BHEI-IE 16 - DAÜLANGPÜ LAIHING (BSI)

Korah, Dathan hatü Abiram Hathüi Mosa Khüpü

¹ Shaang Izharlei cheha Korah, Levi am Kohath phang kübü hatü Reuben am Dathan hatü Abiram, Eliabei cheha nyi, hatü Pelethlei cheha On hathü mü,

² lebü Israel am chingling uoshing kü nanglak meipü vaishi jepü men-e, khong müteipü shennyak 250 thahshi Mosa khüei yaongteke.

³ Jomi Mosa hi Aaron nyi khüei khong lingtü peiyei jiji kü, “Anjinyi ahshi beiteke! Khong hatü nyülompaja peü daülangi nyüke, hatü Shembüpa jom mü nyüke. Mehekei anjinyi-i Shembüpalei nanglakthü dok kü aongnya?” shei eteke.

⁴ Mechem Mosai hapa danpa, büpai kahdokei dhe shüshi do,

⁵ hatü büpai Korah hatü büpa phei müpüthü kü, “Ngenep Shembüpai üpa üpa büpalei, üpa üpa daülangpa ha huphahen, hatü üpa shennyak büpai jenya, büpa yopailei peihahkahen.

⁶ Korah, nüng hatü nüng phei müpüthü peüi hapa düktuh; ayingshü jakpü shung deituh,

⁷ hatü ngenyih Shembüpa touei haleipü ayingshü kü aw jaktuh, hatü Shembüpai üpa jehenshang hapa shennyak daülangpü vaihen. Levi am amphongang ahshi beiteke” shei e.

⁸ Mosai nedoh-i Korah kü, “Bangtuh, am Levi am!

⁹ Israel Kahvangi am lebü Israel am khong kübü hayaoha anei Shembüpalei ashakshemei chongphohen shingvaishi büpa yopailei deiyei khong khong chongphohen dousho shuohpeyü douha hih shei deihnyu je?

¹⁰ Büpai am hatü Levi am kemei büpa yopailei peihüteke, shejao shaang ammi ngongpa heanao yahhen khenyu khih!

¹¹ Am Aaron khüei yaongpeyü Shembüpa khüei nüng hatü nüng phei müpüthüi yaongnyu khih” shei e.

¹² Hahepak kü Mosai Eliabei cheha Dathan hi Abiram nyi kü nyükteke. Shejao jijinyi-i, “Henji nepeiküpih.

¹³ Amma hatü nyahjiü yenpü kahdok leipü jahpanei ham dihününg müei daipaiyao nüng kü mongnehamang je? hatü shaangao nüngü ham shak kü shembü vaihüpü je?

¹⁴ Nüngi ham amma hatü nyahjiü yenpü kahdokei müei nedaiangpih, nevaijü kah hatü nyalingngupai kah mükjüp vaishi neshuoh-angpih, hatü shaang nüngi hapa shennyakthülei mük luktüktü lueilemhen shei deihnyu je? Ham nepeiküpih” shei e.

¹⁵ Mosai mongshih-ei Shembüpa kü, “Hathü shennyakthülei moila teyah; ngei jomphong üpayao nenyonghüangpih, nevaijü jom leipü gadu hük dangkao neyah-angpih” shei eteke.

¹⁶ Mosai Korah kü, “Ngenyih nüng hatü nüng phei müpü shennyak 250 kemei Shembüpalei ashakshemei peikei; Aaronao halei chongkahen.

¹⁷ Amphong shennyak 250 peüi ayingshü jakteipü shung nohen, ha kü ayingshü shihhen hatü Shembüpa kü shuohhen. Aaron anjiyao laophü laophülei ayingshü shung nohen.

¹⁸ Hanangkü shennyak peüi laophü laophülei ayingshü shung noteke; ha kü awtao hatü ayingshü shihtü Mosa hi Aaron nyi mü ashakshem shadenei yaongteke.

¹⁹ Mechem Korah-i büpa phei müpüthü peü thaihütü ashakshem shadenei Mosa hi Aaron nyi mü dhe khangteiyei yaongpa, Shembüpalei müknyinshekhangi jom peü kü khang,

²⁰ hatü Shembüpai Mosa hi Aaron nyi kü,

²¹ ‘Hathü toueipü khaatei lüdaituh; ngei shaang-üng hathü jütükhen’ ” shei e.

²² Shejao Mosa hatü Aaron nyi-i kahdok philei dhe thaungei shatü lenei, “Oh Kahvang, hangkuli peüei laangha shak kü Kahvang, shennyak hüki mon mang thahjü khong peü kü nüngi mongshihhen je?” shei e.

²³ Shembüpai Mosa kü,

²⁴ “Nanglakthü kü Korah, Dathan hatü Abiram, hathülei ashakshemthü leipü lüdaituh shei eyeishuoh” shei eteke.

²⁵ Hapheikü Mosai Israel am mübüthü mütü Dathan hatü Abiram nyi touei pei.

