BHEI-IE 31 - DAÜLANGPÜ LAIHING (BSI)

Midian am Khüei Hokpü

¹ Shembüpai Mosa kü,

² “Israel am kü nemeipü dükpü nangkü Midian am kü bhüh yemtuh, hatü hapheikü nüng didaihen” shei e.

³ Hanangkü Mosai nanglakthü kü, “Amphong hanei-i Midian am khüei hokhen hatü Shembüpalei men kü bhüh yemhen temtuh.

⁴ Israel am jat ieyei kübü shennyak haja hükbaong shomtuh” shei e.

⁵ Hanangkü jat ieyei kübü shennyak haja hükbaong jeyei shennyak haja anpünyi vehok hokhen temei shom.

⁶ Mosai Eleazar ngongpalei chepa Phinehas, üpai daülangpü shing leipü amit vüngei shah baonghen dousho yahpa, büpa mütü jom vehokei shom.

⁷ Shembüpai Mosa kü epükei jomi Midian am khüei hok, hatü jomi bahathü kemei jütük.

⁸ Nanglakthü mü Midian am ongthü, Evi, Rekem, Zur, Hur hatü Reba hathüao jüteke. Jomphongi Beorlei cheha Balaamao omshi jütük.

⁹ Israel ami Midian am nyühathü hatü hashih naühathü, jomei yemhimakthü hatü dounyünangba kemei shetei lüdai.

¹⁰ Jomi Midian amei chingnyüthü hatü baümtapthü kemei awi haptük.

¹¹ Jomi yahpü douhinangthü, shennyak hatü yemhimakthü kemei yah,

¹² hatü Mosa hi Eleazar nyi hatü Israel nanglakthü Jeriko kübü Jordan yungyen homei Moab kahji leipü baümtap touei lei.

Veshanthü Nyokei Leidaipü

¹³ Mosa, Eleazar ngongpa, hatü Israel am khong mübüthü kemei baümtap leipü vamei veshanthü mü pongteinüng dai.

¹⁴ Mosai vehok leipü leijapü veshan mübüthü haja kü mübüthü, kho hük shak kü mübüthü kü mongshihteke.

¹⁵ Büpai, “Nyühathü nejütüki mehekei yemmü tuhpa shei jomphong kü phe.

¹⁶ Ha nyühathüyü Balaami epü phei müpüthü khih hatü Peorlei Shembüpa toueipü Israel am lemnyong kü müei lüdaipeih. Hanangkü Shembüpalei nanglakthü kü cham peihüpeih.

¹⁷ Shaang bahanaüthü kemei jütüktuh, hatü baha mü shiphei nyühathü kemei jütüktuh,

¹⁸ Pai mü ngühpü nela hatü nyühathü kemei am shingvaishi yangei tuhhahtuh.

¹⁹ Shaang amphong üpa üpai shennyak jüpa, nevaijü mahmahng kü hongtepa, baümtap leipü daiyei nyih nyet haolei nyuhen. Nyih jempabü hatü nyetpabü kü amphong hatü amphongi yepei leipü nyühathü daütükhen.

²⁰ Ashakviha hatü phaishuwi lingpü douthü, yumha mum nevaijü pü-i lingpü douthü kemei daütükhen” shei eteke.

²¹ Eleazar ngongpai vehok kübü leipü veshanthü kü, “Hapayü Shembüpai Mosa homei shuohpü shahkungnyü nyüke:

²² Aw kü jakjü nehahbenüng hon, ngin, melangnyiam, nyiam, dam hatü laktetnyiam kemei aw kü jakhen,

²³ hatü ha daüdaihen. Shejao aw kü jakjü hahtükbenüng dou lemphü daühüpü yungi daütükhen.

²⁴ Nyih nyetpabü kü amphongi laophülei ashakviha dhotükhen; hapheikü mon am baümtap mongei leiaokhen” shei e.

