BHEI-IE 24 - DAÜLANGPÜ LAIHING (BSI)

Balaami Jempabü Tetpüvanpü

¹ Shaang mechem Israel am kü moihimanhen Shembüpai nanyu khih shei Balaami nyingpa, büpai sheleipü keiha phongneyom, shejao büpai phaü philei büpalei dhe lepei vei,

² hatü büpai Israel am jat jat baümtap vetü eeteke. Kahvang laangha büpa kü peiteke,

³ hatü büpai tetpüvanpü shah eteke: “Hapayü Beorlei cheha Balaami tetpüvanpü shah; hapayü lekei eeaokpü shennyakei tetpüvanpü shah;

⁴ Kahvangei shah danaokpü shennyakei tetpüvanpü shah; üpai Shembüpa Kahvang leipü manghkhang eenya, üpai mük vamshi shejao shomeiyingei shanya:

⁵ Nüngei ashakshem mekei nethe meipa, Oh Jakob; am nyushing mekei nethe meipa, Oh Israel!

⁶ Palm püthü lingei kohpü keiha, yungkung kübü pemong keiha, Shembüpai sheipü olive pü keiha, yungkung kübü cedar pü keiha shüke.

⁷ Jom kü vang changshi keihen, jomei sheilivungla-i yung changshi danghen. Jomei ongpayü Agag mao longpüba nyuhen; jomei ongching longei anshihhen.

⁸ Kahvangi jom Ijip leipü müei leipeih, büpa jom shingvaishi phaünya kei wong kohshi nyüke. Büpai vepa jatthü lühtüknyüke, hatü jomei vangthü nihtüknyüke; büpalei lahhani jom kü hümnyüke.

⁹ Mailang keiha jom lemeileyei nyunyüke; mailang chenyüi keiha üpai jom phukaokhen? Üpai am moihimannya, jom kao moihimanhen, hatü üami am kü thaüvaühen, jom kao thaüvaühen.”

¹⁰ Hahepak kü Balaam kü Balaki longi mongshih. Balaki Balaamei lak kü vukei düktü eteke, “Ngei nüng kü ngelei vepathü kü thaüvaühen shingvaishi nyükpeih, shejao nüngi jom kü jempa thahshi moihimanteke.

¹¹ Nüng shemei nyokei leidaituh! Ngei nüng kü thintho longi shuohhen shei lahteke, shejao Shembüpai nüng kü hapa neshuohhühen banglangpü khih” shei e.

¹² Balaami Balak kü, “Nüngi ngei touei shompü phongmokbüthü kü ngei hapakei ne-eangpü je?

¹³ Nüngi nüngei ongshemei nyupü hon hi ngin kemei yahphüjao Shembüpai epü mü lenei ngei mongpükei nemeipao meipao meheyao dükhen neaokpih. Shembüpai mehe etuh shei e, hapa mon ngei ehen shei etepih” shei e.

¹⁴ Shaang ngei ngelei nanglakthü touei nyokei leidainyeih, shejao Israel ami pheilei ammei nanglakthü kü mehe dükphahen ngei leidai shekü hapa shahvüng ephüshah:

Balaami Alipabü Tetpüvanpü

¹⁵ Hahepak kü Balaami hapa tetpüvanpü shah eteke: “Hapayü Beorlei cheha Balaami tetpüvanpü shah, Hapayü lekei eeaokpü shennyakei tetpüvanpü shah,

¹⁶ Kahvangei shah danaokpü shennyaki tetpüvanpü shah; Üpa kü Jaipübalei kon nyüpa, üpai Shembüpa Kahvang leipü manghkhang eenya, Üpai mük vamshi, shejao shomeiyingei shanya:

¹⁷ Ngei büpa eenyüke, shejao shaang nevai; Ngei büpa kü veinyeih, shejao yopailei nevai. Jakob kübü litha hük vamkahen; Israel kübü lenshuoh hük vamkahen. Büpai Moab amei mübüthü, hatü Shethlei hapeüthü kemei ngümtükhen.

¹⁸ Büpai Edom am neütükhen, büpalei vepa Seir amao neütükhen, shejao Israel am wong kohpüba leihen.

¹⁹ Jakob kübü vanglem lembü hük vamkahen, hatü nemah-i aopüthüao li hümei mahtükhen.”

²⁰ Hapheikü Balaami manghkhang kü Amalek am kü veiteke, hatü hapa tetpüvanpü shah eteke: “Jatthü khongkü peü mü shongpeyü Amalek am, shejao hapalei dohpeyü denden kü mahhen ha nyüke.”

²¹ Hapheikü büpai Ken am kü veiteke, hatü hapa tetpüvanpü shah eteke: “Am nyushingü vepa kübü yanghen, hatü yaongvak kü jep lingpükei nyüke;

²² Shejao Ken amü aw kü shamtükhen temtüktü nyüke. Assyria ami am wüpküpei meshük lushi tuh-aokhen?”

²³ Balaami hapa tetpüvanpü shah eteke: “Oh mechem Kahvangi hapa dükhenshang, üpa yemmü nyuaokhen?

²⁴ Kittim leipü vepathü jahas kü peikahen; Jomi Assyria hatü Eber am neütükhen, shejao jomao hapakei mahdaihen.”

²⁵ Hapheikü Balaami layaongei shemei leidai, hatü Balakao büpalei lemei leidai.