BHEI-IE 28 - DAÜLANGPÜ LAIHING (BSI)

Nyihjeih Moila

¹ Shembüpai Mosa kü,

² “Israel am kü hapakei eyeishuoh” shei eteke: “Tetpü hepak kü jiüshi ngei kü vong meipü hahying moila aw kü jakei shuohtuh.”

³ Hathüyü nyihjeih Shembüpa kü aw kü jakei shuohhen moilathü shei jom kü etuh: Kawhikang neshiüpü bong nyi lompü mi chebaongha nyi nyihjeih moilahen.

⁴ Mi hük nepnüng dhom mü moilahen, hatü hükpayü om kü moilahen,

⁵ hatü ha mü chemi hahying moila atta dok hük, olive mainga mü nyettü shuohtuh.

⁶ Hapayü Sinai Kahshangei chongpangei Shembüpa kü nyihjeih aw kü jakei shuohpü vong meipü jakpü moila nyüke.

⁷ Mi ieyei mü yiü moila dok hük shuohtuh. Shembüpa kü daülangpü shingei hapa yiü moila langeishuoh.

⁸ Dhom mü shuohpü keiha om kao hükpa mi yah-ei yiü hatü hahying moila mü shuohtuh. Hapayü Shembüpa kü aw kü jakei shuohpü vong meipü moila nyüke.

Sabbath Moila

⁹ Sabbath nyih kü kawhikang neshiüpü bong hük lompü mi baongha nyi mü atta dok nyi olive mainga mü nyettü hahying moila hatü yiü moila shuohtuh.

¹⁰ Hapayü nyihjeih shuohpü jakpü moila hatü yiü moila mü üei Sabbath ieyei hapa jakpü moila shuohhen.

Lenja Moila

¹¹ Lenja chongpang shingkü ammi Shembüpa kü jakpü moila shuohhen: Mohoh chebaongha nyi, mi chebaongha hük, kawhikang neshiüpü bong hük lompü mi nyet,

¹² hatü hahying moila atta mü olive mainga nyettü shuohtuh: Mohoh ieyei mü atta dok jem, mi chebaongha ieyei mü atta dok nyi;

¹³ hatü mi ieyei mü atta dok hük shuohtuh. Hapa jakpü moilayü Shembüpa kü aw kü jakei shuohpü vong meipü moila nyüke.

¹⁴ Mohoh ieyei mü yiü dok nyi, mi chebaongha ieyei mü yiü dok hük mü bhaoei, hatü mi ieyei mü yiü dok hük shuohhen. Bongyang kü lenja ieyei hapa jakpü moila shuohhen.

¹⁵ Nyihjeih shuohpü jakpü moila, yiü moila mü lenei yum chebaong hük Shembüpa kü mang moila shuohhen.

¹⁶ Shongpü len nyih anpüalipabü kü Shembüpa kü Hompü Mo motuh.

¹⁷ Hapa len nyih anpüngapabü kü mo hük mohen; hatü ha hepak kü nyih nyet thahshi daw neshih-i lingpü aan mon hahhen.

¹⁸ Hapa mo shongpü nyih kü ammi phopnüng thaituh hatü hapa nyih dou meheyao nedükhen.

¹⁹ Shembüpa kü ammi mohoh chebaong nyi, mi chebaong hük, hatü bong hük lompü kawhikang neshiüpü mi nyet jakpü moila shuohtuh.

²⁰ Mohoh ieyei mü hahying moila atta dok jem mü olive mainga nyethen; mi chebaongha mü atta dok nyi,

²¹ hatü mi nyet ieyei mü atta dok hük shei shuohtuh.

²² Am shingvaishi mang tükhen mang moila shuohhen yum chebaong hük shuohtuh.

²³ Hathü nepjeih jakei shuohpü moila kü üei temtuh.

²⁴ Hapa keiha nyihjeih nyih nyet mongkü Shembüpa kü aw kü jakei vong meipü hahying moila shuohhen temtuh. Hapayü nyihjeih shuohpü jakpü moila hatü yiü moila mü üei moilatuh.

²⁵ Nyih nyetpabü kü phopnüng thaituh hatü ha nyih dou tedük.

Hahvet Mo Moila

²⁶ Hatvet mo shongpü nyih kü, mechem ammi Shembüpa kü hahying ja moila shuohhen, amphong phopnüng thaituh hatü ha nyih dou tedük.

²⁷ Shembüpa kü vong meipü jakpü moila mohohbaong nyi, kawhikang neshiüpü mi chebaongha hük hatü bong hük lompü mi chebaong nyet moilatuh.

²⁸ Mohoh chebaong ieyei mü atta dok jem olive mainga mü nyethen, mi chebaongha mü atta dok nyi,

²⁹ hatü mi ieyei mü atta dok hük shuohtuh.

³⁰ Am shingvaishi mang tükhen mang moila shuohhen yum chebaong hük shuohtuh.

³¹ Nyihjeih shuohpü jakpü moila hatü hahying moila mü hathü moila hatü yiü moila shuohtuh.