CHONGVENBÜ 9 - DAÜLANGPÜ LAIHING (BSI)

¹ Hanangkü ha peü kü ngelei mongi dokei veitepih; daülangpüthü hatü kon kohpüthüi dükpü kemei Kahvangei lakmongei nyüke, hatü bampai hi jiühitpai danei nyüpa, üpaiyao ha nyingnüng neaoknyu.

² Daülangpü hatü mang, meipü hatü nemeipü, daülangshemshepü hatü nedaünelangpü, moila shuohpüthü hatü moila neshuohpüthü peü aihük lashüh-i beannyüke. Shennyakmeithü kü keiha mangthü kao, vangpüshuwpüthü kü keiha vangpüshuwpü neyahpüthü kao vamnyüke.

³ Peü kü aihük lashüh-i beannyüke, hatü vanghenyü phangkü vampü peü kü hayü mang. Nyeinya vaishi, peüei mongdang kü mangi maei nyüke; jom yemmü nyupü thahshi jomei mongdang kü ngapüyoipü nyüke, hatü hapheikü jom didaikemnyüke.

⁴ Shejao yemmü nyupüthü mü ompüthü kü monglemhen nyüpeih; mehenangkü didaipü mailang meyü yemmü nyupü shi-üng meipeih.

⁵ Mehenangkü yemmü nyupüthüi ham dihen shei nyingnyeih, shejao didaipüthüi meheyao nenyingnyih; Jom shing sheyü laklei neshiü, hatü jomphongü deih-ao nedeih-i betüknyeih.

⁶ Jomphongei bampü, jiühitpü, hatü mükhühmongyung peü mahdai; Vanghenyü phangkü vampü mepa kao sheyü jomphongei hean neshiü.

⁷ Daituh, mongongshi hahying hahtuh, hatü mongongshi yingtuh; mehenangkü nüngi mehe düknya, Kahvangi shelei mebü mongpü nyüpeih.

⁸ Düngei ashak shola owtuh, hatü shangjing kü mainga nyiotuh.

⁹ Vanghenyü phangkü Kahvangi nüng kü shuohpü angsha yangnyu nyihthü peü kü nüngi bampü anyüha mü mongongshi nyutuh; mehenangkü hapayü nüngei yangnyu hean, hatü vanghenyü phangkü nüngi nyiuei dükpü dousho khih.

¹⁰ Nüngei laki dükaokhen mü mehe mehe heühenshang wong kohshi kemei düktuh; mehenangkü nüng vühen mahngchongei dou dükhen nevaijü deihhen, nevaijü nyingpühingpü nevaijü kihikon meheyao neshiü.

¹¹ Vanghenyü phangkü ngei lemhük eetepih: Mokteipeyü la shangpü am shing mon nevai, nevaijü vehokü wong kohpü am shing mon nevai; hahyingü kon kohpü am shing mon nevai; mophimo-ü nahpü am shing mon nevai, bampeyü lahhinpü am shing mon nevai, shejao hepak hatü lashüh-i jom peü kü jiühünyeih.

¹² Mehenangkü mechem laophü kü vongshüh vamhen üpaiyao nenyingaok. Shang kü nyah manlangpükei, tai kü ouha manlangpükei, mechem ngangahük kü vongshüh dhaümhenshang hangkuli vongshüh kü shüdainyeih.

Ngapü Meyü Kihikon-üng Longpeih

¹³ Vanghenyü phangkü kihikonü meshük longpa, hapa lappü ngeiyao eetepih.

¹⁴ Chem hepak kü ching maanpü hük kü nanglak maani mon nyu, hatü wong kohpü ong hük hapa ching hahhen hapa ching shinei yahtü shümhen shingvaishi dou longpü dük.

¹⁵ Shaang hapa chingei taopa shennyak hük shejao kon kohshi nyu, hatü büpai hapa ching büpalei koni yangaok. Shejao üpaiyao hapa taopa shennyak deih-ei nedang.

¹⁶ Hanangkü, “Wong kohpü meyü kihikon-üng meipeih” shei ngei enyüpeih. Shejao taopalei kihikonü peüi yaktük, hatü büpalei shah kü üpaiyao mong neshuoh.

¹⁷ Ngadaiphei vanglem lembüi leneiwongei epü meyü, kon kohpü shennyaki nümei epü kü lihen nyüke.

¹⁸ Kihikonü vehok phunglang mao meipeih, shejao mang shennyaki mei longi mangtüknyeih.