CHONGVENBÜ 11 - DAÜLANGPÜ LAIHING (BSI)

Dhaümshi Dükpü Nanglei

¹ Nüngei hahying yungching shangkü haiphongtuh; mehenangkü nyih longi angpheikü nüngi ha nyokei danghen.

² Nüngei phaihanthü shingnyet nevaijü shingshet shuohtuh; Mehenangkü kahdoknyü kü mehe vamkahen nüngi nenying.

³ Mechem phum thihhenshang kahdok kü vang keinyüpeih; Pü hük pehe lemei dohen hi apsha lemei dohenshang dopü shingei lemshi nyudainyeih.

⁴ Üami vanglük dohpü dannya, sheili nesheiaokhen; Üami vang meipü dannya, hah vethen nedanghen,

⁵ Nüngi nyü hükei vom mongei naü mekei ngüan ngüleiyei pangnya, nenyingpü keiha, lemphüli Lingbü Kahvangei dou nüngi nenyingaokpih.

⁶ Nepnüng nüngi sheili haituh, hatü om kü nüngei lak kongei tenyu; mehenangkü mepapa sheili meipüba kohhen, nevaijü nyiphen-üng meishi kohhen nüngi nenying.

⁷ Vangngaiyü vüngnyangi nyüke, hatü vanghenyü eehenü mongongbenüng nyüke.

⁸ Üami bong luangi nyuhenshang, büpai nyuyang kemei mongongshi nyutuh, shejao büpai shangmang nyihthüao deih-ei dangtuh; mehenangkü hapa nyih longi nyukahen. Peikahen shei monglempü lemphüli angsha khih.

Thehilathü kü Nangthongpü

⁹ Oh themei, lamei, nüngei thehila nyihthü kü mongongtuh, hatü thehila hepak kü nüngei mong mongonghütuh. Nüngei mongi lümpü lem kü kamtuh, hatü nüngei mük kü meipü düktuh, shejao hathü dou lemphü kü Kahvangi nüng shahphen shingei müei deihen shei deih-ei dangtuh.

¹⁰ Hanangkü nüngei mong kübü mongshang changtüktuh, hatü nüngei büm kübü shanghah yaktüktuh; mehenangkü thehila hatü kahmong nyemhalei yangnyuao angsha khih.