BHEI-IE 32 - DAÜLANGPÜ LAIHING (BSI)

Jordan Yungdangei Uopü Jatthü

¹ Reuben hatü Gad phang nyilei yemhimak longi nyuteke. Mechem jomi Jazer hatü Gilead amei kahdok kü yemhimak haümhen longi meihen khih shei veiaokpa,

² jomi Mosa, Eleazar ngongpa hatü Israel am mübüthü touei peiyei,

³ “Ataroth, Dibon, Jazer, Nimrah, Heshbon, Elealeh, Sebam, Nebo, hatü Beon hathü kahdokü,

⁴ Shembüpai Israel nanglakthü kü sheüh-ei yahhüpü kahdok, yemhimak haümhen shingvaishi meipü kahdok khih, hatü hamphongei yemhimak longi nyüpeih.

⁵ Ammi mongei deihjema, ham kü hapa kahdok hamei mükjüp vaishi yahshih. Ham Jordan yungdang homei tedeishih” shei jomi eteke.

⁶ Mosai jomphong kü, “Ammei jeihinaü Israel am vehok kü daijü amphongpa hatouei nyuhüangke je?

⁷ Jordan yungyen homei Shembüpai jom kü shuohpü kahdokei peihen mehekei ammi Israel am mong vakhünya?

⁸ Ngei Kadesh-Barnea leipü kahdok dhümnüng shomshingkü ambü ampai hapa keiha dükpeih.

⁹ Jomi Eshkol kahji kahdokei shühen mong vakhüpeih.

¹⁰ Ha nyih Shembüpa mongshih, hatü vangpüshuwpü hük lingpeih.

¹¹ Mehenangkü jomi mong kempai ngei kü hingshangi nenyupü nangkü Ijip leipü vamei daipü baha bong kukha, hatü ha dok kübü üpayao ngei Abraham, Isak hatü Jakob kü lahpü kahdokei neshüaokhen.

¹² Shembüpa kü mong kempai hinglempü nangkü Ken am Jephunnehlei cheha Kaleb hatü Nunei cheha Joshua nyi mü lenei üpayao neshüaok.

¹³ Shembüpai Israel am kü mongshih, hatü büpa touei douten dükpü shennyakthü mangdikem thahshi büpai jom jahpanei bong pinyi thahshi longteihüpeih,

¹⁴ hatü shaang, hamü, amphong mangei hühihathü, Israel am shangkü Shembüpalei mongshih nyeinya koei peihen mü ambü ampa amei shing kü yaongshi nyüke.

¹⁵ Ammi büpa phei nemüjema, büpai shao nanglakthü kemei jahpanei tuhphonghen, hatü jom mahpü ammi kohen” shei eteke.

¹⁶ Hapheikü jom Mosa touei peiyei, “Hami hatouei hamei yemhimakthü shingvaishi yaongdung hatü nyühathü shing nyushing lingei penyü showei tuhshah.

¹⁷ Shejao jom shingnüng chongkhenei mangtuh thahshi hami hamei jeihinaü Israel am mü thepju kü shehongei daiyei hokhen. Hahepak mong-aa kü hamei nyühihathü hapa kahdok kübü shennyakthü lak kübü yanghen shangmü penyü showtükpü shinghiphei kü tuhphongshah.

¹⁸ Israel am peüi laophülei kahmük phaihan mangdang thahshi ham shemei nyokei neleipih.

¹⁹ Hami Jordan yungdangei jom mü mehe mükjüpao neyahhen; mehenangkü hamei mükjüpü Jordan yungyen heongphi vaihen” shei eteke.

²⁰ Hahepak kü Mosai jom kü, “Ammi epükei dükhen vaijema, Shembüpa tou kü vehokei daihen temtuh,

²¹ Shembüpai vepathü mangneütük thahshi amphong hokhen shennyakthü peü temei Jordan yungdangei daihen Shembüpa tou kü temtuh,

²² hatü Shembüpai kahdok neütükphei kü mon amphong shemei leiaokhen; mehenangkü ammi Shembüpa hatü Israel am kü etükpü keiha jiühühen vongbong. Hapheikü mon Jordan yung heongphiyü ammei kahdok shei Shembüpa tou kü nyinghen.

²³ Shejao ammi etükpü nedükjema, ammi Shembüpa tou kü mang thahhen; hatü ammei mangi am hanghihen.

²⁴ Ammei nyühihathü shingvaishi ching agei ammei mithü tuhshing lingtuh, shejao ami mehe lahpa, ha jiüshi düktuh” shei eteke.

²⁵ Gad hatü Reuben shennyakthüi Mosa kü, “Hamei mübü, nüngi epükei hami dükhen hih.

²⁶ Hamei nyühihathü, hatü mohoh hi mithü kemei Gileadei nyemnyu.

²⁷ Shejao nüngi epü keiha, Shembüpai müpü phangkü hokhen shennyakthü peü hokhen temei Jordan yungdang homei daihen” shei eteke.

²⁸ Hanangkü Mosai jomphong nangkü hapa ngeükhüam Eleazar ngongpa, Nunei cheha Joshua hatü Israel am mübüthü kü shuohteke:

²⁹ Büpai jomphong kü, “Gad hatü Reuben phang nyi kübü shennyakthüi hokhen temei Jordan yungdang homei Shembüpai müpü phangkü daiyei jomi sheüh-ei kahdok kaamaokjema, Gilead kahdokpa jomei vaihen yah-eishuoh.

³⁰ Shejao jom am mü chemi Jordan yung homei hokhen neheihküjema jomao am kei-üng Kanan kahdokei jomei kahdok phaihan danghen” shei eteke.

³¹ Gad hatü Reuben shennyakthüi jangei, “Mübü, Shembüpai mehe epa, hapakei hami dükhen.

³² Hami Shembüpai müpü phangkü hokhen temei Kanan ngoiyei heihhen, shejao hamei kahdok phaihanü Jordan yungyen heongphi vaihen” shei eteke.

³³ Hanangkü Mosai Gad, Reuben hatü Josephei cheha bhaosheipü Manasseh phang kü Amor am Sihonei ongching, Bashan am Ogei ongching, hatü ha mü chingnyüthü hatü ngeihpü shonpü kahmükthü peü omei shuohteke.

³⁴ Gad phangi Dibon, Ataroth, Aroer,

³⁵ Ataroth-Shophan, Jazer, Jogbehah,

³⁶ Beth-Nimrat hatü Beth-Haran kü penyü showei hatü mi khok veyei ha chingnyüthü lingei leiteke.

³⁷ Reuben phangi Heshbon, Elealeh, Kariathaim,

³⁸ hatü Nebo, Baal-Meon (hapa men yeiyatükteke) hatü Sibmah shei lingei leiteke. Jomi lingei leihahpü chingnyüthü kü men ja menteke.

³⁹ Manassehlei cheha Makir am phangi Gilead kahdokei heih-ei vehok neüei kahdok kaamei halei nyupü Amor am changtük.

⁴⁰ Hanangkü Mosai Makir phang kü Gilead kahdok shuoh hatü halei jom nyuteke.

⁴¹ Manassehlei hühiha Jair ami chingthü hanei hah, hatü jomi hapa kü Havvoth-Jair shei men.

⁴² Nobah-i Kenath hatü ngeihpü shonpü chingthü hah, hatü hapa kü büpalei men aimü Nobah shei menteke.