BHEI-IE 8 - DAÜLANGPÜ LAIHING (BSI)

Awdük Nyet

¹ Shembüpai Mosa kü,

² “Aaron kü hapakei eyeishuoh shei eteke: ‘Mechem nüngi awdük nyet haühenshang awshong shephilei vangngai khanghen mü haütuh’ ” shei e.

³ Shembüpai Mosa homei eshuohpükei Aaroni awshong philei awdük meetü jakei shemteke.

⁴ Awdükü she kübü shaong thahshi hon yah-ei shükei ling. Awshongao Shembüpai Mosa kü eshuohpükei lingteke.

⁵ Shembüpai Mosa kü,

⁶ “Lebü Israel nanglakthü khong kübü Levi am hayaoha deitü jom daütüktuh” shei e.

⁷ Jom daühen shingvaishi hapakei düktuh: Daühüpü yungi jom kü haituh, hapheikü jomei hangmum kemei kuptüktuh, hatü jomei ashakviha dhoei jom nyingi daüeilanghütuh.

⁸ Jomi mohoh chebaong hük hatü olive mainga nyettü atta yahhen, hatü nüngi mang moila shuohhen shingvaishi nyipabü mohoh chebaong yahhen,

⁹ hatü Israel am kemei thaihütuh hatü Levi am ashakshem shemshelei yaonghütuh.

¹⁰ Nüngi Levi am kemei Shembüpa touei müei deihen, hatü Israel ami jomei shangjing kü laki shinghen,

¹¹ hatü jomi ngelei dou dükaokhen shingvaishi Israel amei hayaoha thintho kei Aaroni ngei kü Levi am daüei shuohhen.

¹² Levi am daütükhen shingvaishi jomi mohoh chebaong nyilei shangjing kü jomei laki shinghen; hükü mang moila shuohhen hatü hükpayü jakpü moila shuohhen.

¹³ Nüngi Aaron hatü chehathü touei Levi am yaonghütuh, hatü ngei kü hayaoha thintho kei daüei shuohtuh.

¹⁴ Hapa keiha nüngi lebü Israel am khong kübü Levi am khaatei tuhtuh hatü jomü ngelei lompü vaihen.

¹⁵ Nüngi Levi am daüpheikü hatü hayaoha thintho kei shuohpheikü jom ashakshemei dou dükhen shingvaishi peihen.

¹⁶ Mehenangkü jomü Israel am khong kübü ngei kü lanei shuohtükpüthü; Israel am nyühathüi angpü shongpü hashongpathü nangjeiyei jomü ngelei shei yahlangpeih.

¹⁷ Mechem ngei Ijip amei hashongpathü hatü shongei shaanpü yemhimakthü jütükpa, Israel kü hashongpathü vaijao shongei shaanpü yemhimakthü vaijao ngelei lompü vaihen shingvaishi ngei jom daüei tuhpeih hatü jomü ngelei.

¹⁸ Israel amei hashongpathü nangjeiyei ngei Levi am yahlangpeih.

¹⁹ Israel am men kü ashakshemei chongphohen, hatü jom daülangpü shingei heihjü chamhilemi sheühen kübü yanghen shingvaishi ngei Israel am khong kübü Levi am jeyei Aaron hatü chehathü kü thintho kei shuohnyüpeih.

²⁰ Shembüpai Mosa kü epü keiha Mosa, Aaron hatü Israel am kempai Levi am lanei shuoh.

²¹ Levi ami jom nyingi ashakviha dhoei daütük, hatü Aaroni jomü Shembüpa kü thintho keiha shuoh, hatü jom daüdaihen shingvaishi Aaroni daütük.

²² Levi am nangkü Shembüpai Mosa homei epü keiha nanglakthüi lemphü dük, hatü hapheikü Aaron hatü chehathü phangkü ashakshemei chongphohen shingvaishi Levi am pei.

²³ Shembüpai Mosa kü,

²⁴ “Vangbong hapünga dok kübü Levi am baha peüi ashakshemei chongphopü dousho kü hean yahhen,

²⁵ hatü vangbong pinyipüan kü dou kübü dohhen.

²⁶ Hapheikü jomi jempü Levi am ashakshemei chongphopü kü sheühhen aok. Shejao jom nyingi chongnephohen. Hapa keiha nüngi Levi am kü jomei dousho haneishuoh” shei eteke.