DANIEL 1 - DAÜLANGPÜ LAIHING (BSI)

Daniel hatü Büpalei Küphüthü

¹ Judah amei ong Jehoiakimi vanglem lempü vangbong jempabü kü Babylon ongpa Nebukadnezzar peiyei Jerusalem shümteke.

² Shembüpai Judah ongpa Jehoiakim büpalei lak kü shuoh, hatü Kahvangei Phopshem leipü douhinangthüao shuohteke. Büpai hathü koei Babylonei leiyei büpalei kahvang khümshem dou tuhshingei tuhteke.

³ Hahepak kü ongpai büpalei ong uoshing kü lakchongbü shopü, Ashpenaz kü Israel am wüpküpei nyupüthü khongkü longhiong shahishem kübü hatü baluhalong hanei jehen ngeükhüam shuohteke.

⁴ Jomü nethe meipü, büm kü eela neshiüpü, sholi meipü, nyingpü shennyak, lomi shouk yao-aokpü, hatü ong uoshingei chongpho aokshampü jehen eteke. Ashpenaz-i jomphong kü Babylon amei laiyung hatü shah nyuhhen eshuohteke.

⁵ Ongpai jomphong kü büpalei hahying kübü nyihjeih hahhen hahying hatü yiü shuohhen ngeükhüam shuoh. Jomphong kü vangbong jem thahshi nyuhpheikü ongpa touei peiyei yaonghen mü nyuteke.

⁶ Jepüthü khongkü, Daniel, Hananiah, Mishael, hatü Azariah shei Judah am phang kübü nyuteke.

⁷ Lakchongbü shopübai jomphong kü men ja menshuoh: Daniel kü Belteshazzar; Hananiah kü Shadrakh; Mishael kü Meshakh, hatü Azariah kü Abednego shei menteke.

⁸ Shejao Danieli ongpalei hahying hatü yiü yingpai laophü nyingi nedaünelangi neleipih shei mong kü tem, hatü büpai lakchongbü shopü kü ngei hapakei nyeteinyangei neleihen mongshih shei pheshuohteke.

⁹ Shaang Kahvangi Daniel kü bamhen hatü shinshanghen hapa lakchongbü shopübalei mongkü peihü.

¹⁰ Shejao hapa lakchongbüi Daniel kü eteke, ngei ngelei shembü ongpa kü nyemnyüpeih; mehenangkü büpai nüng hahhen yinghen peü shuoh-ei nyüke. Nüngei yienhihien lebü nethethü kei nevai-i büpai nüngei büm nemei-i eejema, nüng tata kü ongpai ngelei shangjing daklanghen khih.

¹¹ Hahepak kü Daniel, Hananiah, Mishael hatü Azariah yomhen lakchongbü shopübai jepü yombü kü Danieli eteke,

¹² nyih an mong aa kü hamphong kü dokei veituh. Hamphong kü haohilai hatü yinghen yung mon yahshih.

¹³ Hapheikü amphong ongpalei hahying hahpü nethethü mü hamphongei hangbong shetteiyei veituh, hatü amphongi ham kü mekei veiaokhen, hapakei shahphen shuohtuh.

¹⁴ Hanangkü büpai ha shah kü mongteke hatü nyih an jom kü dokei veiteke.

¹⁵ Nyih an dokpheikü jomi veishingkü, ongpalei hahying hahpü nethethü meyü jomphong-üng meipüba hatü nitpüba shei eeteke.

¹⁶ Hanangkü yombüi jomphong kü shuohpü hahying hatü yiü tuhtüktü jomphong kü haohilai mon jeiyei shuoh.

¹⁷ Ha nethethü jom ali kü Kahvangi nyingpühingpü, laiyung, hatü lemphü yao-aokhen kihikon shuoh. Ha mü chemi, Danieli mangh hatü manghkhang lemphüli tetei eaokteke.

¹⁸ Mechem ongpai jomphong müei deihen itpü hepak ngoipa, lakchongbü shopübai jom peü Nebukadnezzar touei müei dei,

¹⁹ hatü ongpai jomphong mü etei, hatü büpai Daniel, Hananiah, Mishael hatü Azariah hathü thühen mü üpayao nedang; hanangkü jomphong ongpalei dou kü shüteke.

²⁰ Ongpai mehe mehe shangkü phejao hatü mehe mongshang ejahenshang ongching kempü kü nyupü thibüthü hatü phongyompüthü mü jomphong-üng shing an meipüba chongjateke.

²¹ Danieli ong uoshingei chongphoei Persia ong Cyrus-i Babylon neüpü thahshi nyu.