²⁶ Büpai nanglakthü kü, “Hapa nemeipü shennyakthülei ashakshem leipü lüdaikemtuh, hatü jomei doulem mepa kao laki tehong, hei nevaijema jomei mang tata kü amao jom mü maolanghen” shei e.

²⁷ Hanangkü jom Korah, Dathan hatü Abiram hathülei ashakshemthü leipü lüdaikem. Dathan hatü Abiram nyi vamei ashakshem shadenei chenyüha nyi, hapeüthü mü yaongshi nyu.

²⁸ Mosai nanglakthü kü, “Hapa keiha Shembüpai hathü dou dükhen Shembüpai ngei shompü khih hatü hayü ngei mongpükei düknyu nevai shei amphongi nyingtuh.

²⁹ Ha shennyakthü dimei mü dijema hatü hangku kü nyingnyoi kü heübenüng kei heüjema, Shembüpai ngei neshom shei nyinghen!

³⁰ Shejao Shembüpai chemjalak kü lemhük douja vamhüjema hatü kahdok kaei jomphong lühtükjema, hatü jomei douthü lemphüli, hatü jomphongao yemmü Sheolei shüdaijema, hathü shennyakthüi Shembüpa nyonghüteke shei amphongi nyingtuh” shei e.

³¹ Büpai shah eyei dohhinüng jom yaongpü shing kahdok ka,

³² hatü jomei shem am, Korah phei müpüthü, hatü jomei mophimo kemei kahmongei dungdai.

³³ Jom yemmü Sheolei jomei mophimo mü dungdai, hatü kahdoki jom küpei linlang, hatü jom khong kübü mahdai.

³⁴ Jomphong vaüpü eepü danei Israel am kemei, “Kahdoki jenao linlanghen khih” shei lenyaki nyaidaikem.

³⁵ Hatü Shembüpai aw shomei ayingshü jakei moilapü shennyak 250 kemei shamtük.

Ayingshü Jakpü Shing

³⁶ Hapheikü Shembüpai Mosa kü,

³⁷ “Aaron ngongpalei cheha Eleazar kü ayingshü jakpü shungthü thailanghen eyeishuoh, hatü haleipü awtao melei shangkü deiyei haitüktuh.

³⁸ Jomei yangnyu lomohpai hapa mang shennyakthülei ayingshü jakpü shungü daülangi leiteke. Hathü yah-ei baünyangi dhüngtuh, hatü moidü kü küpteihen lingtuh; mehenangkü hathüyü Shembüpa kü shuohteke, hatü daülangi leiteke. Hathüyü Israel am kü nyangeihepü hük vaikahen” shei e.

³⁹ Hanangkü Eleazar ngongpai ha ayingshü jakteipü shungthü yahei baünyangi dhüngtü moidü kü küpteke.

⁴⁰ Aaron kü phaakpü hühihathü nevaipheikü üpaiyao moidü touei Shembüpa kü ayingshü jakhen nepeihen Israel kü shahvüng shuohpü hük nyuteke. Hei nevaijema Korah hatü büpalei shennyakthü kei dihen. Hathü kemei Shembüpai Mosa homei Eleazar kü epükei dükteke.

Aaroni Nanglakthü Yangnyüke

⁴¹ Nyihphei, Israel am khong kemei Mosa hi Aaron nyi khüei eela-ei, “Anjinyi-i Shembüpalei nanglak hanei mahtükteke” shei e.

⁴² Mosa hi Aaron nyi khüei jom peü thaikempheikü, jomi ashakshem philei veishuoh shingkü ha kü phumi jümtü Shembüpalei müknyinshekhang eeteke.

⁴³ Mosa hi Aaron nyi heih-ei ashakshem shemshelei yaong,

⁴⁴ hatü Shembüpai Mosa kü,

⁴⁵ “Khong toueipü shindaishih, ngei chemjalak kü hathü shennyakthü jütükhen hih” shei e, hatü jiji dhe thaungei sha,

⁴⁶ hatü Mosai Aaron kü, “Ayingshü jakpü shung yah-ei ha kü ayingshü shihtuh hatü moidü leipü aw yah-ei ha kü bahtü khong touei mukei heih-ei jomphong daüeilangtüktuh. Shembüpa mongshihdaiteke hatü cham bah-ei chongpangdaiteke” shei e.

⁴⁷ Mosai epükei Aaroni dük, hatü khong touei mukei heihteke. Heihja shingkü nanglakthü kü cham chongpangdaitü nyujateke, shejao Aaroni ayingshü jakei nanglakthü shingvaishi moila shuoh.

⁴⁸ Büpai yem hi mahng aa kü yaong, hatü cham dohdai.

⁴⁹ Korah tata kü dipü mü lenei shao shennyak 14, 700 thahshi hapa chami diteke.

⁵⁰ Cham dohdaipheikü Aaroni Mosa yaongpü ashakshem shaden touei nyokei leiteke.