Vehok kü Yeppü Shennyak hatü Yahpü Douthü Hanteipü

²⁵ Shembüpai Mosa kü eteke,

²⁶ “Eleazar anji mü Israel am khong mübüthüi vehok kü yepei leipü shennyakthü hatü yemhimakthü kemei meishi ietuh.

²⁷ Hathü lemphüli shing nyi antuh, hatü shing hükü veshanthü kü, hatü shing hükkei aopü nanglakthü kü shuohtuh.

²⁸ Veshanthü kü shuohpü hean kübü shennyak vaijao, mohoh, gadu, mi nevaijü yum vaijao kho nga kübü hük yah-ei Shembüpa kü bom shuohhen khaatei tuhtuh.

²⁹ Shembüpalei hean yah-ei Shembüpa kü Eleazar ngongpa homei yah-eishuoh.

³⁰ Israel am kü shuohpü hean kübü shennyak vaijao, yemhimakthü: mohoh, gadu, mi, yum hatü lebü yemhimakthü vaijao pinyipüan kübü hük hük yah-ei Shembüpalei ashakshemei chongphopü Levi am kü shuohtuh.

³¹ Hanangkü Mosa hi Eleazar ngongpa nyi-i Shembüpai Mosa kü epükei dükteke.”

³² Veshanthüi jomphong shing tuhhahpü hatü aopü shennyakthü hatü yemhimak peüshep mi hi yum 675, 000,

³³ mohoh 72, 000,

³⁴ gadu 61, 000,

³⁵ hatü pai mü ngühpü nela 32, 000 nyuteke.

³⁶ Vehok kü daipü veshanthülei phaihan hükkei hanpeyü: mi hi yum 337, 500,

³⁷ ha khong kübü Shembüpa kü bom 675 shuohteke;

³⁸ mohoh 36, 000, ha khong kübü Shembüpa kü bom 72 shuohteke;

³⁹ gadu 30, 500, ha khong kübü Shembüpa kü 61;

⁴⁰ hatü pai mü ngühpü nela 16, 000, ha khong kübü Shembüpa kü bom 32 shuohteke.

⁴¹ Hanangkü Shembüpai Mosa kü epükei Mosai Eleazar ngongpa kü Shembüpalei hean kemei shuohteke.

⁴² Veshanthüi yahpü keiha Israel nanglakthülei hean Mosai hapakei hanei tuhteke:

⁴³ Mi hi yum 337, 500;

⁴⁴ mohoh 36, 000,

⁴⁵ gadu 30, 500;

⁴⁶ hatü pai mü ngühpü nela 16, 000 nyuteke.

⁴⁷ Shembüpai epükei Mosai Israel amei hean kübü shennyak vaijao yemhimak vaijao pinyipüan khong kübü hük hük yah-ei Shembüpalei ashakshem kü jungpülangpü Levi am kü shuohteke.

⁴⁸ Hahepak kü veshan haja shak kü, hatü kho shak kü mübüthü Mosa touei peiyei,

⁴⁹ büpa kü, “Hamphong phangkü nyupü veshanthü kemei ietuh, hatü jom hükao nemahdaiang.

⁵⁰ Hanangkü Shembüpa kü hami dangpü, hon douthü lak-aong kü sheppü hon, laktet, anguti, dhaongchü, hatü chühiyükthü yah-ei ham shingvaishi moila shuohtuh” shei e.

⁵¹ Hanangkü Mosa hi Eleazar ngongpa nyi-i jomphong leipü hon kemei chühiyük mü lingtükpü yah.

⁵² Veshan mübüthüi shuohpü hon kemei shepjü dok kho nyi hükshing nyuteke.

⁵³ Veshan mübü nevaipüthüi jomi dangpü douthü jom shing tuhlang.

⁵⁴ Hanangkü Mosa hi Eleazar ngongpa nyi-i veshan mübüthü leipü hon owhiai kemei yah-ei Shembüpa tou kü Israel ami deih-ei danghen shingvaishi ashakshemei leiteke.