BHEI-IE 4 - DAÜLANGPÜ LAIHING (BSI)

Levi am Kohath Phangi Dükhen Dousho

¹ Shembüpai Mosa hatü Aaron nyi kü,

² “Levi am Kohath phang kü phaakpü mükhiphangthü kübü,

³ ashakshemei chongpho aokshampü vangbong hapüan kübü pinyipüan thahshi shennyakthü peü shangkuk ietuh” shei e.

⁴ Ashakshemei Kohath ami chongphopü dousho-ü daülangpü nyüke.

⁵ Mechem baümtap shing chaiyei daihen mü vamhenshang, Aaron hatü chehathüi mongei shüei pela touei haenpü ashak nyiukei yah-ei pela kü jümhen.

⁶ Jomphongi hapa shangkü meipü phaishuwi jümhen; ha shangkü thüngla ashaki jümhen, hatü paihen shingvaishi kenh shühen.

⁷ Shembüpa kü shuohpü aan haüpü haüdü shangkü jomi ashak thüngla nyemhen hatü ha shangkü nükshung pati, ayingshü jakpü chilimji, moila shuohpü chilimji hatü yiü moila shuohhen dükthü haühen. Haüdü shangei düngei aan haüshi tuhhen.

⁸ Jomi hathü shangkü ashak hakla-i jümhen, shao ha shangkü phaishuw meipai jümhen, hatü paihen kenh lühen.

⁹ Jomi ashak thüngla hük yah-ei awshong, awdük phita hatü aw jakpü shung, hatü olive mainga shihpü dükthü kemei kü jümhen.

¹⁰ Jomi phaishuw yah-ei ha shangkü haütü haleipü douhinangthü kemei kü ngeihhen hatü paihen jaan kü haühen.

¹¹ Hon moidü shangkü jomi ashak thüngla hük yah-ei nyemhen hatü phaishuwi ha kü jümhen, hatü paihen kenh lühen.

¹² Jomi daülangpü shingei noteipü dükhiümthü peü yahhen, ha kü ashak thüngla hüki ngeihhen hatü hathü shangkü phaishuwi jümhen, hatü paihen jaan shangkü haühen.

¹³ Jomi moidü chongeipü depla maotükhen hatü manghshempü ashaki ha kü jümhen,

¹⁴ hatü jomi ha shangkü moidülei chongpho shingkü noteipü dükhiümthü, awjakshung, phai lephen haolakthü, nyüphokshung, hatü chilimjithü haühen, hatü jomi ha shangkü phaishuw yah-ei jümhen, hatü paihen kenh lühen.

¹⁵ Mechem baümtap shing chaiyei daihen hepak ngoihen, Aaron hatü chehathüi haleipü douhinangthü peü kü jümtükpheikü mon Kohath am phang peiyei hapa daülangpü douthü paiyei daihen. Shejao Kohath am phangi ha daülangpü douthü kü nehonghen, hei nevaijema jom dihen. Ashakshem shing chaiyei daishingkü Kohath am phangi hathü doulemthü dükhen.

¹⁶ Aaron ngongpalei cheha Eleazari aw jakhen mainga, ayingshü, hahying moila hatü nyiohen mainga kü veihen. Ashakshem kempü kü hatü haleipü douhinangthü lemphü kü büpai veihen.

¹⁷ Shembüpai Mosa hi Aaron nyi kü eteke,

¹⁸ Kohath am phang,

¹⁹ daülangpü douthü yopailei peipai tedihü. Henüng keipü nevamhen shingvaishi Aaron hatü chehathüi daülangpü shingei shüei shennyak ieyei kü büpalei dousho hatü mehe paihen ha nyingei hanshouhhen.

²⁰ Shejao Kohath am phangi daülangpü shing mongei shüei daülangpü douthü kü neveihen, hei nevaijema jom dihen.

Levi am Gershon Phangi Dükhen Dousho

²¹ Shembüpai Mosa kü,

²² “Gershon am jomei shemdep nyingei shangkuk ietuh” shei eteke.

