CHONGVENBÜ 8 - DAÜLANGPÜ LAIHING (BSI)

¹ Kon kohpü shennyak kei üpa nyüpa? Üpai doulemthü nih-eikhoei nyingaoknya? Kihikoni shennyak hükei dhe ngaihünyeih, hatü nemeipü deiaeiyao yeiyahünyeih.

Ongpalei Shahkung Bangtuh

² Ongpalei shahkungnyü bangtuh; mehenangkü nüngi ha Kahvang touei lahtükteke.

³ Nüng tenyem; büpa toueipü lüdaituh; mongneongpü shahhidou nyujema büpa toueipü lüdaihen tephei; mehenangkü büpai mehe mong, ha dükphahen.

⁴ Mehenangkü ongpalei shah-ü peü mü shopü, “Nüngi mehe düknya?” shei üpai büpa kü eaokhen?

⁵ Üami büpalei shahkungnyü bangnya, meheyao vongshüh neponghen, hatü lipühapü mongdangi hapalei hepak hatü lem nyinghen.

⁶ Mehenangkü dihen shanghah vihheki danei nyulangmao, lemphüli shingvaishi jiüpü hepak hatü lem nyüke.

⁷ Hangkuli üpaiyao ngoikahen nang nenyingpai mehe vamkahen üpai jom kü eshuoh-aokhen?

⁸ Hangku üpa kao laophülei laangha shoungei tuhhen ngan neshiü; Nevaijü üpa kao laophü dihen nyih kübü yangaokhen wong neshiü. Hapayü üpaiyao nekeüaokpü vehok hük, nevaijü mangi hapa dükpüthü neyangaokpih.

Mang hatü Daülangpü

⁹ Vanghenyü phangkü dükpü lemphüli kü ngei mongshuoh-ei veishingkü ngei hathü eeaokpeih. Mechem shennyak hüki lebüthü shak kü vanglem lemhenshang, laophü nying kü mong kü ma yahpü hepak hük nyüke.

¹⁰ Hih, ngei nemeipüthü mahng vütükpü eetepih, shejao mahngchong leipü nyokei leijashingkü jomi douten dükhampü nangkü chingnyülei shennyakthüi hathü kü vihpülüpü eetepih. Hapayao angsha khih.

¹¹ Mechem hangku sho mahtükpü kü lomi hanghi neshuohhenshang, hangkuthülei mongkü ten dükhen temnyüpeih.

¹² Mang shennyakthüi mang kho hükpa düklangmao yangnyu den lushi nyunyüke, shejao üami Kahvang kü nyemnya, jomphong-üng meipüba nyuhen; mehenangkü jomi Kahvang kü nyemnyüke.

¹³ Shejao mangthüi Kahvang kü nenyempü nangkü jom meishi nenyuaokhen hatü jomei yangnyu den vangdhüm laang keiha shohdaihen.

¹⁴ Kahdoknyü kü angsha dou hanei vamnyüke. Daülangpüthüi mangthüi dangbenüng hanghi dangnyüke, hatü mangthüi daülangpüthüi dangbenüng laklei dangnyüke. Hapayao angsha khih shei ngei enyüpeih.

¹⁵ Hanangkü yangnyu-ü mongongshi nyuhen khih shei ngei enyüpeih; mehenangkü vanghenyü phangkü hangku shingvaishi hahhen, yinghen hatü mongonghen mü lenei lebü meipü meheyao neshiü. Shejüang vanghenyü phangkü Kahvangi shuohpü yangnyu nyih kansho hük mong aa kü büpai dükpü dou kü mongong nyuhen.

¹⁶ Mechem ngei ngelei mong shuoh-ei kihikon nyinghen, hatü vangnyak vangngai neshinechongi kahdoknyü kü hangkui dou dükpü kü veipa,

¹⁷ Kahvangi dükpü dou lemphüli ngei eeteke; üpaiyao vanghenyü phangkü mehe vamnya, ha neyao-aoknyu. Hangkui hapa yemei dangnüng shei khejao hangkui hapa lappü nenyingaok. Kon kohpü shennyaki ngei peü nyingnyeih shei ejao, büpai hingmei mü hapa yaoei neaokpih.