CHONGVENBÜ 5 - DAÜLANGPÜ LAIHING (BSI)

Nedeih-i Shülangi Telah

¹ Shembüpalei shemei mechem nüng daihenshang lakhila kenhingshi daituh. Jiüpü nejiüpü nenyingi ngapa kei moila shuohpü leimeyü yopailei heih-ei banghahpü-üng meipüba.

² Nüngei jui shülangi nevaijü nüngei mongi Kahvang touei jiüjiü kei telah. Kahvangü vangsholei nyüke, hatü nüngü kahdoknyülei nyüke. Hanangkü shah maani mon etuh.

³ Meshükpa mongshang, hajükpa manghten manghnyüpeih; meshükpa shah e, hajükpa ngashah yoishah enyüpeih.

⁴ Mechem nüngi Kahvang kü lahhenshang, hapa lahtükpü jiühühen tephei; mehenangkü büpai ngapathü kü mongneongnyih. Nüngi mehe lahtük, ha düktuh.

⁵ Lahtü nedük leimeyü nelahpü-üng meipüba.

⁶ Nüngei jubenyeijaangi nüng mang lemei temühü; phopshem leipü ngongpathü touei, “Ngei pungei lahpü khih” shei te-e. Mehekei Kahvangi nüng kü mongshihhahhen hatü nüngei lakdou mangtükhühen?

⁷ Ahshi mangh manghpü hatü shah ahshi epü kemei angsha, shejao Kahvang kü nyemshi nyutuh.

Mophimo-ao Angsha

⁸ Kahmük hük kü taopathü hanghipü, hatü jom kü shahhing hatü jiüpü nedükshuoh-i eejü nüngi hapa kü tethama; mehenangkü lakchongbü hük kü büpa dok kübü lakchongbü hüki veinyüke, hatü jijiphen dok kü shao-üng lebü lakchongbü longpüthü nyüke.

⁹ Kahdok kü vampü mop peüi hahnyüpeih; ongpaiyao kahmük kü vampü hahying hahnyüpeih.

¹⁰ Üami lop kü bamnya, mechemao lop changteke shei nenyunyih; Üami mop kü kennya, mechemao jomi angpü kü mükmong nemanyih. Hapayao angsha khih.

¹¹ Meshükpa mop ang, hajükpa ha hahtükhen vamnyeih. Müki eepü mü lenei hapa angpü shembü kü mehe nanglei nyüpa?

¹² Longi hahjao maani hahjao dou dükpü shennyaki vüngnyangi shinyüpeih, shejao longi angpü shemmeipai mükhet ngoiyei neshinyih.

¹³ Vanghenyü phangkü ahshi-üng nemeipü mang ngei eetepih: Shemmeithüi jom shanghahpü nyih nohen mop jaoei tuhnyüke,

¹⁴ Shejao lashüh neshiüi hapa mop kemei mahdaitü mechem hapeü bühhenshang, tuhhen meheyao neshiüi leidainyeih.

¹⁵ Shennyak hük hümlungnyülei vom mong leipü lakkong peinyüpeih, hatü büpa peipü keiha lakkong lüdainyeih. Laophüi dükpü kü vampü meheyao koei nedainyih.

¹⁶ Hapayao ahshi-üng nemeipü mang khih: Shennyak hük peipü keiha lüdainyeih, Vanglük phei changteipü keiha dükpü kübü mehe nanglei nyüpa?

¹⁷ Yangnyu luden kemei vangnyak kü hahyingei, shanghah, mongshang, mongshih hatü tüngpüaipü kü nyunyüpeih.

¹⁸ Hapayü meipü khih shei ngei eepeih: Kahvangi shuohpü yangnyu nyih shohük mong aa kü shennyak hük shingvaishi hahhen, yinghen hatü laophüi dükpü dou kü hüshemei nyuhen, hapa-üng büpalei lashüh khih shei ngei nyingpeih.

¹⁹ Nyeinya vaishi, Kahvangi shennyak hük kü mophimo hatü dounyünangba shuohhen, hatü büpai dükpü kü vampü lem kü büpa mongonghen, hatü hapa kü hüshemei nyuhen vongbong; mehenangkü hapayü Kahvang leipü thintho khih.

²⁰ Kahvangi büpa kü mongongshi nyuhen shuohteke, shejao büpalei yangnyu den shohteke shei mongneshanghen vongbong.