BHEI-IE 22 - DAÜLANGPÜ LAIHING (BSI)

Balaki Balaam kü Nyükpü

¹ Hapheikü Israel am Moab kahjilei layaongei dai, hatü Jeriko mü khangteishi Jordan heongphi kü baümtap veteke.

² Shaang, Moab ongpa Zipporlei cheha Balaki Amor am kü Israel ami mehe dükshuohpa ha eeyei,

³ Moab ami Israel am kü longi nyem; mehenangkü jom shennyak longi shiüteke.

⁴ Moab ami Midian am mübüthü kü, “Mohohbaongi thüng meakei hahpükei hapa khongi jen shonei nyupü lemphüli laiyei hahtükhen khih” shei eteke. Hanangkü Zipporlei cheha, Moab amei ongpa Balaki,

⁵ Amaw kahdok Euphrates yungyen yopailei Peorlei cheha Balaam nyükhen shingvaishi phongmokbü shomei Balaki eteke: “Ijip leipü nanglak khong hük peiyei shing peülei yaüshi nyüke, hatü ham yopailei nyüke.

⁶ Hanangkü peikütuh hatü hathü nanglakthü kü thaüvaüeishuoh; mehenangkü ham meyü jom-üng nyeishi, wong kohshi nyüke, Shejao üpai nyingpa, hami-ang neütü kahmük kübü changtükhen aokpeih. Mehenangkü nüngi moihimanpüthüi moihiman dangnyüke, hatü nüngi thaüvaütükpüthü kü thaüvaü hetnyüke.”

⁷ Hanangkü Moab hatü Midian am mübüthüi thaüvaüpü kü shuohhen lat kotü Balaam yemei daiyei Balaki shompü shahjang ejateke.

⁸ Balaami jomphong kü, “Sheya hammü paümtuh, hatü ngenyih Shembüpai ngei kü mehe ephahen shah-om yahphahen” shei eteke. Hanangkü Moab am mübüthü ha ya büpa mü paümteke.

⁹ Kahvang Balaam touei peiyei, “Nüng mü paümpü shennyakthü üamang?” shei phe.

¹⁰ Balaami Kahvang kü, “Zipporlei cheha, Balak, Moab ongpai hathü ngei touei shompü khih:

¹¹ Ijip leipü vamei daipü nanglakthüi kahmük madaiteke. Hanangkü peikütuh hatü hathü nanglakthü kü thaüvaütükkütuh. Shejüang üpai nyingpa, hami jom neütüktü kahmük kübü changtükhen aokpeih shei hapa shahjang shompü khih” shei eteke.

¹² Shejao Kahvangi Balaam kü, “Nüng jomphong mü tedai, hatü hathü nanglakthü kü tethaüvaü; mehenangkü jomphongü moihimanpüthü nyüke” shei e.

¹³ Nepphei Balaami Balakei phongmokbüthü kü, “Ammei kahmükei leidaituh; mehenangkü Shembüpai ngei kü amphong mü tedai shei ephopeih” shei eteke.

¹⁴ Hanangkü Moab am phongmokbüthü Balak touei nyokei leiyei, “Balaami hamphong mü nedaiküpih shei ephopeih” shei eteke.

¹⁵ Shao Balaki mübüthü khong longpü hük, shongpüthü mü longi shongnyü shennyakthü shom.

¹⁶ Jomphong Balaam touei peiyei, “Zipporlei cheha Balaki hapakei enyüke: ‘Nüng ngei touei nepeiaokhen mü meheyao teling!

¹⁷ Ngei nüng kü thintho changshi yahphahen, hatü nüngi mehe ephahenshang ngei dükphahen hih. Peikütuh, hatü hathü nanglakthü kü thaüvaütükkütuh’ ” shei e.

¹⁸ Shejao Balaami jomphong kü, “Balaki büpalei ongshemei nyupü hon hi ngin kemei yahphüjao Shembüpa, ngelei Kahvangi epü shahkung mü lenei douha vaijao dounyü vaijao meheyao nedükaokpih.

¹⁹ Lebüthü kei sheya hammü paümtuh, hatü Shembüpai ngei kü ephahen meheyao nyülashang ngei nyinghüshah” shei eteke.

²⁰ Ha ya Balaam touei Kahvang peiyei, “Hathü shennyakthüi nüng kü nyüknüng peipü vütei-i jomphong mü daijatuh, shejao ngei nüng kü mehe epa, ha mon düktuh” shei eteke.

