BHEI-IE 17 - DAÜLANGPÜ LAIHING (BSI)

Aaronei Lenshuoh

¹ Shembüpai Mosa kü,

² “Israel am kü phangdep ieyei kübü mübüthü leipü lenshuoh hükbaong yah-ei lenshuoh anpünyi nüng kü shuohhen eyeishuoh. Shennyak ieyei laophülei lenshuoh kü men nyanghütuh.

³ Levi amei lenshuoh kü Aaronei men nyangtuh; mehenangkü jat ieyeilei mübü shingvaishi lenshuoh hükbaong nyuhen.

⁴ Ashakshem mongei ngei am mü pongteipü Vangpüshuwpü Pela touei deiyei haütuh.

⁵ Ngei jepü shennyakei lenshuoh kü nien vamkahen, hatü Israel ami nüng khüei eelapü ngei dohtükhen” shei e.

⁶ Hanangkü Mosai Israel am kü ha e, hatü jat ieyeilei mübüthülei lenshuoh hükbaong yah-ei mübüthüi büpa kü lenshuoh anpünyi shuoh, hatü Aaronei lenshuoh-ao hathü mü tuhteke.

⁷ Mosai ha lenshuohthü yah-ei ashakshemei Vangpüshuwpü Pela touei haüteke.

⁸ Nyihphei Mosa ashakshem mongei shüjashingkü Levi jat men kübü Aaronei lenshuoh kü nien neenei ee. Hapa kü nien neenei, bong pungei almond betjükshüm jükei chongjateke.

⁹ Mosai lenshuoh kemei voukei vamei Israel am kü huteke. Mehe vampa jomi ha ee, hatü mübüthü peüi laophülei lenshuoh yahlang.

¹⁰ Shembüpai Mosa kü, “Aaronei lenshuoh Vangpüshuwpü Pela touei leiyei tuhphongtuh. Hapayü ngei khüei eelateipü Israel am, jom eelapü dohhühen shingvaishi lihen shahvüng hih, hei nevaijema jom dihen” shei e.

¹¹ Shembüpai büpa kü epükei Mosai dükteke.

¹² Israel ami Mosa kü, “Hamü hajük khih! Peü mahshasha khih!

¹³ Hanei-i ashakshem yopailei mon-üng heihpü kü dihen vaijema, ham peü dihen khih yo?” shei eteke.