BHEI-IE 21 - DAÜLANGPÜ LAIHING (BSI)

Kanan am Neütükpü

¹ Mechem Negebei nyupü Kanan amei Arad ongpai Israel am Atharim lemei peikünyüke shei danpa, büpai Israel am mü hokteke hatü hanei yepei yahteke.

² Hahepak kü Israel ami Shembüpa touei vangpüshuwpü hük lingteke: “Nüngi ha shennyakthü hamei lak kü yahphüjema, hami chemjalak kü jomei chingnyüthü mangtükhen.”

³ Shembüpai jomi phepü danei Kanan neütükhen sheühteke. Israel ami chemjalak kü jom hatü jomei chingnyüthü mangtük; hanangkü hapa shing kü Hormah shei nyükteke.

Melangnyiami Lingpü Biü

⁴ Jomi Hor Kahshang leipü Edom kü shonei daihen nangkü Hakla Yungchingei daipü lem kü daiteke. Shejao lemei nanglakthüi nenenteiaoki leiteke,

⁵ hatü Kahvang hatü Mosa nyi khüei, “Jahpanei dihününg mehekei Ijip leipü ham müei daipa? Hahying neshiü! yinghen yung neshiü! Henüng nemeipü hahyingi tengteke” shei eteke.

⁶ Hahepak kü Kahvangi leü nemeipü kohpü biü jom kü shomei hapai jom kü kaokhütü Israel am dihüteke.

⁷ Nanglakthüi Mosa touei peiyei, “Hami Shembüpa hatü nüng khüei eela shingkü mang thahteke. Shembüpai ham toueipü biü yahlanghen phopeishuoh” shei e. Hanangkü Mosai nanglakthü shingvaishi phop.

⁸ Hahepak kü Shembüpai Mosa kü, “Melangnyiam yah-ei biü hük lingtuh, hatü lüng kü japtü haongtuh; biüi kaokhahpüthüi hapa kü veijü meidaihen” shei e.

⁹ Hanangkü Mosai melangnyiam yah-ei biü hük ling, hatü lüng kü hapa japtü haongteke. Mechem shennyak hanei kü biüi kaokhenshang, hapa melangnyiami lingpü biü kü veiteke, hatü meidaihamteke.

Hor Kahshang Leipü Moab Kahji Ngoipü

¹⁰ Israel ami daiyei Obothlei baümtap ve,

¹¹ hatü Oboth leipü layaongei daiyei Moab kahdok heongphi Iye-Abarimlei baümtap ve.

¹² Shao haleipü jom daiyei Zared Kahjilei baümtap ve.

¹³ Jom haleipü layaongei daiyei Arnon yungyen heongphi kü Amor kahdok thahshi heihpü jahpanei baümtap veteke. Arnon yungyenü Moab hi Amor nyi aa kü viong nyuteke.

¹⁴ Hanangkü Shembüpalei Vehok Laitap kü hapakei enyüke: “Suphah kübü Waheb hatü kahjithü; Arnon yungyen,

¹⁵ hatü Ar jila kübü kahji vienla heihdaipü Moab viong thahshi nyüpeih.”

¹⁶ Haleipü jomi Beer shei epü shing hükei dai; halei Shembüpai Mosa kü, “Nanglakthü chemi thaihütuh hatü ngei jom kü yung shuohhen”, shei e.

¹⁷ Hahepak kü Israel ami hapa kesho lokteke: “Yung ngaishih, Oh yunglok! Hapa jung hami kesho lokhen,

¹⁸ Ongthüi shuohpü yunglok nang, hatü nanglak mübüthüi, Ongthülei veikaoki shopü, hatü jomei lenshuohthüi.” Hapheikü jomi jahpan leipü Mattanahlei layaongei dai,

¹⁹ hatü Mattanah leipü Nahaliel, Nahaliel leipü Bamoth,

²⁰ hatü Bamoth leipü Moab kahji thahshi dai, hatü Pisgah shangching leipü yingnyü kü shüngshi veiteke.

Sihon hatü Og Ongpa Nyi Neütükpü

²¹ Hapheikü Israel ami Amor amei ongpa Sihon touei phongmokbü shomei hapakei eteke:

²² “Hami ammei kahdok peih-ei daishah. Ham hatü hamei yemhimaki lemnyü kübü yanei ammei kah, nevaijü nyalingngupai kah kü nekamhen, hatü ammei yungkuk leipü yungao neyinghen. Ammei kahmük mangpeihkem thahshi hami lemnyüshong kü mon daihen.”

²³ Shejao Sihoni büpalei kahmük peih-ei Israel am mü hokhen jahpanei deishih. Mechem büpa Jahaz ngoipa, büpai Israel am mü hok.

²⁴ Shejao Israel ami vepathü longi jü, hatü jomei kahdok Arnon yungyen kübü Jabbok thahshi heih-ei Ammon amei viong thahshi mon yah; mehenangkü Ammon amei viongü longi wong kohshi pe showlangtü nyuteke.

²⁵ Hanangkü Israel ami Amor amei chingnyüthü kemei, ha mü chemi Heshbon hatü ngeihpü shonpü shingthü peü omei yahteke, hatü hathülei uoteke.

²⁶ Heshbonü Amor am Sihon ongpalei chingnyü nyuteke; büpai shongpü Moab amei ongpa mü hok, hatü büpalei kahdok kemei Arnon yungyen thahshi omei yahlangteke.

²⁷ Hanangkü kesho venbüthüi hapakei enyüke: “Heshbonei peikei hatü ha linghütuh; Sihon chingnyüchonglingtuh.

²⁸ Chem hapa chingnyü leipü, Sihonei veshanthü aw kei vamei daiteke; Hapai Moab leipü Ar chingnyü, hatü Arnon leipü kahshangthü lühtükteke.

²⁹ Oh Moab am, amphong onyükei! Am Kemosh kü khümpüthü, am bhihdai maandaiteke. Ammei kahvangi amü chingyan kahpaan am leihütükteke, hatü ammei yiükhathü Amor am Sihon ongpai yepei wüpküpei deishihtükteke.

³⁰ Shejao shaang hami jom, Heshbon kübü Dibon thahshi, Nophah kübü Medeba thahshi mahtüktih.”

³¹ Hanangkü Israel nanglakthüi Amor kahdokei uoteke,

³² hatü Mosai Jazer chingnyü hahhen shingvaishi ve veihen shom, hatü Israel ami hapa shing hatü ngeihpü shonpü shingthü hahtük, hatü haleipü Amor am changtük.

³³ Hapheikü Israel ami nyokei Bashan lemei aong, hatü Bashan ongpa Og hatü büpalei veshanthü kemei Edreilei jom mü hokhen dai.

³⁴ Shembüpai Mosa kü, “Büpa kü tenyem; mehenangkü ngei nüngei lak kü büpa hatü büpalei veshanthü hatü jomei kahdok shuoh-ei nyüpeih. Heshbonei vanglem lempü Amor ongpa Sihon kü mekei dükshuohpa, hapakei jom kao dükeishuoh” shei e.

³⁵ Hanangkü Israel ami Og ongpa, chehathü hatü büpalei nanglakthü hükao aoei netuh-i jütük, hatü jomi kahdok yahlang.