BHEI-IE 12 - DAÜLANGPÜ LAIHING (BSI)

Aaron hi Mariam Nyi Mosa kü Mükhühpü

¹ Mosai Kush am nyüha hük mü shem yempü nangkü Aaron hi Mariam nyi-i Mosa kü khüei yaong.

² Jijinyi-i, “Shembüpai Mosa homei mon enyu je? Büpai henji homei shah ne-enyu je?” shei e, hatü Shembüpai ha dan.

³ Shaang Mosayü longi nenteiaokpü shennyak, kahdoknyü kü nyupü shennyak peü mü nenteiaokpü shennyak nyuteke.

⁴ Ngangahük kü Shembüpai Mosa, Aaron hatü Mariam hathü kü, “Am jemphen ashakshem leipü vamkei” shei e. Hanangkü jom jemphen vam.

⁵ Hahepak kü Shembüpa phum shemnyü hük kü yiüei ashakshem shadenei yaongtü, “Aaron! Mariam!” shei nyük. Jijinyi shelemei aongjashingkü büpai e,

⁶ “Ngei epü bangtuh: Mechem am mü thibüthü nyuhen, ngei jom touei manghkhang homei shakei vamnyüpeih; Ngei jomphong mü mangh kü eteinyüpeih.

⁷ Shejao ngei chongphobü Mosa meyü hapakei nevai; Büpayü ngelei Israel nanglak peü kü veihen ngei shuohpeih.

⁸ Büpa meyü ngei dhe dhe gongei lekei eteinyüpeih, shejao dokei, nyieneinyangei nevaijü shahlapei ne-eteinyih, hatü büpai ngei mekei nyu ha eeteke. Ngei chongphobü Mosa khüei ehen anji mehekei nyemei nedeihpa?”

⁹ Shembüpai jiji kü mongshih, hatü büpa aongdai.

¹⁰ Mechem ashakshem shakeipü phum anlangpa, shüdao kei shoshi Mariam ngomei leiteke. Aaroni pinnyü kü veishingkü Mariamü ngomdaitü ee,

¹¹ hatü Aaroni Mosa kü, “Chingmeilemlingei longpüpa, henji-i nelineha-i thahpü mang khüei hanghi teponghü.

¹² Chingmeilemlingei pinnyü shaang angpü naüja kei, hatü pinnyülei hangphai hanei hahtüktü tetuhphong” shei khümei eteke.

¹³ Hanangkü Mosai Shembüpa kü lenei, “Oh Shembüpa, pinnyü meitükeishuoh” shei phop.

¹⁴ Shembüpai jangei Mosa kü, “Chepai paoh pinnyülei dhe kü yu-op shaolangmeyü pinnyü nyih nyet thahshi hapa veüpong kü nenyuhah shepeih. Nyih nyet thahshi pinnyü baümtap haolei deiyei küpei tuhtuh; hapheikü mon pinnyü müei leiaokhen” shei e.

¹⁵ Hanangkü nyih nyet thahshi Mariam baümtap haolei küpei tuh, hatü pinnyü müei manglei thahshi nanglakthü layaongei nedai.

¹⁶ Hapheikü jomi Hazeroth kübü layaongei daiyei Paran jahpanei baümtap veteke.