²¹ Hanangkü nepphei Balaami büpalei gadu kü uotü Moab am mübüthü mü dai.

Balaam hatü Büpalei Gadu

²² Shejao Balaam daipü nangkü Kahvang mongshih, hatü Balaami büpalei gadu kü uotü büpalei chongphobü nyi müei daishingkü Shembüpalei vangsho phongshan yiüei lem bangei yaong.

²³ Mechem gadu-i lemba bangei vangsho phongshani yanlu notü yaongpü eepa, lem kübü yanei kah philei heihteke. Balaami lemei müei leinüng shei longi pinnyü kü bheiteke.

²⁴ Hahepak kü nyalingngupai kah nyi aa kü dangpongei kahkung kohshi nyupü lem shoshippü shingkü Shembüpalei vangsho phongshan yaong.

²⁵ Mechem gadui vangsho phongshan eepa, pinnyüi kahkung lemei yawei heih, hatü Balaamei la kahkung kü ngümshuoh. Hanangkü Balaami shao gadu kü bheiteke.

²⁶ Hahepak kü Shembüpalei vangsho phongshan shelemei heih-ei laknyong lakdah melemeiyao yakhen nemeipü shoshihpü shingkü yaong.

²⁷ Mechem gadui hapa vangsho phongshan eepa, pinnyü Balaam phangei lemteke, hatü büpa mongshih-ei lenshuoh yah-ei longi gadu kü üpteke.

²⁸ Hahepak kü Shembüpai gadulei ju aphü, hatü pinnyüi Balaam kü, “Nüngi ngei kü jempa thahshi üphen mü ngei nüng kü mehe shaiphopa?” shei e.

²⁹ Balaami, “Mehenangkü nüngi ngei lueilempeih! Ngelei lakei yan nyulangmeyü ngei shaang-üng nüng jütükhah shepeih” shei e.

³⁰ Gadui Balaam kü, “Ngeiyü shinnyih thahshi nüngi uoteipü gadu nevaipü je? Ngei nüng kü mechemshangao hapakei dükpha-ei nyüpü je?” shei e. “Nedükpha,” shei büpai e.

³¹ Hahepak kü Shembüpai Balaamei mük aphü, hatü büpai lembalei vangsho phongshan yanlu notü yaongshi ee. Hanangkü Balaami kahdok lemei dhe thaungei sha.

³² Vangsho phongshani büpa kü, “Mehekei nüngi hapakei nüngei gadu kü jempa thahshi üppa? Ngei nüngei yendai lem banghen peipeih; mehenangkü ngei touei nüngei yendai nejiüang.

³³ Shejao nüngei gadui ngei eeyei jempa thahshi nyokei leiteke. Pinnyü paoh nyokei neleilangmeyü shaang keiyü ngei-i nüng jütüktü nyuhah shepeih, shejao gadupa yanglanghah shepeih” shei eteke.

³⁴ Balaami vangsho phongshan kü, “Ngei mang thahteke. Ngelei yendai lem banghen nüng lemei yaongshi nyüpeih shei ngei nenyingangpih. Nüngi ngelei yendai nejiüang shei deihjema, ngei nyokei leidaihen” shei e.

³⁵ Shejao vangsho phongshani Balaam kü, “Ha shennyakthü mü daituh, shejao ngei mehe nüng kü epa, hapa mon etuh” shei e. Hanangkü Balaam jomphong mü dai.

Balaki Balaam Ombompü

³⁶ Mechem Balaam peikünyükeja shei Balaki danpa, Balaki Moab amei viong Arnon yungyen yopailei nyupü Ar chingnyü thahshi Balaam ombaong sha.

³⁷ Balaki Balaam kü, “Shongei ngei nüng kü nyüknüng shomjü mehekei nepeiküpa? Ngei nüng kü thintho lak-ai changshi neyahpha-ü khih shei deihküpü je?” shei e.

³⁸ Balaami, “Ngei shaang peikünyeih” shei jangteke. “Shejao ngei nüng kü mehe ephaaokhenang? Kahvangi mehe etuh shei e, hapa mon ephahen” shei e.

³⁹ Hanangkü Balak mü Balaam Kiriath-Huzothlei heih.

⁴⁰ Balaki mohoh hatü mi yah-ei jakpü moila shuoh, hatü ha hanei Balaam hatü büpa mü nyupü mübüthü kü shuoh.

⁴¹ Nepphei Balaki Balaam müei Bamoth-Baal shei epü shingei aong, hatü hatoueipü büpai Israel nanglakthü hanei eeteke.