BHEI-IE 30 - DAÜLANGPÜ LAIHING (BSI)

Vangpüshuwpü Nangkü Shahkungnyü

¹ Mosai Israel jat mübüthü kü, “Shembüpai hapakei enyüke” shei eteke:

² Mechem shennyak hüki Shembüpa kü lemhük shuohhen shei vangeishuwhen, nevaijü lemhük nedükhen shei vangpüshuwpü yahhenshang, büpai hapa lahtükpü nemanghen vongbong; büpai dükhen shei etükpü lemphü dükhen vongbong.

³ Mechem nela hüki chepalei shemei nyuyaki Shembüpa kü lemhük shuohhen shei vangeishuwhen nevaijü lemhük kübü yanei nyuhen shei lahhen, hatü pinnyüi lahpü chepai dantü pinnyü kü meheyao ne-ejema,

⁴ pinnyüi lahpü lemphüli dükhen vongbong.

⁵ Shejao pinnyülei chepai hapa lahpü danei hapa dükhen chepai khüamjema, pinnyüi lahtükpü nedükhen. Chepai khüampü nangkü Shembüpai pinnyü kü hapa mang tükhen.

⁶ Shem neyempü nyüha hüki nyingshangi nevaijü ngangahük kü lemhük dükhen shei lahtükpheikü, shem yemjema,

⁷ hatü chepahai hapa nyingtü meheyao ne-ejema, pinnyüi lahtükpü jiühühen vongbong.

⁸ Shejao chepahai hapa danei lahtükpü dükhen nemongjema, pinnyüi hapa lahtükpü nedükhen. Shembüpai pinnyü kü hapa mang tükhen.

⁹ Vaümnyü hük nevaijü yanei leidaipü nyüha hüki lemhük dükhen nevaijü nedükhen shei lahjema, hapa lahpü pinnyüi dükhen vongbong.

¹⁰ Shem yemdaipü nyüha hüki lemhük kübü yanei nyuhen vangjema,

¹¹ chepahai hapa dantü meheyao ne-ejema, pinnyüi lahpü peü dükhen vongbong.

¹² Shejao pinnyülei chepahai pinnyüi lahpü danei hapa dükhen nemongjema, pinnyüi hapa dükhen napü neshiü. Chepahai hapa lahpü dükhen nemongpü nangkü Shembüpai ha shingvaishi pinnyü kü mang tükhen.

¹³ Pinnyülei chepahai pinnyüi lahtükpü dükhühen nevaijü katitükhen aok.

¹⁴ Shejao pinnyüi lahpü nyih mebü-üng chepahai hapa danei meheyao ne-ejema, pinnyüi lahpü lemphüli dükhen vongbong. Büpai hapa lahpü danei meheyao ne-epü nangkü büpai hapa lahpü kü mongteke.

¹⁵ Shejao pheilei büpai hapa lahpü katitükjema, büpai hapa mang kohen.

¹⁶ Hapayü Shembüpai Mosa homei nela hük chepalei shemei nyupü hatü shem yemdaipü nyüha hük vangpüshuwpü nangkü shuohpü shahkung nyüke.