BHEI-IE 11 - DAÜLANGPÜ LAIHING (BSI)

Israel ami Eelahen Chongpangpü

¹ Shaang nanglakthüi jom shangpongpü nangkü Shembüpai danshi eelateke. Mechem Shembüpai hapa danpa, büpa mongshih, hatü jomphong kü aw shom, hatü baümtap jung phihük awi hahtük.

² Shejao nanglakthüi Mosa kü sheühshih shei leneiwong; Mosai Shembüpa kü phopshuohshingkü aw metdai.

³ Hanangkü hapa shingkü Taberah shei menteke; mehenangkü halei Shembüpalei aw jom kü bahteke.

⁴ Jom mü chemi daipü kung shennyakthüi mih-ei hetmei hahteipü vaüei deih, hatü Israel am dangkao eelahen chongpang, hatü “Phai dangkao hahhen danglangmeyü meihen khih.

⁵ Neshakpü kü Ijiplei nyah hahhampeih, hatü mükoh, kohmüng, asheh longbenüng, bias hatü asheh hahhampü deihnyüke.

⁶ Shejao shaangü hamphong nükju-ao lepdaiteke, hatü manna mü lenei lebü hahhen meheyao neshiü” shei eteke.

⁷ Hapa mannayü dhonia vang kei hatü veiheni püjiü kei nyuteke.

⁸ Nanglakthü longteiyei hapa hom, hatü hapa shemshak kü shiüteke nevaijü khih mü ngümtü dük kü cheüteke nevaijü aan kei lingteke. Hapayü hahjü olive mainga shihtü oukpü aan kei shiüteke.

⁹ Mechem yanüng baümtapei nyien vüpa, ha mü chemi mannayao vüteke.

¹⁰ Nanglakthü peüi laophü laophülei baümtap shadenei yaongtü eelapü Mosai dan. Hahepak kü Shembüpa longi mongshih, hatü Mosa mongshangteke.

¹¹ Büpai Shembüpa kü, “Nüng chongphobü kü hapakei nemei-i mehekei lingnya? Nanglakthü peüi ngei kü mon hanggovih kohühen mü nüng mongmanghen mü ngei mehe lingphopa?

¹² Ngei jom neling, nevaijü nebüh. Mehekei nüngi ngei kü kainaipü nyüi aküngnaüha lakei paümtü daipükei nüngi chebü chepa am kü lahpü kahdokei ngei jomphong poh-ei daihenang?

¹³ Nanglakthü kempü shing ngei meleipü phai danghenang? ‘Ham kü phai yahkei’ shei jomi ngei kü yiünyüke.

¹⁴ Ngei moni hathü nanglakthü kemei müei nedaiaok-ü; ngei kü hanggo ahshi vihteke.

¹⁵ Nüngi hapakei ngei kü linghen vaijema, shaang-üng ngei jütüktuh shejao nüngi ngei kü phahjiei deihjema, ngei hapakei teponghü” shei eteke.

Mosai Mübüthü Pejempüan Jenyüke

¹⁶ Shembüpai Mosa kü, “Nanglakthü khongkü lakchongbü hatü mübü shei nüngi nyingpü Israel am behethü pejempüan nyükei thaihütuh. Jomphong nüng mü ashakshem touei yaonghütuh.

¹⁷ Hatouei ngei yiükahen hatü nüng mü eteihen, hatü ngei nüng kü shuohpü laangha hanei yah-ei jom kü shuohhen. Nüng monhai hathü kemei nekohen; shaangü jomi nanglakthülei hanggovih kohen nüng kü sheühphahen.

¹⁸ Shaang nanglakthü kü eyeishuoh: ‘Ngenyih shingvaishi am daüeilangei temtuh; ammi phai hahhen danghen’ ” shei eteke. “Hamphongi phai dangkao hahhen danglangmeyü meihen khih! Ijiplei nyupü-üng meipü khih” shei ammi langmaanshapshüpü Shembüpai danteke. Shaang Shembüpai am kü phai yahphahen, hatü ammi ha hahhen.

