CHONGVENBÜ 3 - DAÜLANGPÜ LAIHING (BSI)

Lemphüli kü Hepak Hük Nyüpeih

¹ Lemphüli shingvaishi hepak hük nyüpeih, vangsho phangkü lemphü dousho shingvaishi dühü hük nyüpeih:

² Bühhen hepak hük, hatü dihen hepak hük; sheihen hepak hük, hatü bhitükhen hepak hük;

³ jühen hepak hük, hatü hapa meihühen hepak hük; bentükhen hepak hük, hatü hapa linghen hepak hük;

⁴ thephen hepak hük, hatü nyihen hepak hük; mahng thephen hepak hük, hatü phaukteihen hepak hük;

⁵ yaongthü haitükhen hepak hük, hatü hathü thailanghen hepak hük; khaaiteihen hepak hük, hatü khaaiteipü vetükhen hepak hük;

⁶ yemhen hepak hük, hatü mahtükhen hepak hük; jaoei tuhhen hepak hük, hatü yaktükhen hepak hük;

⁷ Shaaktükhen hepak hük, hatü thünghen hepak hük; nenmü nyuhen hepak hük, hatü shah ehen hepak hük;

⁸ bamhen hepak hük, hatü jiühithen hepak hük; vehok hokhen hepak hük, hatü chingmei linghen hepak hük nyüpeih.

⁹ Dou dükbüi laophüi dükpü kübü mehe nanglei dangnya?

¹⁰ Kahvangi hangkuli kü shuohpü hanggovih ngei eetepih.

¹¹ Büpai lemphüli hepak vangpan kü jiüshi veinyuhüshi lingei tuhteke. Büpai hangkulei thentoimongdang kü peihdaipü hatü ngoikahen nang nyinghen mongdeih shuohteke, shejao Kahvangi chongpangpü kübü dohpü ngoishi mehe dük, ha kemei yaohen neaokpih.

¹² Hangkuli shingvaishi mongonghen hatü yemmü nyupü thahshi mei dükhen mü lenei lebü meipü meheyao neshiü shei ngei nyingpeih.

¹³ Peüi hahhen, yinghen hatü laophüi dükpü dou kü mongong danghen, hapayü Kahvangei thintho khih.

Kahdoknyü kü Shahhing Ne-epü

¹⁴ Kahvangi dükpü lemphüli denden kü nyukahen shei ngei nyingnyüke; ha kü meheyao ühen neaok, hatü haleipü yahlanghen neaok. Hangkui büpa kü dhüm shuohhen shingvaishi Kahvangi ha dükpeih.

¹⁵ Shaang mehe mehe nyu, ha shelei-üng nyuhampeih, hatü mehe nyukahen, hayao shelei mebü nyuhampeih, hatü mehe peihdai, ha Kahvangi yemkahen.

¹⁶ Nyeinya vaishi vanghenyü phangkü ngei lemhük eetepih. Shahhing epü touei shahshem eetepih; daülangpü shing kü mang eetepih.

¹⁷ Ngelei mongkü, “Kahvangi daülangpü hatü mang nyiphen shahphen shingei deikahen; mehenangkü lemphü dükhiling, hatü dousho shingvaishi ittükpü hepak hük nyüpeih” shei ngei deihteke.

¹⁸ Shao ngei ngelei mongkü, “Hangkuliyü yemhimakthü lepü khih shei nyinghühen shingvaishi Kahvangi jom doknyu khih shei ngei deihteke.

¹⁹ Hangkulei lashüh-ü yemhimakthülei lashüh kei khih; aihük lashüh-i hangku hi yemhimak nyiphen heünyüke; hük keiha hükpayao didainyüke. Peüi aihük mü ngü heenyüpeih; yemhimak mü hangkuli kü hayaoha meheyao neshiü. Lemphüli angsha khih.

²⁰ Peü kemei shing hükei dainyeih; peü kahdoki ling, hatü peü kemei kahdok leidaihen.

²¹ Hangkulei laangha shang philei aongnyeih, hatü yemhimakei laangha kahmongei shüdainyeih shei üpai nyingnya?”

²² Hangku hüki laophülei dou kü mongonghen mü lenei mei meheyao neshiü shei ngei eeteke; mehenangkü hapayü büpalei lashüh shangba kü hetdaipü dou khih. Büpa pheikü mehe vamhen ha kü veihen shingvaishi üpai shao büpa nyokei leiaokhen?