BHEI-IE 13 - DAÜLANGPÜ LAIHING (BSI)

Güh Shukpü

¹ Shembüpai Mosa kü,

² “Jat anpünyi kübü mübü hükbaong jetuh, hatü ngei Israel am kü shuohhen Kanan kahdokei güh shukhen hathü shennyak shomtuh” shei e.

³ Hanangkü Shembüpai eshuohpü keiha Mosai Paran jahpan leipü jom shomteke. Jom peü Israel amei mübüthü nyuteke.

⁴ Jomei jat hatü mübüthülei men hapakei: Jat Mübülei men Reuben kü Zakkurlei cheha Shammua;

Jat Mübülei men

⁵ Simeon kü Horilei cheha Shaphat;

⁶ Judah kü Jephunnehlei cheha Kaleb;

⁷ Issakhar kü Josephei cheha Igal;

⁸ Ephraim kü Nunei cheha Hoshea;

⁹ Benjamin kü Raphulei cheha Palti;

¹⁰ Zebulun kü Sodilei cheha Gaddiel;

¹¹ Manasseh kü Susilei cheha Gaddi;

¹² Dan kü Gemalilei cheha Ammiel;

¹³ Asher kü Mikhaelei cheha Sethur;

¹⁴ Naphtali kü Vophsilei cheha Nahbi;

¹⁵ Gad kü Makhilei cheha Geuel;

¹⁶ Hathüyü Mosai kahmük kü gühshuk shompü shennyakthülei men nyüke. Mosai Nunei cheha Hoshea kü Joshua shei men jeiteke.

¹⁷ Mosai jom Kananei gühshuk shomshingkü hapakei eteke, “Hatoueipü Negebei aongtuh, hatü phaüshang kahmük lemei shütuh.

¹⁸ Hapayü mekeipü kahmük, halei nyupü shennyakthüyü wong kohpü hi nekohpü, jom longshi hi maanshi nyüpa veituh.

¹⁹ Mekeipü kahdok, nemeipü hi meipü kü jom nyunya, mekeipü chingnyü kü jom nyunya, chingnyüthü kü penyü showei nyülashang veituh.

²⁰ Kahdok kü kahcheü nyüla, pünyü vunglong nyüla veituh. Hapa kahdok leipü betjük vaümei leikei.” (Hapayü shongpü nyalingngupai shümpü hepak shiüteke.)

²¹ Hanangkü jom aongei Zin jahpan kübü Lebo-Hamath philep Rehob thahshi kahmük dokteke.

²² Jom Negeb homei aong, hatü Anakei hühihathü, Ahiman, Sheshai hatü Talmai am nyupü Hebron ngoishi peiteke. (Hebronü Ijip leipü Zoan mü vangbong nyeti yeihshi ching agteke.)

²³ Mechem jom Eshkol Kahji ngoipa, jomi nyalingngupai choung hük mon nyupü kao dakteke. Shennyak nyi-i lüng kü hapa shatü pai, hatü ha mü pomegranat betjük hatü adhajükao leiteke.

²⁴ Hapa kü Eshkol Kahji shei menteke; mehenangkü Israel ami haleipü nyalingngupai dakei leiteke.

²⁵ Nyih pinyi thahshi kahmük dokei longteipheikü jom nyokei lei.

²⁶ Mosa, Aaron hatü Paran jahpan Kadeshlei nyupü Israel am nanglakthü touei jom nyokei lei. Halei jomi thaipü khong touei shah-om shuoh, hatü jomi leipü betjük hujateke.

²⁷ Jomi Mosa kü, “Nüngi shompü kahdok thahshi ham aongtepih; kahdok kü kahcheü kohshi; halei amma hatü nyahjiü yennyüke. Haleipü betjükü hapa khih.

²⁸ Shejao halei nyupü shennyakthüyü wong kohshi hatü chingnyüthüyü longshi hatü pe meishi petüktü nyüke. Hami halei Anakei hühihathüao eetepih.

²⁹ Amalek am Negebei nyunyu khih; Hit, Jebus hatü Amor am phaüshang kahdokei nyunyu khih; hatü Kanan am Mediterranean Yungching hatü Jordan yungyen yungkung kü nyunyu khih” shei ejateke.

³⁰ Mosa homei langmaanpü shennyakthü nenhütü Kalebi, “Jen aongei hapa kahdok yahhen hih, heiyao heiyao aokshasha hih” shei e.

³¹ Shejao Kaleb mü aongpü shennyakthüi, “Nevai, jeni jom mü nehokaokhen khih, jen meyü jom-üng wong kohshi nyüke” shei e.

³² Hapa keiha jomi Israel nanglakthü touei kahmük doknüng daipü shahshem shah-om aokjateke. Jomi, “Halei nyupü shennyakthüi hahsham dangkao hapa kahdok kü hahying nevamnyu. Halei nyupü shennyakthüyü bümhipü longshi khan khih.

³³ Hami halei Nephilim am eetepih (Anakei hühihathüyü Nephilim leipü peipü nyüke). Jom kü veihahtü hamphongü shoukha-ao nehie-i deihküpeih” shei ejateke.