CHONGVENBÜ 6 - DAÜLANGPÜ LAIHING (BSI)

Nyakeikenei Deihpü Peü Angsha

¹ Vanghenyü phangkü ngei ten hük eetepih, hatü hapayü hangkuli kü ahshi-üng vihyaki nyüke:

² Hangkui napü kenpü meheiyao taoei nenyuhen shingvaishi Kahvangi jom kü mophimo, angpüdeipü hatü dhüm shuohteke, shejao Kahvangi jomphong hapa kü hüshemei netuhnyu, shejao yenpa hüki hathü hahtüknyüke. Hapayao angsha; hapayü ahshi mong kü tüngbenüng khih.

³ Shennyak hükei hapeüthü kho hük nyuhen aok, hatü bong longi nyuhen aok, shejao büpa bong meshük shangkü nyulangmao büpai angpü mophimo kü hüshemei nenyujema, hatü büpalei mahng dangkao meishi nevüjema, büpa leimeyü shaang bühpü aküngnaüha-üng meipü khih shei ngei enyüpeih.

⁴ Mehenangkü hapayü angsha kü peinyüpeih, hatü shangmang kü mahdainyeih, hatü shangmangi hapalei menü küplangnyeih.

⁵ Hapai vanghenyü ne-eejao nevaijü meheyao nenyingjao, hapa shennyaki dükpü dou meyü büpalei nyiumei-üng nyeishi nyüke.

⁶ Büpa bong haja nyi nyulangmao laophüi angpü mop kü hüshemei nenyu. Jijiphen shing hükei nedainyu je?

⁷ Hangkui dükpü dou kemei shünyü shingvaishi düknyüpeih, shejao mechemao shümoh meipeih shei neshiü.

⁸ Ngapa mü nyeishi kon kohpü shennyaki mehe nanglei dangnya? Mih touei mekei dükhen ha nyinghahpai taopai mehe nanglei nyüpa?

⁹ Napükenpü jung deih-ei longtei leimeyü mehe ang, ha kü hüshemei nyupü-üng meipüba. Hapayao angsha; vanglük phei changteipü mon khih.

¹⁰ Mehe mehe nyüpa, hathü kemei men menei nyüke; Shaang mehe hangkuli-i düknya, ha peü nyingdaiphei; Shennyak hüki laophü mü nyeishi wong kohpü shennyak mü nedenyih shei jeni nying.

¹¹ Meshükpa shah e, hajükpa angsha, hatü üpai nanglei dangnya?

¹² Vangdhüm laang kei peihdaihen kanja yangnyu kü shennyak hükei yangnyu shingvaishi mehe mei, ha üpai nyingaokhen? Vanghenyü phangkü büpa didaipheikü mehe vamhen ha üpai büpa kü eaokhen?