheteke.

⁹ Büpai jangteke, “Daniel, nüng leidaituh; mehenangkü hathü shahthü dohpü mangngoi thahshi joei küpei tuhtuh.

¹⁰ Longshi shing daütükhen shejao nemeipüthü nemei-i nyuhen. Nemeipüthü üpayao ha nenyingaokhen shejao kon kohpüthüi ha nyingaokhen.

¹¹ Nyihjeih moila shuohpü dohtükpü hatü benpülangpü peihüpü jiühitnalai chongpangpü hepak kübü pangei nyih 1, 290 chongkahen.

¹² Nyih 1, 335 peihpü thahshi üami hinglemei nyuhen, jomphong mongonghen.

¹³ Shejao nüng, Daniel, dohpü ngoishi hinglemei nyutuh. Nüng didaihen, hatü dohpü nyih kü nüngei laklei yahhen nüng yangei leihen.”