²³ Ashakshemei chongpho aokshampü bahathü kemei vangbong hapüan kübü pinyipüan mong aa kübü peü shangkuk ietuh.

²⁴ Gershon am phangi dükhen hatü kohen hathü dousho nyuhen:

²⁵ Ashakshem, ashakshem kü haenpü ashak, mongei jümpü, shakdokei jümpü, ha shangkü jümpü phaishuw, shadenei haenpü ashak,

²⁶ ashakshem hatü moidü kü shinei haenpü ashak, chingshe shaden kü haenpü hatü hapa mü noteipü douhinangthü kemei jomi kohen. Jomi ha kü shenpü douthü kemei dükhen.

²⁷ Jomei dousho kemei paihen vaijao, dükhen vaijao Aaron hatü chehathüi epükei dükhen.

²⁸ Hapayü ashakshem kü Gershon am phangi dükhen dousho nyüke, hatü jomi hathü kemei Aaron ngongpalei cheha Ithamar-i epükei dükhen.

Levi am Merari Phangi Dükhen Dousho

²⁹ Shembüpai Mosa kü, “Levi am Merari phang, jomei shemdep aimü shangkuk ietuh,

³⁰ hatü ashakshemei chongpho aokshampü bahathü bong hapüan kübü hapüanpünga mong aa kübü kemei shangkuk ietuh” shei eteke.

³¹ Jomi ashakshem shemtahng, pülu, shemhathü, pübhang,

³² hatü chingshe shinei haongpü shemhathü hatü halei bhangpü pübhangthü, phuo appü, hatü vüthü hatü ha kü shenpü noteipü douhinangthü peü kü veihen. Shennyak kuk ieyei doulem laolao jungei kohen.

³³ Ashakshemei chongphohen shingvaishi Merari phang amei dousho hathü nyuhen, hatü jomi Aaron ngongpalei cheha Ithamar-i epükei dükhen.

Levi am Shangkuk Iepü

³⁴ Shembüpai epükei Mosa, Aaron hatü khong mübüthüi Kohath phang jomei shemdep aimü shangkuk ieteke.

³⁵ Vangbong hapüan kübü pinyipüan mong aa kübü ashakshemei chongpho aokshampü bahathü,

³⁶ laolao shemdep aimü iepü peüshep 2, 750 nyuteke.

³⁷ Hapayü Kohath phang kübü ashakshemei chongphopü bahathü peü sheppü nyuteke. Mosa hatü Aaron nyi-i Shembüpai epükei ieteke.

³⁸ Gershon amao jomei shemdep aimü ieteke.

³⁹ Bahathü vangbong hapüan kübü pinyipüan mong aa kübü üam ashakshemei chongphohen peipa,

⁴⁰ jomei shemdep aimü iepü peüshep 2, 630 nyu.

⁴¹ Hapayü Gershon phangthü ashakshemei chongphopüthü peü sheppü nyüke. Mosa hatü Aaron nyi-i Shembüpai epükei ieteke.

⁴² Merari phangao jomei shemdep aimü shangkuk ieteke.

⁴³ Vangbong hapüan kübü pinyipüan mong aa kübü ashakshemei chongpho aokshampü bahathü peü,

⁴⁴ laolao shemdep aimü iepü peüshep 3, 200 nyu.

⁴⁵ Hapayü Merari phang peü sheppü nyu. Mosa hatü Aaron nyi-i Shembüpai epükei ieteke.

⁴⁶ Hanangkü Mosa, Aaron hatü Israel am mübüthü Levi am peü jomei shemdep aimü ieteke.

⁴⁷ Vangbong hapüan kübü pinyipüan mong aa kübü ashakshemei chongphohen peipü bahathü peü shepei,

⁴⁸ nanglak 8, 580 thahshi nyu.

⁴⁹ Shembüpai Mosa homei eshuohpü keiha shennyak peü kü büpalei dou dükhen hatü koei daihen dousho hanshuohteke. Shembüpai Mosa kü epükei jomphongi peü kemei shangkuk ieteke.