CHONGVENBÜ 7 - DAÜLANGPÜ LAIHING (BSI)

Yangnyu Nang Deihpü

¹ Menmeiyü vong meipü meli mao meipüba, hatü bühpü nyih leimeyü dipü nyih-üng meipüba.

² Mo shemei dailei meyü mahng shemei daipü-üng meipüba; Mehenangkü hapayü peü shingvaishi dohpü nyih nyüke, hatü yemmü nyupüthüi mongei jaoei tuhhen vongbong.

³ Nyipü leimeyü mongmangpü-üng meipüba; Mehenangkü mongmangpü dheyü mongdang shingvaishi meipeih.

⁴ Kon kohpülei mongdangü mahng shemei nyunyeih, shejao ngapalei mongdangü mohitap shemei nyunyeih.

⁵ Ngapalei kesho kü banglei meyü kon kohpü shennyaki lohpümangpükü bangpü-üng meipüba.

⁶ Ngapathüi nyipüwapeyü aw kü hüh jakjü phaukpükei nyüke. Hapayao angsha khih.

⁷ Mechem kon kohpü shennyaki hanei am kü ühünghenshang, büpai ngapa kei dou düknyüke, hatü yawhdoui mongdang mangtüknyeih.

⁸ Lemphüli pangpü leimeyü dohpü-üng meipüba, hatü changmeipü leimeyü nenteiaokpü-üng meipüba.

⁹ Nüngi shülangi mongshih tevam; Mehenangkü mongshih vampeyü ngapalei lakei noshi nyüke.

¹⁰ “Hathü meyü peihdaipü nyihthü mekei meipüang?” shei nüngi tephe; Mehenangkü hathü phehen jiüpü nevaipih.

¹¹ Kihikonü mükjüp keiha meipü dou, hatü üami vanghenyü ee, hathüi nanglei dangnyüpeih.

¹² Lop kü keiha kihikon kao loishing nyüke, shejao kihikon nyupü nangleiyü ha hih: Kihikon nyupü shennyakei yangnyu-ü yangei tuhnyeih.

¹³ Kahvangi dükpü deihhümao; büpai kaokshi lingtükpü üpai laüei lingaokhen?

¹⁴ Mechem hepak vangpan meihenshang, mongongtuh, shejao mechem hepak ten peihen, Kahvangi hayao hatü hükpayao lingpeih shei deihtuh. Hanangkü shennyak hüki ngoikahen nang meheyao nenyingaokpih.

¹⁵ Hapa ngelei angsha yangnyu kü ngei lemphüli eetepih: Daülangpü shennyaki laophü daülangshemshepü kü-üng sho mahnyeih, hatü nemeipü shennyaki mang kü hepak luangi nyupü eetepih.

¹⁶ Nüng ahshi daülangpü telei, nevaijü ahshi tenah; mehekei nüng nyingi yemei dihen?

¹⁷ Nüng ahshi shennyak ten telei, hatü ngapa hük telei; mehekei hepak mangngoi-i dihenang?

¹⁸ Hük kü shoungei yahhen meipeih, hatü hükpa-ao veyei tedeishih. Üpai Kahvang nyemnya, büpai beiyei nyeipü peü kübü yannyüpeih.

¹⁹ Chingnyü hük kübü vanglem lempü shennyak an leimeyü kihikoni shennyak hük nyeinya kon, hatü wong koh-ei leihünyeih.

²⁰ Kahdoknyü kü mang nethah-i jiüpü mon dükpü daülangpü shennyak üpayao neshiü.

²¹ Shennyakthüi epü shah peü kü nüngi dhaong teno; nüngi nüngei chongphobüi nüng kü thaüvaüpü danhen;

²² mehenangkü nüngiyao hepak longi kü mih kü thaüvaütih shei nyingei nyüke.

²³ Hathü peü kemei ngei kihikon homei dokei veitepih; “Ngei nahpülangpü leihen” shei eteke, shejao hayü ngei toueipü longi taishi nyuteke.

²⁴ Mehe kihikon vaihenshang vaijao, hapayü longi chüshi hatü nyinghen longi wongshi nyüke.

²⁵ Hanangkü ngelei mongi kihikon yemhen, hatü ha yaoei nyinghen shingvaishi kihikon hatü doulemthü peü yemei danghen, hatü nemeipü mang hatü ngapüyoipü meheshang ha nyinghen kheteke.

²⁶ Dipü mao nyeinya shahyakpeyü ngei nyüha hük hühhihang keiha pinnyülei mongdangü tailok kei, hatü pinnyülei lakü nyiamvü kei eeteke. Üpa shennyaki Kahvang mong hahhünya, pinnyü toueipü yangdaihen, shejao mang shennyakü pinnyülei tai kü manlanghen.

²⁷ Veituh, “Ngei ha yemei dangaokpeih” shei Chongvenbüi enyüke: “Dou dükpü vanglem yemei danghen shingvaishi doulem hük kü hük shih-ei,

²⁸ mechem ngei ha yemei nyupa, shejao meheyao nedangaok; haja khongkü kangshangpü baha hük payü ngei dangaokpeih, shejao hathü khongkü kangshangpü nyüha hükao ne-eeangpih.

²⁹ Hapa mon ngei dangaokpeih: Kahvangi hangku kangshangi lingteke, shejao hangkui laophü nyingi bukeishaanei leidaiteke.”