BHEI-IE 25 - DAÜLANGPÜ LAIHING (BSI)

Israel ami Peor amei Baal kü Khümnyüke

¹ Mechem Israel am Kittimei nyupa, bahathüi Moab am nyühathü mü mükbongjuyungei chongpangteke.

² Ha nyühathüi jomei kahvangthü kü moila shuohpü mohitap kü shennyakthü nyük, hatü Israel ami hapa hahying hah, hatü jomei kahvangthü kü khüm.

³ Hanangkü Israel ami Peor amei Baal kahvang kü khüm, hatü Shembüpai Israel am kü longi mongshih.

⁴ Shembüpai Mosa kü, “Israel amei mübüthü kemei müei deiyei jütükkemtuh hatü Shembüpa tou kü vanghenyü kü yeemeishuoh; shejüang Shembüpai nanglakthü kü mongshihpü dohdaihen” shei e.

⁵ Hanangkü Mosai Israel am shahphenbüthü kü, “Am peüi Peor amei Baal kahvang kü khümpü laophülei nanglakthü jütuh” shei e.

⁶ Hahepak kü jom ashakshem shadenei thepeiyoungei yaongshi nyushingkü Israel am shennyak hüki Midian am nyüha hük Mosa hatü Israel ami eeshi baümtap mongei müei leiteke.

⁷ Mechem Eleazarlei cheha Phinehas, Aaron ngongpalei chehai hapa eepa, büpai khong tuhphongtü heih-ei phung hük yah-ei,

⁸ hapa Israel naüha phei müei ashakshem mongei shüei hapa Israel naüha hatü nyühanyü nyiphen kü vom kü peipeileiyei hümteke. Hanangkü Israel am mü nyupü cham dohdai,

⁹ shejao hapa cham kü shennyak 24, 000 diteke.

¹⁰ Shembüpai Mosa kü,

¹¹ “Eleazarlei cheha Phinehas, Aaron ngongpalei chehüi ngei Israel am kü mongshihpü meihütükteke; Ngei deihpü keiha jomphong touei ngelei men kü dhüm shuohhen shingvaishi büpai nyakpükenpü eeteke, hanangkü ngei mongshihpai shei jom nemahtükpeih.

¹² Hanangkü ngei büpa mü denshing chingmeivangmei vangpüshuwpü lingnyüpeih shei büpa kü eyeishuoh.

¹³ Büpa hatü büpalei hühihathüi denden ngongdou dükhen vangeishuwpü lingnyüpeih; mehenangkü büpai büpalei Kahvang kü dhüm shouhhen nyakeikenpü nyuteke, hatü büpai Israel amei mang tükhen mü dou dükteke” shei eteke.

¹⁴ Midian am nyüha mü jütükpü Israel naühalei menü Salulei cheha, Zimri, Simeon jat kü shemdep hükei mübü nyuteke,

¹⁵ hatü jütükpü Midian am nyühanyülei menü, Kozbi, Midian am phang hük kü phangpa Zurlei yiükha nyuteke.

¹⁶ Shembüpai Mosa kü,

¹⁷ “Midian am mü hoktuh hatü mahtükkemtuh;

¹⁸ mehenangkü jomi am Peorlei lueilempü hepak kü, hatü Peorlei cham peipü hepak kü jütükpü Midian am mübü hükei yiükha Kozbi, jomei nyahinaülei medhiphu kü am kü nemei-i ten dükpeih” shei eteke.