¹⁹ Ammi hapayü nyih hük nevaijü nyih nyi, nevaijü nyih nga, nevaijü nyih an, nevaijü nyih kukha shingvaishi mon ha hahhen nevai,

²⁰ shejao lenyang hük kemei ammei shuonghiju kü yenshi, hatü mangteng thahshi hahhen. Mehenangkü ammi am mü nyupü Shembüpa yakphong, hatü, “Ham Ijip leipü mehekei layaongei daihahpa?” shei büpa kü eelaei eteke.

²¹ Shejao Mosai Shembüpa kü, “Halei ngei nanglak 600, 000 müshi nyüpeih, hatü nüngi jom kü lenyang hük kemei phai hahhen shuohhen shei eteke.

²² Jom kü changshi ühsham mohoh hatü mi nyüpü je? Yungching ilangmong leipü nyah kemei yepjoong jomi hahhen changhen je?” shei e.

²³ Shembüpai Mosa kü, “Shembüpalei nganhiwong maani mon nyüpü hiang? Ngei epü jiüshi nevamkahen hi vamkahenshang nüngi shaang eehen” shei e.

²⁴ Hanangkü Mosa daiyei Shembüpai mehe eshuohpa, ha nanglakthü kü e. Büpai mübüthü pejempüan peü thaihütü ashakshem shinei yaonghüteke.

²⁵ Hahepak kü Shembüpa phum shangkü yiü, hatü büpa mü etei, hatü Shembüpai Mosa kü shuohpü laangha hanei yah-ei mübüthü pejempüan kü shuoh. Mechem jom kü laanghai bakpüshang, jomi teteivanei e, shejao jomi neyei hapakei netetnevan.

²⁶ Shejao mübüthü pejempüan khong kübü nyi meni, Eldad hatü Medad nyi ashakshemei nedai-i baümtapei nyu. Baümtap mongei laangha peiyei jiji kü bak, hatü jijipheni teteivanteke.

²⁷ Nethe hük mokei daiyei Mosa kü, “Eldad hi Medad nyi baümtap mongei teteivanei enyüke” shei eshuohteke.

²⁸ Hahepak kü Nunei cheha Joshua, üpa hashih mebü Mosalei küphü nyuhampa, mokei heih-ei, “Mosa, longbüpa, jijinyi dohtükhütuh” shei e.

²⁹ Shejao Mosai büpa kü, “Ngei leimao nüngi ha kü mükhühpü je? Shembüpalei nanglakthü kemei thibüthü kei hatü Shembüpai jom peü kü büpalei laangha nyemshuohkei shei ngei deihnyeih” shei e.

³⁰ Hapheikü Mosa hatü Israel am mübüthü pejempüan baümtapei nyokei leidai.

Shembüpa i Adhit Shomnyüke

³¹ Ngangahük kü SHEMBÜPAleipü vanglük hük vamei yungching leipü adhit yah-ei peiyei vüshuohteke. Jomei baümtap shinei hük lemei nyih hük hatü hükpa lemei nyih hük lem shük taishi kahdok kübü feet jem aongshi vüshuohteke.

³² Hanangkü nanglakthüi nyakhingai thüngei nyihphei thahshi adhit yepei nyu; peüi maanpeih shei dok haja hük phangkü neyep, hatü jomi baümtap shinei hathü yaütü yeemteke.

³³ Shejao jomi phai hah-ei mangkemi Shembüpai nanglakthü kü mongshih, hatü büpai jom kü cham peihüteke.

³⁴ Hanangkü hapa shing kü Kibroth-Hattaavah shei nyüknyüke; mehenangkü hatouei jomi hahnempüthü dipü mahng vüteke.

³⁵ Hatoueipü nanglakthüi baümtap chaiyei Hazeroth shei epü shingei baümtap veteke.