CHONGVENBÜ 10 - DAÜLANGPÜ LAIHING (BSI)

Yangnyu kü Lihen Shahnying

¹ Maanha mahngi vong meipü meli shie bütükpü keiha, ajükpü ngadoui kihikon hatü dhüm mahtüknyeih.

² Kon kohpüthülei mongdang lakdah lemei meenyüpeih, shejao ngapalei mongdangü laknyong lemei meenyüpeih.

³ Büpa lemnyüshong kü kamshing kao kon neshiüinyunyeih, hatü büpayü ngapa shei peü kü hunyüpeih.

⁴ Vanglem lembü hük nüng khüei mongshihjema, nüngi nüngei dousho tetuhphong; Mehenangkü nenteiaokei nyupai mang longpao tüknyüpeih.

⁵ Vanghenyü phangkü ten hük ngei eetepih hatü ongpa kübü vampü pungpü ngei eetepih:

⁶ Ngapüthüang longi shaopü uoshing kü uonyüke; shemmeithü phangpa laphen kü nyunyüke.

⁷ Aathü koyei dok shangei uopü, hatü ongthü la mü daipü ngei eetepih.

⁸ Üami kahsha shonya, jom-üng hapa kü vühen; Üami bham lowei dainya, biüi kaokhahhen.

⁹ Üami yaong bhaokei shüngnya, ha kü jom-üng ma yahhen, hatü üami pü kaaknya, laophüi-üng aokhahhen.

¹⁰ Nüngei ay neaokjema, hatü nüngi ha neyüjema wong nyeinya tüknyeih, shejao kihikoni hapa dükaoknyüpeih.

¹¹ Biü ngan shekü biüi kaoktükjema, biü nganbü shingvaishi nanglei neshiü.

¹² Kon kohpü shennyakei ju kübü shahthü kü phahji kohshi nyunyeih, shejao ngapalei shah-i hapa mangtüknyeih.

¹³ Jomei ju kübü ngashah eyei pangnyeih, hatü nemeipü ngashahyoishah eyei dohnyüpeih.

¹⁴ Ngapai shah ekhan enyüpeih; üpaiyao mehe vamhen nenyingaoknyih, hatü üpai büpa kü ngoikahen nang eshuoh-aokhen?

¹⁵ Ngapa hüki laophülei doui-üng büpa tengdainyeih; büpai shemei leihen lem dangkao nenyingnyih.

¹⁶ Hashih hüki vanglem lempü, hatü ongthüi moeitapei mon nyupü kahmükü onyükei!

¹⁷ Longli ongli kübü shennyaki vanglem lempü, hatü wong danghen shingvaishi hepak jiüshi mohitap lingpü, shejao yiüi nechokpü kahmükü moihiman!

¹⁸ Mechem shennyak vaakhenshang, büpalei shem shemmdainyeih; neshünenyiükpü shennyakei shem kü vang yiünyüpeih.

¹⁹ Nyiyeiwaei mongongmonglehen shingvaishi mo monyüpeih, hatü yiüi yangnyu mongonghünyeih, shejao lopi mon lemphü jiühünyeih.

²⁰ Nüngi mongei dangkao ongpa hük vüshih-ei tedeih, nevaijü nüngei shinshingei shemmeipa khüei tethaüvaü; Mehenangkü piteipü ouha-i nüngei shah koei lüdaihen, nevaijü yang kohpü yemi hapa shah baongtükkahen.