BHEI-IE 18 - DAÜLANGPÜ LAIHING (BSI)

Ngongpathü hatü Levi amei Dousho

¹ Shembüpai Aaron kü, “Daülangpü shing nangkü lemhük kü dangkao huluh shuohjema, nüng, anhathü hatü Levi ami hapa mang kohen; shejao ngongdou nangkü lemhük kü dangkao huluh shuohjema, nüng hatü anhapeüthü monhai ha mang kohen.

² Ashakshemei chongpho shingkü nüng hatü anhapeüthü kü sheühphahen shingvaishi nüngei jeihinaü Levi am müei deituh.

³ Jomphongü nüng mü sheühteihen hatü ashakshemei lemphü dou dükhen shejao jomi daülangpü shing nevaijü moidü leipü daülangpü douthü yopailei neheihhen. Jom hapakei heihjema, jom hatü nüngao chem kü dihen.

⁴ Jomi nüng mü sheühteiyei ashakshem leipü dou peü jungeilangei dükhen, shejao lebü shennyak üpaiyao nüng yopailei neheihhen.

⁵ Ngelei mongshih Israel am kü shao nepeihen shingvaishi nüng hatü anhathü moni daülangpü shing hatü moidü leipü dou peü dükhen.

⁶ Ngei anjei anaü Levi am Israel khong kübü nüng kü thintho hük vaishi jepeih. Ashakshemei dou dükhen shingvaishi ngei jom daütükpeih.

⁷ Shejao nüng hatü anhapeüthüi mon ngongpa kei moidü hatü Longi Daülangpü Shingei chongphohen. Ngei nüng kü thintho hük vaishi hapa ngongdou shuohpeih. Üpai daülangpü douhinang yopailei heihhenshang dihen” shei eteke.

Ngongpathülei Phaihan

⁸ Shembüpai Aaron kü, “Jakpü moila nevaijü lebü nyeinya moila Israel ami ngei kü shuohpü kemei nüng hatü anhapeüthü kü den shingvaishi ammei phaihan vaishi shuohnyüpeih.

⁹ Moidülei nejakpü longi daülangpü moilathü: hahying moila, mang moila, pungpü moila kemei nüng hatü anhapeüthülei phaihan nyüke.

¹⁰ Hapayü daülangpü shingei hahtuh; baha peüi hapa hahhen. Hapayü daülangpü shei noteituh” shei e.

¹¹ Ha mü chemi, Israel ami hayaoha moila ngei kü shuohjema, hayao ammei vaihen. Den shingvaishi hayü ngei nüng kü, nüngei yeshangthü hatü yiükhathü üpa üpai hapa hah-aokhen mü daülangi nyu, hathüi hahhen shuohpeih.

¹² Israel ami Shembüpa kü shuohpü peü mü meipü olive mainga, yiüja hatü hahying jomi shongei vaümpü betjük, ha ngei nüng kü shuohpeih.

¹³ Kahmük kü vampü shongpü betjük jomi Shembüpa kü moilapü kemei ammei nyüke. Amshem üpai hapa hah-aokhen mü daülangi nyu, hapai hahhen aok.

¹⁴ Israel kü nyupü lemphüli Shembüpa kü shuohpü kemei nüngei hean nyüke.

¹⁵ Shongei angpü hashongpathü, shongei shaanpü yemhimak Israel ami Shembüpa kü shuohpü kemei nüngei hean nyüke. Shejao hashongpa hatü shongei shaanpü yemhimakthü angei leihen shingvaishi shuohpü lop nüngi yahlangshuohhen vongbong.

¹⁶ Mechem naü lenyang hük lomhenshang, shuohteipü bhei vanglem keiha ngin nga shuohtü shakei leihen.

¹⁷ Shejao shongei shaanpü mohoh, mi hatü yumhayü angei leihen neaok; shejao hathüyü moidülei iy haiyei, aw kü hathülei cheü jakei Shembüpa kü vong meipü moila shuohtuh.

¹⁸ Hayaoha moila kübü khaapa hatü shüngdah nüngi yahteipükei hapalei phai nüngei vaihen.

¹⁹ Israel ami Shembüpa kü shuohpü peü kemei ngei nüng hatü nüngei yeshangthü hatü yiükhathü kü den shing phaihan vaishi shuohnyüpeih. Hapayü Shembüpa tou kü nüng hatü anhapeüthüi den shingvaishi vangteishuwteipü hüm nyüke.

²⁰ Shembüpai Aaron kü, “Nüngi mepa douhinangao mükjüp nedanghen, hatü Israel amei kahdok phaihan nüng kü neyahphahen. Shembüpa, ngeiyü nüngei mükjüp” shei eteke.

Levi amei Phaihan

²¹ Shembüpai eteke, “Israel ami ngei kü shuohpü ankhong lemphü ngei Levi am kü ashakshemei chongphopü nangkü shuohtüktih.

²² Shaang mebü Israel ami ashakshem yopailei neheihhen, hei nevaijema jomei mang lat jomi kohen hatü dihen.

²³ Shaang mebü Levi ami mon ashakshem kü jungeilangei chongphohen hatü hapakei dousho kemei jomi kohen. Hapayü hüdenhalenshi dükhen shahkungnyü nyüke. Levi ami lebü Israel am kei mükjüp neyahhen.

²⁴ Ha nangjeiyei Israel ami Shembüpa kü hayaoha ankhong moila shuohpü jomei mükjüp vaishi ngei Levi am kü shuohnyüpeih.” Hanangkü jom Israel am mü mükjüp neshiü shei ngei jom kü etepih.

Levi amei Ankhong

²⁵ Shembüpai Mosa kü,

²⁶ Levi am kü hapakei etuh shei eteke: “Mechem ammi Israel am leipü ankhong Shembüpai amphong kü mükjüp kei shuohpü danghenshang, ammi Shembüpa kü ankhong kübü ankhong phaihan hük hayaoha moila kotuh.

²⁷ Hapa moilayü kahling ami hahying hatü yiüja moilapü mü hükkeipü shei ithen.

²⁸ Hapa keiha amphongiyao Israel am leipü dangpü ankhong peü kübü Shembüpa kü moila shuohhen. Ha ankhong kübü amphongi Shembüpalei hean Aaron ngongpa kü shuohhen.

²⁹ Ammi dangpü lemphü kübü peü mü meipü hatü daülangpü phaihan yah-ei Shembüpalei hean shuohtuh.”

³⁰ “Levi am kü etuh: ‘Mechem ammi peü mü meipü phaihan shuohhenshang, kahling ami moila shuohtükphei kü aopü tuhhahpükei aopü kemei ammi tuhhahtuh.

³¹ Nüng hatü am shemi melei melei shangkü hahhen aokhen; mehenangkü hapayü nüng ashakshemei chongphopü nangkü nüngei lat nyüke.

³² Shembüpa kü peü mü meipü phaihan shuohtükphei keyü ammi hahhen aok, hatü hapa kü shaidaipü neshiü. Shejao Israel ammi shuohpü moila kübü peü mü meipü phaihan yah-ei moila neshuoh-i hahpai mang nethahhen kentuh. Ammi ven bangei dükjema, nedihen’ ” shei eteke.