BHEI-IE 10 - DAÜLANGPÜ LAIHING (BSI)

Ngini Lingpü Amit

¹ Shembüpai Mosa kü,

² “Ngin dhüngei amit nyi shüktuh, hatü nanglakthü nyükei thaihen hatü baümtap chaiyei daihen shingvaishi hathü noteituh.

³ Mechem amit nyiphen luangi vünghenshang, Israel am khong peü nüng touei ashakshem shadenei thaihen,

⁴ shejao mechem amit hük mon vünghen, Israel phangthü kü mübüthü mon nüng touei thaihen.

⁵ Mechem amit shohloh-i vünghen, heongphi kü baümtap veyei nyupü jatthü layaonghen.

⁶ Mechem amit nyipabü shohloh-i vünghen, heshü philei baümtap veyei nyupüthü layaonghen. Hapayü layaongei daihen shahvüng nyukahen.

⁷ Shejao khong nyükei thaihen shingvaishi luangi vüngtuh” shei eteke.

⁸ Hapa amit nyiyü Aaron ngongpalei chehathüi vünghen. Hapayü hüdenhalenshi noteihen shahkungnyü nyüke.

⁹ Mechem ammei kahdokei am khüei yaongpü vepa mü thepju kü yaonghenshang, hapa amit vüngtuh. Hahepak kü Shembüpa, ammei Kahvangi am deih-ei danghen, hatü vepathü lak kübü am yanglanghen,

¹⁰ hatü shao am mongongmonglepü hepak, ammei Lenja Mo hepak kü ammi shuohpü jakpü moila hatü mongjempü moila kü ammi hapa amit vünghen, hatü hayü am shingvaishi ammei Kahvang touei nebenelakbenüng hük nyukahen. Ngeiyü Shembüpa, ammei Kahvang.

Israel am Layaongei Daipü

¹¹ Vangbong nyi mü len nyi mü nyih kukhapabü kü ashakshem shak kübü phum anlang.

¹² Hahepak kü Israel ami Sinai jahpan leipü layaongei shing hük kübü hük shei Paran yingnyülei phum yiüei mangjümpü thahshi daiteke.

¹³ Mosa homei Shembüpai eshuohpükei hapayü shongpü jom layaongei daipü shiüteke.

¹⁴ Khongmü khongmü shei shongei Judah am layaongei dai, hatü Amminadabei cheha Nahshon mübü nyuteke.

¹⁵ Zuarlei cheha Nethanelü Issakhar ammei mübü nyu,

¹⁶ hatü Helonei cheha Eliabü Zebulun amei mübü nyu,

¹⁷ hatü ashakshem benei Gershon hi Merari phang nyi-i ha paitü layaongei daiteke.

¹⁸ Hapheikü Reuben amei khüamlung phangkü hanpü khong Shedeurlei cheha Elizuri mütü layaong.

¹⁹ Zurishaddailei cheha Shelumiel-ü Simeon amei mübü nyu,

²⁰ hatü Deuelei cheha Eliasaph-ü Gad amei mübü nyuteke.

²¹ Hapheikü daülangpü douhinangthü kotü Kohath am phang layaong. Jom ngoishekü ashakshem yaongtüktü nyuhen eteke.

²² Hapheikü Ephraim amei khüamlung phangkü hanpü khong Ammihudei cheha Elishama-i mütü layaong.

²³ Pedahzurlei cheha Abidanü Benjamin amei mübü nyuteke,

²⁴ hatü Gideonilei cheha Abidanü Benjamin amei mübü nyuteke.

²⁵ Shompülei Dan amei khüamlung phangkü hanpü khong Ammishaddailei cheha Ahiezeri mütü khong peü kü pheiküp vaishi layaong.

²⁶ Okranei cheha Pagielü Asher amei mübü nyu,

²⁷ hatü Enanei cheha Ahirayü Naphtali amei mübü nyuteke.

²⁸ Jom layaongei daishingkü Israel am khong khong hantü daipü hapakei nyuteke.

²⁹ Mosai Midian am cheko Jethrolei cheha Hobab kü, “Shembüpai ham kü shuohhen shei lahpü shingei layaongei lüdainyüpeih. Shembüpai Israel am dahüshehühen shei lahpeih; hanangkü ham mü daishah hatü hami nüng kü lemphüli hanphahen” shei e.

³⁰ Hobabi, “Anyoh, ngei nedai-ü; ngei hamei kahdok hatü nanglakthü touei nyokei leidaihen hih” shei e.

³¹ Shejao Mosai, “Chingmeilemlingei nüngi ham tetuhphong. Jahpanei ham metouei baümtap vehen nüngi nyingei nyüke, hatü nüngü hamei lem mübü vaihen.

³² Nüng ham mü daiküjema, Shembüpai ham kü shuohpü moihimanthü peü hanphahen” shei e.

³³ Hanangkü jomi Shembüpalei daülangpü Sinai Kahshang kübü layaongei nyih jem thahshi dai. Jom metouei yaongei baümtap vehen, shing yemhen shingvaishi Shembüpalei Vangpüshuwpü Pela jom shekü daiteke.

³⁴ Jom mechem baümtap leipü layaongei daipa, Shembüpalei phum nyihnüng jom shak kü nyu.

³⁵ Mechem Vangpüshuwpü Pela paiyei layaongpa, Mosai eteke: “Layaongtuh, Oh Shembüpa! nüngei vepathü yantüktuh; Nüngei vepathü nüng tou kübü nyaitükhütuh.”

³⁶ Mechem hapa kampü dohpa, büpai eteke, “Oh Shembüpa, ienüng neaokpü Israel am haja longi touei nüng nyokei leikei”.