DANIEL 10 - DAÜLANGPÜ LAIHING (BSI)

Danieli Manghkhang kü Shennyak Hük Eepü

¹ Cyrus ongpai Persia kü vanglem lempü vangbong jempabü kü Daniel (üpa kü Belteshazzar sheiyao nyüknya) touei shah hük shakei vam. Hapa shah-ü shahhing hatü hapayü vehok jung shiüteke. Hapayü büpa kü manghkhang kü nih-ei eshuohteke.

² Hahepak kü ngei, Daniel hapta jem thepeiyoungei nyu.

³ Hapta jem mangpeih thahshi ngei hetmei nehah; phai nehah nevaijü ngelei jui yiü kü nejep hatü sho kü meli nyioei sho nehai-i nyuteke.

⁴ Hapa bong shongpü len, nyih hapüalipabü kü ngei Tigris yungkungei yaongshi nyu.

⁵ Ngei ngangei veishingkü shennyak hük nyemin ashak ümtü büpalei shüngshep honi mon sheptü eeteke.

⁶ Büpalei bümü chüshaü kei nyangnyangshi, büpalei dhe klang kei, büpalei mük awnya kei, büpalei lakhilayü melangnyiam thittükpü keiha hatü büpalei ngeü-ü khongnyü longpülei ngeü kei nyuteke.

⁷ Ngei, Daniel monhai hapa manghkhang eeteke; ngei mü nyupü shennyakthüi ha ne-ee, shejao jomphong longi nyempai nyaiyei daiyei jodaikem.

⁸ Hapa yashanpü manghkhang kü veiyei ngei mon yaongshi nyu; ngei wong kemei; ngei mahngmük mahngshe kei haiyei leidai.

⁹ Hahepak kü büpai epü ngei dan, hatü büpai epü kü ngei bangei dhe kahdok kü shüshi shomeiyingei sha.

¹⁰ Shejao hahepak kü lak hüki ngei kü shong, hatü lakhila kü düktü ngei yaonghü, shejao ngei nedoh-i kheüei nyuteke.

¹¹ Büpai ngei kü, “Bampü Daniel, ngei nüng kü epü shah kü mong shuoh-ei bangtuh. Nüng yaongtuh; mehenangkü ngei nüng touei shompü khih” shei e. Mechem büpai ngei kü ha epa, ngei kheüyaki yaongteke.

¹² Hahepak kü büpai ngei kü, “Daniel, nüng tenyem. Shongpü nyih kübü pangei kihikon danghen shingvaishi nüng nyingi Kahvang touei nenteiaokei leihen mü ngei mong kü temteke, hatü nüngi phoppü dantepih, hatü shaangao nüngi phoppü kü jangei peinyüpeih.

¹³ Shejao Persia ongching ongpai nyih hapühük thahshi ngei khüei yaongpeih. Hahepak kü vangsho phongshan longpüthü khongkü hük, Mikhael, ngei kü sheühnüng peiküpeih, hatü ngei büpa Persia ongching kübü ongpa mü tuhphongpeih.

¹⁴ Dohpü nyih kü ammei nanglakthü kü mehe vamkahen ha nüng kü nih-ei ephahen ngei peiküpeih. Hapa manghkhangü ngoikahen nang epü khih.”

¹⁵ Mechem büpai ngei kü ha epa, ngei ngelei dhe kahdok kü shüshi sha hatü shah ne-e-i nyuteke.

¹⁶ Hahepak kü veiheni shennyak kei, hüki ngelei ju kü hong, hatü ngelei ju apei shah ehen chongpang. Ngei touei yaongshi nyupüba kü, “Ngelei shembü, manghkhang homei ngei longi hapakei shangponghüteke hatü ngei wong kemdaiteke.

¹⁷ Mekei ngei, nüng chongphobü, ngelei shembü mü shah eteiaokhenang? Ngei wong kemdaiteke hatü ngü heehenao neaoknyu” shei eteke.

¹⁸ Shao veiheni shennyak lepü hüki ngei kü hong hatü ngei wong kohhü.

¹⁹ Büpai, “Oh Kahvangi bampüba, nüng tenyem, nüng mong yangtuh, wong kohtuh hatü monglongtuh” shei eteke. Mechem büpai ngei kü epa, ngei kü wong vam, hatü, “Ngelei Shembüpai etuh; mehenangkü ngei wong kohhüteke” shei e.

²⁰ Hahepak kü büpai, “Ngei nüng touei mehekei peipa nüngi nyingla? shei phephüteke. Shaang ngei Persia ongpa khüei hoknüng nyokei leihen hih, hatü mechem ngei büpa neütükhen, Greek ong vamkahen;

²¹ shejao shahhing laitap kü mehe nyangei nyu, ha shong ngei nüng kü ephüshah. Israel yompü Mikhael phongshan mü lenei jom khüei hokhen üpaiyao ngei kü nesheühphünyu” shei e.